قازاقستان پرەزيدەنتى قاسىم-جومارت توقاەۆتىڭ توراعالىعىمەن ەكونوميكالىق ماسەلەلەر جونىندە كەڭەس ءوتتى.
جيىن بارىسىندا ەلدىڭ الەۋمەتتىك-ەكونوميكالىق دامۋىنىڭ قورىتىندىلارى مەن جوسپارلانعان مەجەنىڭ ورىندالۋى, قارجى-نەسيەلىك ساياساتتى جۇزەگە اسىرۋ, اتاۋلى الەۋمەتتىك كومەك رەفورماسى, الەۋمەتتىك دامۋ جانە جۇمىسپەن قامتۋ ماسەلەلەرى قارالدى. پرەمەر-مينيستر اسقار مامين, ۇلتتىق بانك توراعاسى ەربولات دوساەۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ بايانداما جاسادى.
قاسىم-جومارت توقاەۆتىڭ ايتۋىنشا, جالپى ەلدەگى ماكروەكونوميكالىق جاعداي تۇراقتى, قازاقستاننىڭ الەۋمەتتىك-ەكونوميكالىق دامۋ كورسەتكىشتەرىنىڭ ديناميكاسى وڭ ناتيجە كورسەتىپ تۇر. الايدا وتاندىق ەكونوميكانى ءارتاراپتاندىرۋ, جۇمىسپەن قامتۋ, حالىقتىڭ تابىسىن ارتتىرۋ, الەۋمەتتىك كومەكتەردىڭ قولجەتىمدىگى سەكىلدى ماسەلەلەر ءالى كۇنگە تولىق شەشىمىن تاپقان جوق.
مەملەكەت باسشىسىنىڭ ءپىكىرىنشە, ستراتەگيالىق باعدارلامالاردى ساپالى جۇزەگە اسىرۋدىڭ نەگىزگى مىندەتى – حالىقتىڭ ءومىر ءسۇرۋ دەڭگەيىن ارتتىرعاندا عانا ورىندالادى.
پرەزيدەنت الەمدەگى ءارتۇرلى جاعدايلاردى ەسكەرە وتىرىپ, ناقتى ەسەپتەلگەن, ەلدىڭ ماكروەكونوميكالىق, قارجىلىق جانە الەۋمەتتىك تۇراقتىلىعىن ساقتاۋ جونىندە كەشەندى شارالار ازىرلەۋدى تاپسىردى. سونىمەن قاتار «قازاقستان-2050» ستراتەگياسىنىڭ قازىرگى كەزەڭدە ىسكە اسۋى ءتيىس مىندەتتەمەلەرىن ورىنداۋ قاجەت ەكەنىن ايتتى.
پرەزيدەنت مەملەكەتتىك شەشىمدەر قابىلداعاندا ساراپتامالىق جۇمىستاردى تۇبەگەيلى كۇشەيتۋ كەرەك ەكەنىن اتاپ ءوتتى.
پرەزيدەنت شاعىن جانە ورتا بيزنەس ەكونوميكانى ءارتاراپتاندىرۋ ىسىندە تىرەك كۇشكە اينالۋ كەرەك دەپ سانايدى. مەملەكەت باسشىسى يندۋستريالاندىرۋ باعدارلاماسى ونەركاسىپ ءوندىرىسى مەن وڭدەۋ سەكتورىنداعى قۇلدىراۋدى توقتاتىپ, جاڭا ونىمدەردى شىعارۋعا مۇمكىندىك اشقانىمەن, ەكونوميكا سالاسىندا تۇپكىلىكتى سەرپىلىس بولعان جوق دەپ ەسەپتەيدى.
مەملەكەت باسشىسى وڭىرلىك دەڭگەيدە باسەكەگە قابىلەتتى تەحنولوگيالىق دامىعان ەڭ كەمىندە 3-5 سالانى قالىپتاستىرۋ كەرەك ەكەنىن ايتتى.
سونىمەن قاتار قاسىم-جومارت توقاەۆ ەلىمىزدىڭ بۇكىل وڭىرلەرىندە ءونىمدى سورەلەرگە دەيىن جەتكىزۋدىڭ تەتىكتەرىن دامىتۋدى قامتاماسىز ەتۋدى, سونداي-اق ەكونوميكانىڭ بارلىق سالالارىندا ۇلتتىق تاۋارلاردى جەتكىزۋ جۇيەسىن قالىپتاستىرىپ, ونى دامىتۋ ءۇشىن كەشەندى قادامدار جاساۋدى تاپسىردى.
پرەزيدەنت 2030 جىلعا دەيىنگى اقشا-كرەديتتىك ساياسات ستراتەگياسىن جاساۋدى تاپسىردى. قاسىم-جومارت توقاەۆ ۇلتتىق بانكتى كوممۋنيكاتسيا مەن اقپاراتتىق-ءتۇسىندىرۋ جۇمىستارىن جاقسارتۋعا شاقىردى. بۇل ءوز كەزەگىندە نارىققا قاتىناسۋشىلار مەن تۇرعىنداردىڭ سەنىمىن ارتتىرىپ, دەۆالۆاتسيا جايىنداعى داقپىرتتاردىڭ الدىن الادى.
مەملەكەت باسشىسى بىرىڭعاي تۇرعىن ءۇي ساياساتىن ىسكە اسىرۋ ماسەلەسىن دە نازاردان تىس قالدىرعان جوق.
– ءاربىر قازاقستاندىق ازامات باسپانانى ساتىپ نەمەسە ارەنداعا الۋ پەرسپەكتيۆاسىن, ونى ساتىپ الۋ شارتتارىن انىق ءتۇسىنۋى كەرەك. ول ءۇشىن تۇرعىن ءۇيدىڭ قولجەتىمدىلىك ولشەمدەرىن انىقتاپ, قۇرىلىستىڭ وزىندىك قۇنىن جۇيەلى تۇردە تومەندەتىپ, كوپپاتەرلى جانە جەكە باسپانانىڭ اراجىگىن اجىراتىپ, پاتەردى جالعا بەرۋ نارىعىن رەتتەۋ قاجەت, – دەدى قاسىم- جومارت توقاەۆ.
