استانا تەاترلارىندا حالىقارالىق تەاتر كۇنىنە وراي بىرقاتار ءىس-شارا ءوتتى. اتاپ ايتقاندا, «جاستار» تەاترىندا جاس سۋرەتشى توعجان تىلەۋبەكقىزىنىڭ اتالمىش تەاتر اكتەرى, «دارىن» مەملەكەتتىك جاستار سىيلىعى مەن مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى ءادىل احمەتوۆتىڭ شىعارماشىلىعىنا ارنالعان «سويلە, سۋرەت» كورمەسى ءوتىپ, «جانارىمداعى جالعىز اۋەن» سپەكتاكلى ۇسىنىلدى. مۋزىكالىق جاس كورەرمەن تەاترىندا «تەاتر الەمى» كونتسەرت قويىلىمى كورسەتىلىپ, قازاقستان تەاترلار اسسوتسياتسياسىنىڭ العىس حاتتارى تاپسىرىلدى.
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما
تەاترىندا «قاللەكي تىنىسى» اتتى سپەكتاكلدەر شەرۋىنىڭ قورىتىندىسى شىعارىلىپ, ۇزدىكتەر انىقتالدى. ساراپشىلار شەشىمىمەن «ۇزدىك سپەكتاكل» نوميناتسياسىن «بايان سۇلۋ-قوزى كورپەش» سپەكتاكلى يەلەندى. «ۇزدىك ەر ادام ءرولى» اسىلبەك قاپاەۆقا («جوشى حان» سپەكتاكلىندەگى شىڭعىس حان ءرولى ءۇشىن) بۇيىرسا, «ۇزدىك ايەل ءرولىن» اينۇر جەتپىسباەۆا
(«بايان سۇلۋ-قوزى كورپەش» سپەكتاكلىندەگى كۇنىكەي ءرولى ءۇشىن) يەلەندى. سونىمەن قاتار «ەكىنشى پلانداعى ۇزدىك ەر ادام ءرولىن» نۇرسۇلتان ەسەن («بالا مەرگەن» ەرتەگىسىندەگى تورتقۇلاق حان ءرولى ءۇشىن) قانجىعالاسا, «ەكىنشى پلانداعى ۇزدىك ايەل ءرولىن» بەگىمنۇر قاليلا («بايان سۇلۋ-قوزى كورپەش» سپەكتاكلىندەگى تاڭسىق ءرولى ءۇشىن) الدى.
كورەرمەن تاڭداۋى بويىنشا «ۇزدىك اكتەر» – قايىرجان سادىق, «ۇزدىك اكتريسا» – اقمارال تاناباەۆا, «ۇزدىك سپەكتاكل» – جوشى حان سپەكتاكلى. مەرەكەلىك كونتسەرت بارىسىندا تەاتر ونەرىنىڭ دامۋىنا سۇبەلى ۇلەس قوسىپ كەلە جاتقان بىرقاتار اكتەر مەن ۇجىم قىزمەتكەرىنە, ۇزدىك كورەرمەن مەن تەاتر ناسيحاتىنا ۇلەس قوسقان جۋرناليستەرگە العىس حات تابىس ەتىلدى.
