جۋىردا قازاقستان كينەماتوگافتارى پاتريوتتىق فيلمدەر ءتۇسىرۋدى قولعا الادى. ەلباسى نۇرسۇلتان نازارباەۆ الماتىداعى رەزيدەنتسياسىندا شاكەن ايمانوۆ اتىنداعى «قازاقفيلم» كينوستۋدياسىنىڭ پرەزيدەنتى ەرمەك امانشاەۆتى قابىلداۋ ۇستىندە وسىنداي مىندەتتەمە جۇكتەدى.
پرەزيدەنت ءباسپاسوز قىزمەتىنىڭ حابارلاۋىنشا, كەزدەسۋدە وتاندىق كينەماتوگرافيانىڭ جاعدايى مەن دامۋ پەرسپەكتيۆالارى, كينوستۋديانىڭ قازىرگى جۇمىسى, سونداي-اق الداعى كەزەڭگە ارنالعان جوسپارلارى تالقىلانعان. مەملەكەت باسشىسى بۇگىندە كينوستۋديا قازاقستاندىقتاردىڭ مادەني دامۋىندا ايرىقشا ءرول اتقاراتىنىن اتاپ ءوتتى.
كينو سالاسىن دامىتۋ ءۇشىن مەملەكەت تاراپىنان تيىسىنشە جاعداي جاسالۋدا. كينوستۋديا جوعارى دارەجەلى جابدىقتارمەن جانە زاماناۋي ءتۇسىرۋ الاڭدارىمەن قامتاماسىز ەتىلگەن. وسىنى قاپەرگە سالعان نۇرسۇلتان نازارباەۆ ۇرپاق تاربيەسىنە وڭ ىقپال ەتەتىن پاتريوتتىق تاقىرىپتاعى فيلمدەر ءوندىرىسى قاجەت ەكەنىن اتاپ ءوتتى.
پاتريوتتىق تاربيە جالاڭ سوزبەن جۇرمەيدى. قازاق وسكەلەڭ ۇرپاقتى تاربيەلەۋ ءۇشىن داڭقتى, ونەگەلى تۇلعالارىن ناسيحاتتاپ, تاريحىن تۋ قىلۋعا ءتيىستى. سوندىقتان دا, پرەزيدەنت قازاق حاندىعىنىڭ ءتۇرلى تاريحي كەزەڭدەرىنە جانە سول زاماننىڭ ايتۋلى تۇلعالارىنا ارنالعان كينولار ءتۇسىرۋدىڭ وزەكتىلىگىن دە اڭگىمەلەدى.
ايتا كەتۋ كەرەك, رەسمي قابىلداۋدا ەرمەك امانشاەۆ مالىمدەگەندەي, «قازاقفيلم» جىل سوڭىنا دەيىن پروكاتقا ءتۇرلى تاقىرىپتاعى 8 فيلم شىعارۋدى جوسپارلاپ وتىر ەكەن. قازاقستاندىق كينوفيلمدەر بىلتىر 1 ميلليوننان استام كورەرمەن جيناعان.
ءنازيرا بايىربەك
