استاناداعى قازاق ۇلتتىق ونەر ۋنيۆەرسيتەتىندە العىس ايتۋ كۇنىنە ارنالعان «شاتتىققا تولى شاڭىراق» اتتى مادەني شارا ءوتتى.
الدىمەن جينالعاندارعا مەرەيلى مەرەكەگە وراي ەل بىرلىگىن بەدەرلەگەن شاعىن بەينەبايان كورسەتىلدى. ودان كەيىن ۋنيۆەرسيتەت رەكتورى, قازاقستاننىڭ ەڭبەك ەرى ايمان مۇساقوجاەۆا ءسوز الدى.
– ءبىز بۇگىن ەلىمىز تاريحىندا تۇڭعىش رەت العىس ايتۋ كۇنى مەرەكەسىن اتاپ ءوتىپ وتىرمىز. بۇل – ەلىمىزدى مەكەندەگەن سان ءتۇرلى ۇلت وكىلدەرىن مەملەكەت قۇراۋشى قازاق حالقىنىڭ جانىنا توپتاستىرا تۇسەتىن كۇن. قازاق حالقىنىڭ دالاداي كەڭ پەيىلى, دارياداي شالقىعان كوڭىلى, تەڭىزدەي تەرەڭ دانالىعى, بايتەرەكتەي سايالى قۇشاعىنىڭ ارقاسىندا سان ءتۇرلى ەتنوس وكىلدەرى بۇگىندە ءبىر ءۇيدىڭ بالاسىنداي, ءبىر قولدىڭ سالاسىنداي تاتۋ-ءتاتتى ءومىر كەشىپ كەلەدى. دانا جۇرتىمىزدا: «ىرىس قايدا باراسىڭ, ىنتىماققا بارامىن» دەگەن قاناتتى ءسوز بار. بىرلىگى مەن تاتۋلىعى جاراسقان قازاقستان حالقىنىڭ الار اسۋى مەن جەتەر جەڭىستەرى مول بولعاي, – دەدى ول اقجارما كوڭىلىن ءبىلدىرىپ.
ايتۋلى شارا سوڭى اسەم كونتسەرتكە ۇلاستى. «ايگولەك» سكريپكاشىلار ءانسامبلى تاماشا سازدى شىعارما ورىندادى. مۋزىكالىق كوللەدجدىڭ 2-كۋرس ستۋدەنتتەرى «دجوتتو» اتتى گرۋزين ءبيىن كەلىستىرە بيلەدى. ايگىلى كومپوزيتور نۇرعيسا تىلەنديەۆتىڭ «تۋعان جەر» ءانىن «يليگاي» حورى تامىلجىتىپ شىرقادى. اتالعان وقۋ ورداسىنىڭ ونەرپازدارى جاندوس يمانباي بالۋان شولاقتىڭ ءانى «عاليانى» مايرا جالعاسوۆا حالىق ءانى «سمەتتى» ورىنداعاندا تىڭدارمانداردىڭ دەلەبەسى قوزدى. حورەوگرافيا فاكۋلتەتىنىڭ ستۋدەنتتەرى «دوستىق» ءبيىن بيلەپ, بىرلىك پەن تاتۋلىقتىڭ ادەمى كورىنىسىن كورسەتتى. قىسقاسى, مەرەكەگە جينالعان قاۋىم ادەمى اسەرگە بولەنىپ, ەرەكشە كوڭىل-كۇيدە بولدى.
astana-akshamy.kz
