رۋحاني قازىنا ورداسى – كىتاپحاناعا باس سۇقپايتىن, كىتاپتار الەمىنە ساياحاتتامايتىن ادام كەمدە كەم. وسى الەمدە ءومىرىنىڭ كوپ بولىگىن وتكىزىپ, جۇمىس ىستەيتىن كىتاپحاناشىلاردى سول باي قازىنانىڭ قىراعى كۇزەتشىلەرى دەسە بولادى. 15 جىلدان بەرى استانا قالالىق ورتالىقتاندىرىلعان كىتاپحانالار جەلىسىنىڭ ميچۋرين تۇرعىن الابىنداعى №10 كوپشىلىك كىتاپحانا فيليالىندا اعا كىتاپحاناشى بولىپ ەڭبەك ەتەتىن اسەل وماش جاۋاپتى دا قىزىقتى كاسىبىنىڭ قىر-سىرىمەن ءبولىستى.
تاڭەرتەڭ كىرگەن بەتتە سورەدەگى كىتاپتار, ونداعى ۇلى ادامدار بەينەسى الدىنان كۇن سايىن قارسى الادى. كىتاپحانادا توعىسقان ۇلىلار رۋحىمەن امانداسىپ, ولاردان وزىنە كۇش الاتىن اسەل قايىركەنقىزى سول كۇنگى جوسپارىنا ساي قالىپتى جۇمىسىنا كىرىسىپ كەتەدى.
– جالپى ءبىزدىڭ مىندەتتەرىمىزگە – كىتاپحانا قورىن ساقتاۋ, تولىقتىرۋ, كەلگەن وقىرماندارعا قىزمەت كورسەتۋ, كەڭەس بەرۋ, سۇراتقان قاجەتتى ادەبيەتتەرىن تاۋىپ بەرۋ, قوسىمشا اقپاراتتىق ماتەريالدارمەن قامتاماسىز ەتۋ, اي سايىن وتەتىن ءىس-شارالاردى ۇيىمداستىرۋ, جىل بويى ۇلى تۇلعالاردىڭ مەرەيتويىن اتاپ وتكەندە سوعان ساي كورمە وتكىزۋ, سولاردىڭ شىعارمالارىن ناسيحاتتاۋ جۇمىستارى جاتادى. سول قىزمەتتەرگە ساي كۇندەلىكتى وقىرمانداردىڭ فورمۋليارىن تىركەپ وتىرۋ, كىتاپحانا بيلەتىنىڭ مەرزىمى بىتكەن وقىرماندارمەن جۇمىس ىستەۋ, ايىنا بىرنەشە رەت كەلەتىن جاڭا كىتاپتاردى تىركەۋ, ونى باعدارلاماعا رەتتەپ ەنگىزۋ, كەرەك اقپاراتتارعا كارتوچكا تولتىرۋ سىندى باسقا دا مىندەتتەرىمىز كوپ, – دەيدى اعا كىتاپحاناشى.
1432 تۇرعىنى بار ميچۋريننەن بولەك, كورشىلەس تۇرعىن الاپتاردىڭ دا حالقىنا قىزمەت كورسەتەتىن كىتاپحانا قورىندا 8732 كىتاپ بار. كىتاپحاناعا كەلۋشىلەردىڭ جاس دەڭگەيى ءارتۇرلى. الاپتارداعى بالاباقشالار, مەكتەپتەر قىزمەتكەرلەرى مەن وقۋشىلارى, زەينەتكەرلەر ءجيى كەلەدى. ۇستازدارى كانيكۋلدا وقيتىن كىتاپتار ءتىزىمىن بەرىپ, سول تاپسىرمانى ورىنداۋ ءۇشىن جاز بويى وقۋشىلاردىڭ اياعى ۇزىلمەيدى. جاسى ەڭ ۇلكەن وقىرمان 87 جاستا بولسا, كىشىسى بالاباقشا تاربيەلەنۋشىلەرى, ولاردى اپايلارى نەمەسە اتا-اناسى الىپ كەلىپ, كىتاپتار وقىتادى.
