سەناتتىڭ جالپى وتىرىسىندا دەپۋتات نۇرتورە ءجۇسىپ ۇكىمەتكە جولداعان دەپۋتاتتىق ساۋالىندا جول قاۋىپسىزدىگى ماسەلەسىن كوتەرىپ, ەلەكتروساموكاتتاردىڭ قاۋىپسىز پايدالانۋ ءتارتىبىن رەتتەۋدى تالاپ ەتتى.
رەسمي دەرەكتەر بويىنشا بيىلعى 8 اي ىشىندە وسىنداي قوزعالىس قۇرالدارىنىڭ كەسىرىنەن 387 وقيعا تىركەلىپ, ناتيجەسىندە 25 ادام قازا تاپتى, ال 411 ازامات جاراقات العان.
– جول ءجۇرىسى تۋرالى زاڭنىڭ 64-بابىنا سايكەس, وسى قۇرىلعىلار ۋاكىلەتتى ورگاندا مەملەكەتتىك تىركەۋگە جاتپايدى. سوندا قالاي بولعانى؟ جىلدامدىعى اۆتوكولىك جىلدامدىعىمەن پارا-پار, كەيدە ساعاتىنا 60 شاقىرىمنان اساتىن ەلەكتروساموكاتتار ەشقانداي كولىك ساناتىنا جاتپاي ما؟ قازىرگى ۋاقىتتا نورماتيۆتىك اكتىلەردە وسى تيپتەگى قۇرىلعىلاردىڭ جىكتەۋى جوق, – دەپ اتاپ كورسەتتى ن.ءجۇسىپ. ايتا كەتۋ كەرەك, بىلتىر ءماجىلىس دەپۋتاتتارى ەلەكتروساموكاتتارعا شەكتەۋ قويۋدى ورىنسىز دەپ ەسەپتەپ, ولاردى ۆەلوسيپەد جولدارىندا عانا جۇرۋگە مىندەتتەيتىن زاڭ جوباسىن قابىلداماي تاستاعان. اتالمىش زاڭ جوباسىندا ميكروموبيلدى كولىك جۇرگىزۋشىلەرىنە ۆەلوسيپەد جولدارى مەن ۆەلوسيپەد جولاقتارىن قوسپاعاندا, جولدا, تروتۋارلاردا, جاياۋ جۇرگىنشىلەر وتكەلدەرىندە جانە جولداردا قوزعالۋعا تىيىم سالۋ ۇسىنىلعان. دەپۋتات يرينا سميرنوۆا ولاردى ۆەلوسيپەد جولدارىندا عانا جۇرۋگە مىندەتتەيتىن زاڭ جوباسىن قابىلداماۋ سەبەبىن ۆەلوجولداردىڭ ازدىعىمەن تۇسىندىرگەن. جالپى تەحنيكالىق قۇرالدار تەز دامىپ جاتقان كەزدە زاڭدار قانشالىقتى جىلدام بەيىمدەلىپ جاتىر؟ ماسەلەن, ۇلىبريتانيادا جەكەلەگەن اۋماقتان باسقا جەرلەردە ساموكاتتاردى پايدالانۋعا تىيىم سالىنعان. ماسكەۋدە ادامدار كوپ شوعىرلانعان جەرلەردە جالعا الاتىن ساموكاتتاردىڭ ءجۇرۋ جىلدامدىعى ساعاتىنا 15 شاقىرىمعا دەيىن شەكتەلگەن.
