كۇنتىزبە پاراقشاسىندا 3 ناۋرىز بولسا دا, استاناعا كوكتەم كەش كەلەتىنى بارشاعا ءمالىم. دەگەنمەن, بيىلعى كوكتەمنىڭ جىلداعىدان ەرتە كەلگەنى كوپشىلىكتىڭ كوڭىلىن جايلاندىردى. بۇل مەزگىلدىڭ جارشىسى بولىپ ەسەپتەلەتىن گۇلدەر ءالى ءبۇر جارا باستاعان جوق. ال ولاردىڭ تىرشىلىگىن ۇزارتۋ ءادىسىن كەيىپكەرىمىز الەكساندرا بىلەدى. استانالىق ارۋ ءتىرى گۇلدەردى ادەمى ناقىشتالعان اشەكەيلەرىنە ەنگىزەدى.
ءتىرى گۇلدەن اشەكەي بۇيىمدار جاساۋ – الەمدە زور تانىمالدىلىققا يە. شەبەرلەر اۋەستەنىپ جۇرگەن بۇل جاڭا باعىت ءبىزدىڭ ەلگە ەندى تانىلىپ جاتىر. وسى يدەياسى العاش قالاي تۋىنداعانىن الەكساندرانىڭ وزىنەن سۇرادىق. «ۇزىلگەن گۇلدى ەشقاشان ۇناتپايتىنمىن. بولاشاق كۇيەۋىممەن كەزدەسىپ جۇرگەندە دە, وعان گۇل شوعىن ساتىپ الما دەپ ەسكەرتەتىنمىن. ءبىر-ەكى كۇن عانا ادەمى بولىپ, ءبىرازدان كەيىن سولىپ قالادى. ولاردى ءتىرى اعزا رەتىندە قابىلدايمىن, جانىم اشيدى. سوندىقتان دا, ءار قىزدىڭ اجارىن اشاتىن بۇيىمداردى جاساۋعا بەل بۋدىم» دەدى ول اعىنان جارىلىپ.
الەكساندرا وسىدان ءۇش جىل بۇرىن پوليمەرلىك قىشتان جاسالاتىن اشەكەيلەرگە قىزىعۋشىلىق تانىتتى. ءتىرى گۇلدەردى كەپتىرىپ, ونىڭ بەتىن قاپتاۋ ءۇشىن ەپوكسيدتى شايىرمەن جۇمىس ىستەي باستادى. بۇل ءىستىڭ دە وزىندىك تەحنيكاسى مەن قيىندىقتارى بار بولىپ شىقتى. شايىر حيميالىق قوسپا بولعاندىقتان, العاشىندا گۇلدەر توتىعۋ رەاكتسياسىنا ۇشىراپ, تابيعي ءتۇسىنىڭ قانىقتىعىنان ايىرىلاتىن. ءتىپتى, گۇل دايىن بۇيىمدا ىشتەي ءشىرىپ كەتەتىن. ۇزاق ىزدەنىستەردەن كەيىن ماتەريالدى رەسەيدەن تاپتى. ساپا مەن باعا جاعىنان ەڭ وڭتايلىسى سول. گۇلدەر قاز-قالپىندا ساقتالاتىن بولدى. تەك قانىق ءتۇسى كەپتىرۋ بارىسىندا ءبىراز جوعالادى. وسىمدىكتى دۇرىس كەپتىرۋ اسا ماڭىزدى. كىتاپتىڭ اراسىنا سالىپ قويساڭىز, جاپىراقشالار جالپاق بولىپ قالادى. ال ىسمەرگە كەرەگى, ولاردىڭ تابيعي كولەمىنىڭ ساقتالۋى. بۇل ءىس توزىمدىلىكتى قاجەت ەتەدى, سەبەبى گۇل كەپتىرۋ ءبىر ايداي ۋاقىتتى الادى.
كەپتىرىلگەن گۇلدەردىڭ بارلىعى ءوز ءتۇسىن جوعالتپايدى دەپ ايتۋ قيىن. بۇرىن-سوڭدى جۇمىستا قولدانىلماعان گۇلدەر الدىن الا تەكسەرىلەدى. مايدى قۇيعاننان كەيىن وزگەرىسكە ۇشىراماسا, جارامدى دەگەن ءسوز. الەكساندرانىڭ ايتۋىنشا, راۋشان گۇلى, تۇيمەداق, باقباق, شىعىس كلەماتيسىنىڭ كۇلتە جاپىراقشالارى كەپتىرۋگە ىڭعايلى. بۇل تۇرعىدان كەلگەندە, مىنەز تانىتاتىن گۇلدەر از ەمەس. ماسەلەن, يريس گۇلى مۇلدەم كەپتىرىلمەيدى. شەگىرگۇل سياقتى كىشكەنتاي نازىك گۇلدى كەسسەڭ, لەزدە جيىرىلىپ قالادى. سوندىقتان, ولارعا اسا ۇقىپتىلىقپەن قاراۋ كەرەك. ال دۇكەندەگى ەكزوتيكالىق گۇلدەر سولمايدى. سەبەبى, وسىمدىكتىڭ ءسولى حيميالىق قۇراممەن الماستىرىلعان.
الەكساندرا – ماماندىعى بويىنشا ينتەرەر ديزاينەرى. شاڭ-توزاڭعا تولى قۇرىلىس نىساندارىن باقىلاۋدان, جوندەۋ جۇمىستارىنان جالىققان كەزدە, وسى ەرمەگىنە ورالادى.
– بۇل انامنان دارىعان ونەر دەپ بىلەم. ول كىسى – ينجەنەر-قۇرىلىسشى, الايدا ءىس تىگىپ, توقىما توقيدى.
بالالىقپەن جاساعان باستامالارىمدى وتباسىم ءاردايىم قولدايتىن. كىشكەنتاي كەزىمنەن ءتۇرلى ءۇيىرمەلەرگە قاتىستىم. ماحامبەت وتەمىسۇلى اتىنداعى وقۋشىلار سارايىندا مەنى بارلىق وقىتۋشىلار تانيتىن. قىشتان مۇسىندەۋ, ماكرامە, ەكيبانا, بيسەرمەن توقۋ, كيىم ءپىشۋ مەن تىگۋدى سپورتپەن بىرگە قوسا الىپ ءجۇردىم. 9-سىنىپتا قانداي ىسپەن شۇعىلدانعىم كەلەتىنىن ءتۇسىندىم. مەكتەپتى ءتامامداپ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ساۋلەت-قۇرىلىس فاكۋلتەتىنە باردىم, – دەيدى ا.شەۆچەنكو.
الەكساندرا جاساعان بۇيىمدار كوزدىڭ جاۋىن الادى. اشەكەيلەر ءاربىر قىزدىڭ جەكە دارالىعىن تانىتادى. ەڭ باستىسى, كوكتەمنىڭ ءبىر بولشەگى قىراۋلاتقان قىستا دا سىزبەن بىرگە بولادى.
گۇلدانا تالعاتقىزى, astana-akshamy.kz