– ءۇش باعىتتا كىتاپتار كوپ سۇرالادى. ءبىرىنشىسى – كوركەم ادەبيەت, ەكىنشىسى – قازىرگى جاستاردىڭ پسيحولوگيالىق جانە موتيۆاتسيالىق كىتاپتارعا اۋەستىگى باسىم بولۋىنا وراي سونداي شىعارمالار, ءۇشىنشىسى – تاريحي كىتاپتار. وقىرمان وقىسى كەلگەن كىتاپتى بارىنشا جىلدام تاۋىپ بەرۋگە تىرىسامىز. جالپى كىتاپحاناشى بولۋ ءۇشىن جان-جاقتى ءبىلىم كەرەك. ءبىز, ءبىر جاعىنان, بيبليوگرافپىز, كەيدە باعدارلاماشى بولىپ, ءار ىسىمىزگە ۆيدەو ءتۇسىرىپ جۇرەمىز. ءتىپتى ۇستاز بولىپ تا شاكىرتتەردى تاربيەلەۋگە اتسالىسامىز, اراسىندا ءارتىس تە بولىپ, كەلۋشىلەرگە قويىلىم قويا سالامىز. كەيدە ەكسكۋرسوۆود بولىپ, مۋزەيلەر مەن مۇراعاتتاردى تانىستىرىپ كەتەمىز. سونداي-اق زامانعا ساي بەيىمدەلىپ, كىتاپتاردى جارنامالاپ ءجۇرىپ بلوگەر بولىپ كەتكەنىمىزدى دە بايقاماي قالامىز, – دەيدى اسەل وماش.
ايتا بەرسە, كىتاپحاناشىنىڭ اعارتۋشىلىق, ۇيىمداستىرۋشىلىق قىرىن دا كورسەتەتىن وزگە دە قىرۋار شارۋالارى مەن مىندەتتەرى جەتىپ ارتىلادى. ولار تەك كىتاپحانا ىشىندە عانا ەمەس, باسقا الاڭداردا دا ءىس-شارالار ۇيىمداستىرادى. وقىرماندارعا قىزىق بولۋ ءۇشىن ۆيكتورينالىق ويىندار وتكىزەدى. بەلگىلى تۇلعالاردى شاقىرىپ, الاپ تۇرعىندارىنا رۋحاني ازىق بەرۋگە بارىن سالادى. كىتاپحاناشىلار بىلىكتىلىگىن ارتتىرىپ, جاڭا تەحنولوگيا بويىنشا تاجىريبە الماسۋ ماقساتىندا ءتۇرلى سەمينارلار مەن كۋرستارعا قاتىسادى.
وسىنداي سەگىز قىرلى, ءبىر سىرلى ماماندىقتى تاڭداعان كەيىپكەرىمىز الدىمەن 11 جىل قازاق ءتىلى مەن ادەبيەتى ءپانىنىڭ مۇعالىمى بولىپ جۇمىس ىستەگەن. ءوزى قاراعاندى وبلىسى, قارقارالى اۋدانىنا قاراستى ءمادي اۋىلىندا دۇنيەگە كەلگەن. س.تورايعىروۆ اتىنداعى ۋنيۆەرسيتەتتىڭ قازاق ءتىلى مەن ادەبيەتى فاكۋلتەتىن ءبىتىرىپ, پاۆلودار جانە استانادا مەكتەپتەردە ساباق بەرگەن. 2008 جىلى وسى كىتاپحاناعا كەلىپ, بۇگىنگى كۇنگە دەيىن قىزمەت اتقارىپ كەلەدى. 2011 جىلى اعا كىتاپحاناشى دارەجەسىن, 2012-2014 جىلدارى قاراعاندى قالاسىنىڭ تاتتىمبەت اتىنداعى قاراعاندى ونەر كوللەدجىنىڭ كىتاپحانا ءىسى ماماندىعى بويىنشا ۇزدىك ديپلوم الدى. قازىرگى تاڭدا وقىرمانداردى بىلىممەن قاتار زامان اعىمىنا قاراي ءتۇرلى رەسپۋبليكالىق, حالىقارالىق جارىستارعا قاتىستىرا وتىرىپ, شىڭداۋ ۇستىندە. ەكى قىزدىڭ اناسى اسەل كىتاپحاناشى ءوزى قىزمەت ەتەتىن الاپتىڭ 2003 جىلى استاناعا قونىس اۋدارعالى بەرگى تۇرعىنى. كەنت تۇرعىندارى رۋحاني ءنار الاتىن كىتاپحانا ازىرگە وسى اۋىلدىڭ ەڭ باستى جانە جالعىز مادەنيەت وشاعى سانالادى.
