كوپتەگەن كۇردەلى اۋرۋ تۇرلەرى كۇندىزگى ستاتسيوناردا وڭالتۋدى قاجەت ەتەدى. وڭالتۋ قىزمەتى بالاعا دا, ەرەسەك ادامعا دا ءتۇرلى دياگنوز بويىنشا كورسەتىلۋى قاجەت. نەگىزى ءار ەمحانادا وڭالتۋ بولىمشەسى بولۋى كەرەك. بىراق قازىرگى تاڭدا ەلوردادا تولىققاندى وڭالتۋ بولىمشەلەرى №10 جانە №4, 7, 5 ەمحانالاردا عانا بار. سونىمەن قاتار «جۇلدىز-اي», «قامقورلىق» دەگەن سياقتى بىرقاتار وڭالتۋ ورتالىقتارى جۇمىس ىستەيدى.
سولاردىڭ ىشىندە ەڭ اۋقىمدى وڭالتۋ بولىمشەسى قالالىق №10 ەمحانادا ون جىلدان بەرى حالىققا قىزمەت كورسەتىپ كەلەدى. اتالعان بولىمشەنىڭ مەڭگەرۋشىسى, رەابيليتولوگ دارىگەر ايگۇل سەرىكقىزى اسا كۇردەلى قىزمەتتەردى كۇن سايىن قيىن جاعدايداعى ادامدارعا كورسەتىپ جۇرگەن ۇجىم جۇمىسى تۋرالى ايتىپ بەردى. ەمحانانىڭ بەسىنشى قاباتىندا ورنالاسقان وڭالتۋ بولىمشەسىنىڭ نەگىزگى مىندەتى – تولىق ەمدەلىپ كەتكىسى كەلەتىن ناۋقاستارعا كۇن سايىن ءۇمىت سىيلاۋ.
– بىزدە كوپتەگەن مەديتسينالىق وڭالتۋ قىزمەتتەرى كورسەتىلەدى, كۇندىزگى ستاتسيونار, اپپ, ۇيگە باراتىن ءموبيلدى بريگادالار بار. جۇرە ءالمايتىن بالالاردى جۇرگىزەمىز. بىلتىر بىزدە كۇندىزگى ستاتسيوناردا 395 ناۋقاس ەمدەلدى. ولارعا ميوكاردا ينفاركتى, ونمك, ياعني مي قان اينالىمىنىڭ قاتتى بۇزىلۋى, جاراقاتتان كەيىنگى وڭالتۋ, تامىر اۋىستىرۋ, دتسپ, ياعي بالالار تسەرەبرالدى سال اۋرۋى, تۋا ءبىتتى دامۋى تەجەلۋى, داۋن سيندرومى سياقتى اۋرۋلار بويىنشا وڭالتۋ قىزمەتتەرىن كورسەتتىك. سونداي-اق امبۋلاتورلىق ەمحانالىق كومەك بويىنشا بىلتىر بىزدە 143 919 قىزمەت كورسەتىلدى. وعان ماسساج, فيزيوتەراپيا, ەلەكترلىك ەمدەۋ, جارىقپەن ەمدەۋ جانە ت.ب. قىزمەت تۇرلەرى جاتادى. اپپاراتتار – 2012 جىلى الىنعان زاماناۋي جابدىقتار. سونداي-اق كينەزوتەراپيا بار. لفك, ياعني بەيىمدەلگەن دەنە شىنىقتىرۋ قىزمەتى جەكە ادامدارعا جانە توپتارعا كورسەتىلەدى. بوبوتەراپيا, مەحانوتەراپيا دا جۇمىس ىستەيدى, وعان ترەناجەرلار, ۆەلوترەناجەرلار, جۇگىرۋ جولاقتارى جانە باسقالار جاتادى. سول سياقتى وستەوحوندروز, وتا جاسالماعان سىنىقتار, پنەۆمونيا, وتيتتەن كەيىنگى وڭالتۋ, 3-كەزەڭىندەگى ارتروزدار وڭالتىلادى, ورتوپەديالىق ەم دە قاراستىرىلعان, – دەيدى بولىمشە مەڭگەرۋشىسى.
مۇندا اتالعان ەمحانادا تىركەلگەن 2 ايدان 18 جاسقا دەيىنگى جانە ودان ۇلكەندەر دە قارالادى. بولىمشە قىزمەتكەرلەرى كۇن سايىن تاڭەرتەڭگى ساعات 8.00-دەن 16.00-گە دەيىن جۇمىس ىستەيدى. جالپى قىزمەتتەردىڭ 60 پايىزى 18 جاسقا دەيىنگى بالالارعا كورسەتىلەدى. فيزيوتەراپەۆت قىزمەتى كۇنىنە 30-40 بالاعا كورسەتىلەدى. ماماندار ۇنەمى كاسىبي بىلىكتىلىگىن ارتتىرىپ وتىرادى. سونىمەن قاتار پەداگوگيكالىق وڭالتۋ, دەفەكتولوگ, لوگوپەد, پسيحولوگ, ەرگ تەراپەۆت, افك سياقتى ماماندار وڭالتۋ قىزمەتىنىڭ ەڭ باسىندا جۇرەدى. ولار كەلگەن ناۋقاستارعا پەداگوگيكالىق كوررەكتسيا, اۋتيزم, كەش سويلەگەن بالالار بويىنشا جۇمىستار جۇرگىزەدى. بىرقاتار اۋرۋلار ءۇشىن تۇزدى شاحتا قىزمەتى دە بار.
– جالپى ماماندار جەتكىلىكتى, دەگەنمەن فيزيوتەراپيا بويىنشا مەدبيكەلەر از. ال قالا بويىنشا رەابيليتولوگتار تاپشى. ىزدەر بولساڭ, تابۋ قيىن. ءبىزدىڭ بولىمشەدە ماماندار 85 پايىز جەتكىلىكتى. بالالار اراسىندا پسيحولوگيالىق سويلەۋ دامۋىنىڭ تەجەلۋى بويىنشا دياگنوز كوپ كەزدەسەدى. وسىنى ۇيرەتەتىن ماماندار جەتىسپەيدى. بولىمشەدە وسى سالالار بويىنشا مامانداردى ءوزىمىز وقىتىپ, قولدا بارمەن ۇلگەرىپ جاتىرمىز, – دەيدى دارىگەر.
سونىمەن قاتار وزدەرى كەلە المايتىن, وتە اۋىر جاعدايداعى, وزگە وڭالتۋ ورتالىقتارى قىزمەت كورسەتپەيتىن ناۋقاستاردىڭ ۇيىنە باراتىن ءموبيلدى بريگادالار دا بار. ولار كوبىنە بويىندا وتە اۋىر كاتەتەرى بار, نەسەپ جولدارى اۋرۋلارى بويىنشا وڭالتۋدى قاجەت ەتەتىن ناۋقاستاردى قاراپ, كۇنىنە 3-4 ۇيگە بارادى. بولىمشەنىڭ وسىنداي اۋقىمدى قىزمەت تۇرلەرىن كورسەتەتىن مەديتسينالىق پەرسونالىنىڭ كوبىنىڭ ەڭبەك ءوتىلى 16 جىلدان اسادى.
