وسىدان بىرنەشە كۇن بۇرىن الەۋمەتتىك جەلى ارقىلى ەلورداداعى قوعامدىق كولىكتەردە تولەم كارتاسىنان ەكى ەسە قاراجات الىناتىنى تۋرالى اقپارات تاراعان. وسىعان وراي «Astana LRT» جشس ءباسپاسوز جيىنىن وتكىزىپ, ءتيىستى جاۋاپ بەردى.
ءىس-شارا كەزىندە اتالعان مەكەمەنىڭ تولەم جۇيەسى دەپارتامەنتىنىڭ ديرەكتورى داۋرەن نۇراليەۆ ارنايى ۆاليداتور ارقىلى كارتاسىمەن تولەم جاساپ, وسى ارقىلى الەۋمەتتىك جەلىلەردە تاراعان اقپاراتتىڭ شىندىققا جاناسپايتىنىن كورسەتتى.
جيىن بارىسىندا «Astana LRT» جشس باسقارما توراعاسى بەكمىرزا يگەنبەردينوۆ كولىك كارتاسىن Android قوسىمشاسىمەن تولتىرۋدىڭ جاڭا ادىستەمەسىن تانىستىردى. قوسىمشا ارقىلى كارتادا قانشا سوما قالعانىن دا بىلۋگە بولادى. ازىرگە بۇل وزگەرىس جەتىلدىرىلۋ ۇستىندە. باسقارما توراعاسىنىڭ ايتۋىنشا, بۇل جۇيە جاقىن ۋاقىتتا قولدانىسقا ەنگىزىلەتىن بولادى.
بۇعان قوسا ول وسى ءادىس ارقىلى كولىك كارتالارىن تولتىراتىن جاڭا اۆتوماتتاردى ساتىپ الۋ ماسەلەسى شەشىلەتىنىن ايتىپ ءوتتى.
– قازىر بۇل جۇيە سىناقتان وتكىزىلۋدە. ءبىر جارىم ايدىڭ ىشىندە جۇيەنى ىسكە قوسىپ, شىعىنداردان قۇتىلۋدى جوسپارلاپ وتىرمىز. استانادا 30 LRT-اۆتومات پەن 6 كاسسا جۇمىس ىستەيدى. بىراق ونىڭ ءبارى ازدىق ەتەتىنى راس. ال جۇرت QIWI ارقىلى اقى تولەگىسى كەلمەيدى, – دەدى بەكمىرزا يگەنبەردينوۆ.
بۇدان وزگە «Astana LRT» تاراپىنان اتقارىلىپ جاتقان جۇمىستار دا تانىستىرىلدى. داۋرەن نۇراليەۆ ەلوردالىقتاردىڭ ەندى كولىك كارتاسىنىڭ ورنىنا ءتۇرلى بىلەزىكتەر قولدانىلاتىنىن ءمالىم ەتتى.
– قازىر حالىقتىڭ باسىم بولىگى قوعامدىق كولىكتەردە جولاقىسىن كارتامەن تولەيدى. بىراق سۇرانىسقا وراي جاستاردىڭ دا قىزىعۋشىلىعىن نازارعا الىپ وتىرمىز. ەندى ىشىندە ءچيپى بار ارنايى ازىرلەنگەن بىلەزىكتەر ارقىلى دا تولەم جاساۋعا بولادى, – دەدى ول.
ءسوز اراسىندا ول جاڭا بىلەزىكتەر جىل سوڭىنا دەيىن قاناتقاقتى جوبا رەتىندە شىعارىلاتىنىن ايتتى.
