ە.راحماديەۆ اتىنداعى مەملەكەتتىك اكادەميالىق فيلارمونيانىڭ عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتى «ۋاقىت ىشەكتەرى» كونتسەرتىن ۇسىندى.
كونتسەرت XIX-XX عاسىرلارداعى كۆارتەت كلاسسيكاسىنا ارنالعان. وندا الەمگە ايگىلى كلاسسيك كومپوزيتورلار ليۋدۆيگ ۆان بەتحوۆەن مەن دميتري شوستاكوۆيچتىڭ شىعارمالارى ورىندالدى. ونەر ۇجىمى بەتحوۆەن شىعارمالارىن قۇرىلعان ۋاقىتتان ناسيحاتتاپ كەلەدى. جاڭا جانردى يگەرە وتىرىپ, كومپوزيتور گايدن مەن موتسارت جاساعان ۇلگىلەرگە سۇيەندى. بەتحوۆەننىڭ العاشقى كۆارتەتتەرىنىڭ مۋزىكاسى وسى كومپوزيتورلاردىڭ اسەرىن كورسەتىپ, بەتحوۆەنگە ءتان مۋزىكانى قامتيدى. كومپوزيتور ءوزىنىڭ العاشقى كۆارتەتتەرىن قورعاۋشىسى, ۆەنانىڭ باي مەتسەناتى, كنياز فرانتس يوزەف لوبكوۆيتسكە ارنادى. كونتسەرت باعدارلاماسىندا № 2 ىشەكتى كۆارتەتى ورىندالدى.
كونتسەرتتىڭ ەكىنشى ءبولىمى دميتري شوستاكوۆيچتىڭ شىعارماسىن قامتىدى. كومپوزيتور № 5 سيمفونيا مەن «متسەنسك ويازىنىڭ ماكبەت لەديى» وپەراسىن جازعاننان كەيىن كۆارتەت جانرىنا شەبەر رەتىندە بەت بۇردى. 1964 جىلى جازىلعان № 9 ىشەكتى كۆارتەت كومپوزيتوردىڭ ايەلى يرينا شوستاكوۆيچكە ارنالعان.
كەشتىڭ سوڭى ەكى ءداۋىردىڭ ءۇنىن بۇگىنگە دەيىن حالىق جۇرەگىندە جاڭعىرتىپ, تاريحتىڭ قاسىرەتى تۋرالى باياندايتىن «سامال تاۋ» اتتى قازاقتىڭ حالىق ءانى جانە سۇگىردىڭ «اققۋ» كۇيى تولىقتىردى. ۇلتتىق ناقىشتاعى تۋىندىلار ءا.ساعىمباەۆتىڭ ىشەكتى كۆارتەتكە ارنالعان وڭدەۋىندە ورىندالدى.
