ەركەعالي راحماديەۆ اتىنداعى مەملەكەتتىك اكادەميالىق فيلارمونياسى كلاسسيكالىق ۆوكال ءبولىمىنىڭ ءانشىسى, رەسپۋبليكالىق جانە حالىقارالىق بايقاۋلاردىڭ لاۋرەاتى شاھريزادا تىنىشتىققا ونەر قان ارقىلى دارىعان. ونىڭ اتا-اناسى قايرات جالىمبەتوۆ پەن ماقپال شاكىروۆا – سىر ەلىنە بەلگىلى مۋزىكانتتار. ولار قىزدارىنىڭ اۋىر ونەر جولىن تاڭداۋىن قالاماعان ەدى. دەگەنمەن, بويىنداعى بۇلىقسىعان ونەردى بايقاعاننان كەيىن باعىن بايلامادى.
شاھريزادا كىشكەنتايىنان ساحنانىڭ سىرتىندا ءوستى. قىزىلوردا قالاسىندا سول جىلدارى بالاباقشا جاعى قيىنداۋ بولعاندىقتان, اتا-اناسى ونى كونتسەرتتەرگە دايىندىقتارعا, مۋزىكالىق كەشتەرگە ەرتىپ كەلۋگە ءماجبۇر ەدى. وسىلايشا اتا-انا ۇلگىسى ونەر جولىنا الىپ كەلدى. قايرات پەن ماقپال قىزدارىنىڭ تاڭداۋىن ەستىگەننەن كەيىن مۋزىكالىق كوللەدجدى «قىزىل» ديپلوممەن بىتىرەسىڭ دەگەن شارت قويدى. شاھريزاداعا كوللەدجدە وڭىرگە بەلگىلى پەداگوگ سامال بايسەيىتوۆا ساباق بەردى. ارينە, اتا-انا دا قىزدارىنىڭ وقۋىن قاداعالاپ, كەرەك جەرىندە كەڭەستەرىن بەرىپ تۇراتىن.
كوللەدجدىڭ ەكىنشى كۋرسىندا وقىعاندا العاشقى بايقاۋعا قاتىستى. بۇل پاۆلودار قالاسىندا وتكەن رەسپۋبليكالىق دەلفي ويىندارى ەدى. وندا ەكىنشى ورىندى يەلەندى. ءبىر جىلدان كەيىن الماتى قالاسىندا پ.چايكوۆسكي اتىنداعى جاس ورىنداۋشىلاردىڭ XXXII رەسپۋبليكالىق بايقاۋى ۇيىمداستىرىلدى. وندا شاھريزادا جەڭىمپازدار قاتارىنان تابىلدى. مۋزىكالىق كوللەدجدى دە «قىزىل» ديپلوممەن ءبىتىرىپ, استاناداعى قازاق ۇلتتىق ونەر ۋنيۆەرسيتەتىنە گرانتپەن وقۋعا ءتۇستى.
وسى وقۋ ورنى پروفەسسورى روزا تىلەنشيەۆادان ءدارىس الدى. ەلوردادا وقي ءجۇرىپ, بىرنەشە بايقاۋعا قاتىسىپ, توپ جاردى. اتاپ ايتقاندا, رەسپۋبليكالىق ستۋدەنتتەر وليمپياداسىنىڭ جانە ن.تىلەنديەۆ اتىنداعى «ءوز ەلىم» ءىىى حالىقارالىق مۋزىكا فەستيۆالىنىڭ لاۋرەاتى اتاندى. 2019 جىلى وسى بايقاۋ التىنشى رەت ۇيىمداستىرىلىپ, ەلوردادا ءوتتى. شاھريزادا وندا ايدى اسپانعا شىعاردى دەپ ايتساق بولادى. بايقاۋدىڭ باس جۇلدەسىن, ەلوردا اكىمىنىڭ كۋبوگىن, نۇرعيسا تىلەنديەۆ شىعارماسىن ۇزدىك ورىنداعانى ءۇشىن ارنايى سىيىقىنى جانە تۇڭعىش پرەزيدەنت قورىنىڭ سىيلىعى ەلەكتروندى فورتەپيانوعا يە بولدى.
دارىندى قىزدىڭ ونەردەگى جەتىستىكتەرىن كورگەن قازاق ۇلتتىق ونەر ۋنيۆەرسيتەتىنىڭ باسشىلىعى يتالياعا تاعىلىمدامادان وتۋگە جىبەردى. ريم قالاسىنداعى سانتا چەچيليا كونسەرۆاتورياسىندا ءتورت اي بويى وقىدى. ميلان كونسەرۆاتورياسىنىڭ پروفەسسورى, «Giacosa di Ivrea» تەاترىنىڭ كوركەمدىك جەتەكشىسى پاولو بويزيونىڭ شەبەرلىك ساباقتارىنا قاتىستى.
ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنا ءانشى بولىپ قابىلدانعانىنا بيىلعى قىركۇيەك ايىندا 10 جىل بولادى. ونەر ۇجىمىنا ءالى ستۋدەنت كەزىندە كەلگەن ەدى. كەيىن قازاق ۇلتتىق ونەر ۋنيۆەرسيتەتىنىڭ ماگيستراتۋراسىن ءبىتىرىپ, وسى وقۋ ورنى كوللەدجىنىڭ وقىتۋشىسى بولدى.
شاحريزادا تىنىشتىق ءشامشى قالداياقوۆ اتىنداعى «مەنىڭ قازاقستانىم» حالىقارالىق بايقاۋىندا 1-ورىندى, كەيىننەن وسى بايقاۋدا باس جۇلدەنى الدى. احمەت جۇبانوۆ اتىنداعى «جۇبانوۆ كوكتەمى» V حالىقارالىق فەستيۆالىندە باس جۇلدەنى جانە «شابىت» 18-شىعارماشىلىق جاستاردىڭ حالىقارالىق بايقاۋىندا گران-پري يەلەندى.
«شابىت» فەستيۆالىندە دارىندى ءانشى «اكادەميالىق ۆوكال» اتالىمىندا توپ جاردى. «سول كەزدە قۋانىشىم قوينىما سىيمادى. قازىلار القاسىنىڭ قۇرامىندا قازاقستان, رەسەي, بەلارۋس, يتاليا, يزرايل, گەرمانيا, قىتاي ەلدەرىنىڭ كورنەكتى ونەر قايراتكەرلەرى, بەلگىلى مۋزىكانتتار بولدى. وسى جەڭىسىممەن ماقتانامىن» دەيدى شاھريزادا.
ەركەعالي راحماديەۆ اتىنداعى مەملەكەتتىك اكادەميالىق فيلارمونياسىندا ءانشى «قىز جىبەك پەن سانسىزباي» قويىلىمىنا قاتىستى, ج.وففەنباحتىڭ «گوفمان ەرتەگىلەرى» قويىلىمىندا انتونيا پارتياسىن ورىندادى, احمەت جانە عازيزا جۇبانوۆانىڭ «قۇرمانعازى» وپەراسىندا اۋەس پارتياسىن شىرقادى.
وسى ۋاقىتقا دەيىن ونەرى تولىسىپ, ءبىراز تاجىريبە جيناقتاعان شاھريزادا جەكە كونتسەرتىنە شاقىرادى. باعدارلامادا الەم كلاسسيكاسى ورىندالادى.
