قالا تۇرعىندارىنىڭ بەلسەندى دەمالىسى ءۇشىن ەلوردادا كوپتەگەن قوعامدىق كەڭىستىكتەر پايدا بولا باستادى. ەسكى ۇيلەردىڭ ورنىندا, ەسىلدىڭ جاعالاۋىندا ورنالاسقان اشىق الاڭداردا ونەرمەن, سونداي-اق سپورتپەن اينالىسۋعا مول مۇمكىندىك قاراستىرىلعان. سونداي قوعامدىق كەڭىستىكتىڭ ءبىرى ۇلكەن جانە كىشى تالدىكول ماڭايىنان اشىلماق. بۇل جەردە كەلەشەكتە قورىق جانە ورمان-ساياباعى بار ەكوپارك پايدا بولادى. وسى ماقساتقا 1 ميلليارد تەڭگە كولەمىندە قارجى ءبولىنىپ وتىر.
بۇگىنگى تاڭدا كىشى تالدىكولدىڭ سۋ بالانسىن ساقتاي جانە تولىقتىرا وتىرىپ, رەكرەاتسيالىق ايماق قۇرۋ بويىنشا جوبالاۋ-سمەتالىق قۇجاتتاما ازىرلەنۋدە.
كىشى تالدىكولدەگى ەكوپارك جوباسى (ە-10 كوشەسى, «زەلەنىي كۆارتال» تك قاراما-قارسى) سۋ قويماسى اباتتاندىرىلادى: سۋ قويماسىنىڭ بويىندا سۋدىڭ تابيعي ءسۇزىلۋىن جانە قاجەتتى ەكوجۇيەنى قۇرۋعا مۇمكىندىك بەرەتىن تاستان جاسالعان جاعالاۋ بولادى. سونداي-اق سۋ دەڭگەيىن ساقتاپ ءارى وتتەگىمەن بىركەلكى قانىقتىرۋ ءۇشىن بيودرەناجدىق جۇيەنى ۇيىمداستىرۋ جانە سۋ ايدىنىن اەراتسيالاۋ كوزدەلەدى.
سونىمەن قاتار سەرۋەندەۋ ءۇشىن دە ارنايى ينفراقۇرىلىم جاسالادى: جاعالاۋداعى سۋلى-باتپاقتى جەرلەردە تەرراسالىق جاعالاۋ ساقتالادى جانە فلورا مەن فاۋناسى بار ەكوكليمات ءۇشىن جاعداي جاسالادى.
تالدىكولدىڭ وزىندە (ۇلكەن تالدىكول) ءوزىنىڭ ەكولوگيالىق ينفراقۇرىلىمى بولادى. ۇلكەن تالدىكول كولىنىڭ جانىندا قورىق جانە ورمان-ساياباق ايماعى بار ەلىمىزدەگى العاشقى تابيعي پارك اشىلادى.
ۋربانيستيكا ورتالىعى بازاسىندا, سونداي-اق ەسىل اۋدانىنىڭ اكىمدىگىندە ساۋلەت, قالا قۇرىلىسى جانە جەر قاتىناستارى باسقارماسىنىڭ, سول سياقتى قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىلارى كىشى تالدىكولدىڭ ماسەلەسى بويىنشا ەكوبەلسەندىلەرمەن, ەكولوگتارمەن جانە بەلسەندى تۇرعىندارمەن بىرنەشە رەت كەزدەسۋ وتكىزدى
