2022 جىلدىڭ قاڭتار ايىنان باستاپ 1-سىنىپ وقۋشىلارىنا «تسيفرلىق ساۋاتتىلىق» ءپانى ەنگىزىلەدى. بۇعان دەيىن وقۋشىلار 3-سىنىپتان باستاپ «اقپاراتتىق-كوممۋنيكاتسيالىق تەحنولوگيالار» ءپانىن وقىعان بولاتىن.
– وقۋ باعدارلاماسى سۇرانىس پەن ۋاقىت تالاپتارىنا سايكەس بولۋى ءتيىس. بۇگىنگى تاڭدا تسيفرلىق الەمنىڭ قارقىندى دامىپ جاتقانىن كورىپ وتىرمىز. قازىر سمارتفوندار مەن كومپيۋتەرلەردى مەكتەپكە دەيىنگى كىشى جاستاعى بالالار پايدالانىپ جاتادى. تسيفرلىق ساۋاتتىلىق – وقۋ مەن جازۋ سياقتى نەگىزگى داعدىلاردىڭ بىرىنە اينالىپ كەلەدى. سوندىقتان بالالاردى تسيفرلىق ساۋاتتىلىق جانە اقپاراتتىق قاۋىپسىزدىك نەگىزدەرىنە مۇمكىندىگىنشە ەرتەرەك ۇيرەتۋ ماڭىزدى. البەتتە, جاڭا ءپاندى وقىتۋ بارىسىندا بالالاردىڭ جاس ەرەكشەلىكتەرى دە ەسكەرىلەتىن بولادى, – دەپ اتاپ ءوتتى مەكتەپكە دەيىنگى جانە ورتا ءبىلىم كوميتەتىنىڭ توراعاسى گۇلميرا كارىموۆا.
سونىمەن قاتار 4-سىنىپقا ارنالعان «اقپاراتتىق-كوممۋنيكاتسيالىق تەحنولوگيالار» جانە 5-11-سىنىپتارعا ارنالعان «ينفورماتيكا» پاندەرى بويىنشا وقۋ باعدارلامالارى قايتا قارالدى. جاڭاشىلدىقتار بالالاردىڭ اقپاراتتىق تەحنولوگيالار سالاسىندا ساپالى ءبىلىم الۋىنا باعىتتالعان. مەكتەپ باعدارلاماسى شەڭبەرىندە ەڭ تانىمال Python باعدارلامالاۋ ءتىلى وقىتىلادى. سونداي-اق 5-9-سىنىپ وقۋشىلارى 3D-مودەلدەۋ مەن 3D-پرينتينگ بويىنشا ءبىلىم الادى. 10-11-سىنىپتارداعى «ينفورماتيكا» ءپانى بويىنشا ۇلگىلىك وقۋ باعدارلاماسى IT-سالاسىنىڭ زاماناۋي دامۋ ۇردىستەرىن ەسكەرە وتىرىپ ازىرلەنگەن. وقىتۋ باعدارلاماسىندا IT-STARTUP, ۆيرتۋالدى جانە تولىقتىرىلعان شىنايىلىق, جاساندى ينتەللەكت, ءموبيلدى قوسىمشالاردى ازىرلەۋ, BigData جانە تاعى باسقا تاقىرىپتار بار. سونداي-اق بارلىق سىنىپتىڭ وقۋ باعدارلامالارىنا ينتەرنەت جەلىسىندەگى قاۋىپسىزدىك ەرەجەلەرى, اۆتورلىق قۇقىق تۋرالى تاقىرىپتار ەنگىزىلگەن.
