زامانىندا كۇلتەگىن بابامىز «بىرلىگى مىقتى ەل بۇزىلماس» دەپ ارتىنداعى ۇرپاعىنا تاسقا قاشاپ وسيەت قالدىرعان ەكەن. ءيا, وتىز جىلعا جۋىق ەلىمىز بىرلىكتىڭ ارقاسىندا تىرلىك ەتىپ, الەمدىك قاۋىمداستىق مويىنداعان حالىقارالىق قاتىناستىڭ تولىق سۋبەكتىسىنە اينالىپ ۇلگەردى. بۇل – ءبىز سياقتى جاس مەملەكەتكە ۇلكەن ماقتانىش جانە ابىروي. مەملەكەتىمىزدىڭ قازىرگى جاڭا تاريحىنا كوز جۇگىرتسەك, تاۋەلسىزدىك جىلدارىندا ءتاۋ ەتەتىن قۇندىلىقتارىمىز جەتەرلىك.
بىرىنشىدەن, ەلىمىز ادام كاپيتالىن ساقتاپ قانا قويماي, ونىڭ ساپاسىن جاقسارتۋ جولىندا قىرۋار ەڭبەك ەتتى. ەگەمەندىكتىڭ العاشقى جىلدارىندا تەك شيكىزاتقا تاۋەلدى بولعان ەكونوميكانى ديۆەرسيفيكاتسيالاۋ ماسەلەسى تۇردى. ەلباسى نۇرسۇلتان ءابىشۇلى نازارباەۆ سول كەزدە «اۋەلى ەكونوميكا, سوسىن ساياسات» دەگەن ۇستانىمعا توقتالدى. ناتيجەسىندە ەل ەكونوميكاسىنا قىرۋار ينۆەستيتسيالىق قارجى تارتىلدى. جاڭادان ءوندىرىس ورىندارى اشىلىپ, تۇرالاپ تۇرعان كاسىپورىنداردىڭ تامىرىنا قان ءجۇردى. وسى كاسىپورىنداردا قىزمەت ەتەتىن مەملەكەت قۇرۋشى قازاق ۇلتتىق كادرلارىن قالىپتاستىرۋ جانە ادامي كاپيتالىن جاقسارتۋ ءۇشىن جاستارعا ارناپ مەملەكەتتىك «بولاشاق» باعدارلاماسى قاتار جۇزەگە اسىرىلدى. بۇگىندە وسىلاردىڭ جەمىسىن حالىق كورىپ وتىر.
ەكىنشىدەن, ءبىز شەكارامىزدى كورشى مەملەكەتتەرمەن تۇگەل شەگەلەپ شەشىپ الدىق. مىسالى, الىس شەتەلدەردى ايتپاي-اق, جانىمىزداعى تاۋلى قاراباق سەكىلدى كورشىلەرىمىزدىڭ وزدەرى دە وسى جەر داۋى ءۇشىن ۇلكەن قانتوگىسكە باردى. وسى تۇرعىدان العاندا, تاۋەلسىزدىكتىڭ ءبىرىنشى بەلگىسى شەكارانى انىقتاپ الۋداعى تۇڭعىش پرەزيدەنتىمىز, ۇلت كوشباسشىسى نۇرسۇلتان نازارباەۆتىڭ جاس مەملەكەتىمىزدىڭ تاۋەلسىزدىگىن تۇعىرلى ەتۋدەگى تاريح پەن كەلەشەك ۇرپاق الدىنداعى ەڭبەگى وراسان زور.
ۇشىنشىدەن, ءبىز سياقتى كوپۇلتتى مەملەكەتتەگى بىرلىك پەن ىنتىماقتى ساقتاپ قالۋ ماسەلەسى. قازاق ەلىنىڭ كوپۇلتتى بولىپ قالىپتاسۋى بۇل كەشە عانا قالىپتاسقان جاعداي ەمەس. تاريحقا شولۋ جاساساق, باستاۋىن سول اق پاتشا زامانىنان العان بۇل پروتسەسس كەشەگى ەگەمەندىك العان تۇسقا دەيىن جالعاسىپ جاتتى. ونىڭ ءارتۇرلى سەبەپتەرى بار. جۇزدەن اسا ۇلت پەن ۇلىستىڭ باسىن قوسىپ, «ءبىر جاعادان باس, ءبىر جەڭنەن قول شىعارىپ», ءبىر شاڭىراقتىڭ استىندا ايرانداي ۇيىتىپ جاس مەملەكەت قۇرۋ ەردىڭ ءىسى بولدى. بىرلىگى تىرلىگىنە ساي مەملەكەت قانا مىناۋ جاھاندىق الەمدە ءوز ورنىن الاتىنى – اكسيوما.
تۇڭعىش پرەزيدەنتىمىز – ەلباسى نۇرسۇلتان ءابىشۇلى نازارباەۆتىڭ تىكەلەي باستاۋىمەن قۇرىلعان قازاقستان حالىق اسسامبلەياسى وسى ۇلتارالىق كەلىسىم مەن تۇراقتىلىقتى ساقتاپ قالۋداعى قاسيەتتى ميسسياسىن مۇلتىكسىز ورىنداپ كەلەدى. قازىرگى تاڭدا ەلىمىزدە باسقا ۇلتتارعا ءوز ءداستۇرىن, مادەنيەتىن, ءتىلىن ساقتاپ قالۋدا تولىق جاعداي جاسالعان. ەل پارلامەنتى ماجىلىستە دە قازاقستان حالىق اسسامبلەياسى وكىلدەرىنە ارنايى كۆوتا بولىنگەن. بۇل ەلدەگى ۇلتارالىق سىيلاستىقتىڭ تولىق كورىنىسى دەسەك ەش قاتەلەسپەيمىز.
سونىمەن قاتار, الەمدەگى وركەنيەتتەر قاقتىعىسىنا قاراماستان, ەلوردامىزدا الەمدىك دىندەردىڭ باسىن قوسىپ جۇيەلى تۇردە ۇلكەن سەزدەر وتكىزدىك. سونداعى ماقسات قازاقستانداعى قالىپتاسقان ۇلتارالىق, دىنارالىق, مادەنيەتارالىق ۇلگىنى الەمگە قازاقستاندىق مودەل رەتىندە كورسەتۋ, پاش ەتۋ بولاتىن. ءبىز وسى ميسسيانى لايىقتى ورىنداعاندايمىز. ەندىگى جەردە تاۋەلسىزدىكتىڭ وتىز جىلدىعى قارساڭىندا ەلدەگى ىنتىماق پەن بەرەكەنى بۇدان ءارى نىعايتىپ, بابالاردىڭ اماناتىن كەلەر ۇرپاققا امان جەتكىزۋ دەپ بىلەمىز.
زۋلفۋحار عايىپوۆ,
جوعارى كولىك جانە كوممۋنيكاتسيا
كوللەدجىنىڭ ديرەكتورى,
نۇر-سۇلتان قالاسى ماسليحاتىنىڭ دەپۋتاتى
