بۇل تۋرالى اقپارات جانە قوعامدىق دامۋ مينيسترلىگى حابارلادى. قازاقستاندىقتار تۇركيادا زارداپ شەككەن ازاماتتارعا گۋمانيتارلىق كومەك جىبەرۋدى جالعاستىرىپ جاتىر.
«ەلىمىزدىڭ بارلىق وڭىرلەرىندە قاجەتتى زاتتاردى قابىلداۋ جانە سۇرىپتاۋ پۋنكتتەرى ۇيىمداستىرىلعان. بەلسەندى ازاماتتار, ۆولونتەرلەر كومەك ەسەبىن جۇرگىزەدى, بارلىق جينالعان زاتتاردى سۇرىپتايدى, ورايدى. جينالعان ماتەريالدار اۆتوكولىكپەن تۇركيا رەسپۋبليكاسىنىڭ ەلشىلىكتەرى مەن كونسۋلدىقتارىنا جەتكىزىلەدى» دەلىنگەن مينيسترلىكتىڭ حابارلاماسىندا.
قۇزىرلى ۆەدومستۆونىڭ ءباسپاسوز قىزمەتى تاراتقان اقپاراتقا سۇيەنسەك, 13 اقپانداعى جاعداي بويىنشا وڭىرلەردە 115 توننا گۋمانيتارلىق كومەك جينالدى (الماتى ق. – 4 ت., الماتى وبلىسى – 68 ت., تۇركىستان وبلىسى – 25 ت., شىمكەنت – 50 ت., اقمولا, باتىس قازاقستان, قاراعاندى, پاۆلودار, سولتۇستىك قازاقستان, شىعىس قازاقستان, ۇلىتاۋ وبلىستارى – 3 ت.), ونىڭ 75 تونناسى (تۇركىستان وبلىسى جانە شىمكەنت قالاسى) تۇركياعا جىبەرىلدى, سونداي-اق 32 ملن تەڭگە جينالىپ, تىكەلەي Afad قورىنا اۋدارىلدى.
«بۇعان قوسا, قازاقستاندىقتار 114 ۇلتتىق كيىز ءۇي جونەلتتى. يگىلىكتى ىسكە جالپى حالىق جۇمىلا ءۇن قوسىپ جاتىر. ماسەلەن, جاس كاسىپكەر ءارى بلوگەر اسحات نۇرلىباەۆ پەن ايدوس شايحيسلام Instagram پاراقشاسىندا كومەك ۇيىمداستىرۋ بويىنشا بەلسەندىلىك تانىتسا, جامبىل وبلىسىندا ۆولونتەرلەر 17 فۋرا كومەك جيناپ, الماتى كونسۋلدىعىنا جىبەرۋدى جوسپارلاۋدا. ءوز كەزەگىدە ۇلتتىق ۆولونتەرلەر جەلىسى مەن قازاقستانداعى قىزىل جارتى-اي قوعامى ايتارلىقتاي جۇمىستار ۇيىمداستىرۋدا. ۆولونتەرلەر كومەك كورسەتۋ بويىنشا جۇمىستىڭ ءبىرىنشى كەزەڭى اياقتالىپ قالدى» دەلىنگەن رەسمي اقپاراتتا. بارلىق جۇمىستار قازاقستانداعى تۇرىك رەسپۋبليكاسىنىڭ ەلشىلىگىمەن بىرلەسىپ جۇرگىزىلۋدە.
