نۇر-سۇلتان قالالىق ءماسليحاتىنىڭ دەپۋتاتتىعىنان ۇمىتكەر تالعات مامىقانوۆ جەكسەنبى كۇنى «ەسىكتەن ەسىككە دەيىن» اكتسياسىنىڭ اياسىندا بەيبىتشىلىك كوشەسىنىڭ تۇرعىندارىنا ۇگىت-ناسيحات جۇرگىزدى.
اتالعان شارا بارىسىندا كوپشىلىككە Nur Otan پارتياسىنىڭ سايلاۋالدى باعدارلاماسى تانىستىرىلدى. كەزدەسۋ پىكىرلەسۋ فورماتىندا جۇرگىزىلدى. سونداي-اق تۇرعىندار ۇمىتكەرگە وزدەرىن تولعاندىرىپ جۇرگەن كوپتەگەن سۇراقتار قويىپ, ونىڭ تولىققاندى جاۋابىنا قانىقتى. ساۋالدار قوعامدىق ءومىردىڭ ءارتۇرلى قىرلارىن قامتىدى: حالىقتىڭ قارجىلىق-ماتەريالدىق حال-احۋالى, مەديتسينا جانە ءبىلىم بەرۋ سالاسى قىزمەتكەرلەرى جالاقىسىنىڭ تومەندىگى, ەكىنشى دەڭگەيلى بانكتەردىڭ نەسيەلىك پايىزدارىنىڭ جوعارىلىعى, نەسيەلەردى كەشىرۋ, سپورتتى دامىتۋ, مەكتەپتەر مەن بالاباقشالاردا ورىنداردىڭ جوقتىعى, مەديتسينا سالاسىندا ناقتىلى ماماندانىم قىزمەتكەرلەرىنىڭ تاپشىلىعى, جۇمىس ورنىنىڭ جەتىسپەۋشىلىگى جانە ت.ب. كەيبىر ماسەلەلەر بويىنشا ساۋال قويۋشىلارعا ەگجەي-تەگجەيلى جاۋاپ بەرىلىپ, ناقتى جايتتار تەرەڭىرەك تالقىلاندى. قالاي دەگەندە دە كەزدەسۋ ەكى جاققا دا ءتيىمدى بولدى.
– الەۋمەتتىك سالا قىزمەتكەرلەرىنىڭ جالاقىسى كوڭىل كونشىتەرلىكتەي ەمەس ەكەنى راس. بىراق مەملەكەت وسى ولقىلىقتاردى جويۋ باعىتىندا جۇمىس ىستەپ جاتىر. 2021 جىلدىڭ قاڭتار ايىنان باستاپ ءبىلىم سالاسى قىزمەتكەرلەرىنىڭ ەڭبەكاقىسى 25 پايىزعا كوتەرىلەدى. سونداي-اق مەملەكەت باسشىسىنىڭ تاپسىرماسى بويىنشا, كەلەر جىلدىڭ باسىنان باستاپ بارلىق مەديتسينا قىزمەتكەرلەرىنىڭ جالاقىسى كەزەڭ-كەزەڭمەن وسىرىلە بەرەدى, – دەدى تالعات مامىقانوۆ.
ەكىنشى دەڭگەيلى بانكتەر نەسيەلەرىنىڭ پايىزدىق مولشەرلەمەلەرىنىڭ جوعارعىلىعى تۋرالى ساۋالعا دا ناقتىلى جاۋاپ بەرىلدى: مەملەكەت حالىقتىڭ نەسيەلىك جۇكتەمەلەرىن ازايتۋ ءۇشىن ءتۇرلى مەملەكەتتىك باعدارلامالاردى جۇزەگە اسىرۋدا.
سونداي-اق كوپشىلىكتى تولعانتقان سپورت تاقىرىبى دا ءسوز بولدى. مەملەكەت بالالار مەن جاستار اراسىندا بۇقارالىق سپورتتى دامىتۋعا قاجەتتى قارجىنى ءبولىپ وتىر. ول ءۇشىن كاسىبي كلۋبتاردى قاراستىرىلعان قاراجات ءىشىنارا ەكشەلىپ, ۇنەمدەلگەن اقشا اۋەسقويلار سپورتىنا جۇمسالدى.
بالاباقشالار مەن مەكتەپتەردە ورىنداردىڭ جەتىسپەۋشىلىگىن جويۋ بويىنشا بىرقاتار ءىس-شارالار اتقارىلىپ جاتىر. بۇل جەردە باستى ماسەلە – قالا حالقى سانىنىڭ جەدەل ءوسىپ كەلە جاتقاندىعىندا جانە ىشكى كوشى-قون پروتسەسىنىڭ قارقىندىلىعىندا. بيۋدجەتتەن بالاباقشالارعا دەمەۋقارجى بولىنەدى, وسى قارجىنىڭ ءبىر بولىگى باقشالارعا باراتىن بالاقانداردىڭ تولەمىنە جۇمسالادى.
تالعات مامىقانوۆتىڭ ايتۋىنشا, مەديتسينا سالاسىندا كەيبىر تار شەڭبەرلى ماماندىق يەلەرىنىڭ تاپشىلىعى سەزىلەتىنى راس, دەگەنمەن جاقىن بولاشاقتا وسى جەتىسپەۋشىلىكتىڭ الدىن الۋ ءۇشىن ولاردىڭ جالاقىسى كوتەرىلىپ, ماماندانىمدار بويىنشا ۇستەماقى بەرىلەتىن بولدى. 2021 جىلى ناقتىلى مەديتسينالىق ماماندانىمدارعا وقىتۋ ءۇشىن قالا اكىمىنىڭ 200 گرانتىن تاعايىنداۋ جوسپارلانعان.
– حالىقتىڭ تۇرمىس-تىرشىلىگىن جاقسارتۋ, ءومىر ءسۇرۋ ساپاسىن ارتتىرۋ ماقساتىندا ولاردىڭ تۇرعىلىقتى جەرلەرىن اباتتاندىرۋدىڭ دا ماڭىزى زور. وسىعان وراي بەيبىتشىلىك كوشەسى بويىنداعى ۇيلەر مەن اۋلالاردىڭ بارلىعى دەرلىك جاڭاشا جاساقتاندىرىلىپ, كوپشىلىك بوس كەڭىستىكتەردە بالالار جانە سپورت الاڭدارى جاسالدى, – دەيدى ءسوز سوڭىندا تالعات مامىقانوۆ.
