قالا باسشىسى جەڭىس قاسىمبەك بايقوڭىر اۋدانىنداعى پروبلەمالى نىسانداردى ارالاپ, ەلدى مەكەندەردىڭ تۇرعىندارىمەن كەزدەستى. تۇرعىندار تاراپىنان اپاتتى مەكتەپتەر, ۇيلەر, جوعارى كەرنەۋلى ەلەكتر جەلىلەرىنىڭ استىندا قالعان باسپانالار ماسەلەسىن كوتەردى. اكىم ءاربىر ماسەلەنىڭ رەت-رەتىمەن وڭ شەشىلەتىنىن جەتكىزدى.
ماسەلەن, «كيرپيچنىي» ەلدى مەكەنىنىڭ تۇرعىندارى كوكسەڭگىر كوشەسىندەگى اپاتتى مەكتەپتىڭ قۇرىلىسى قاڭتارىلىپ قالعانىن ايتتى. «كيرپيچنىي» ەلدى مەكەنىنىڭ تۇرعىندارى №12 مەكتەپتىڭ (كوكسەڭگىر كوشەسى) پروبلەماسىن كوتەردى. بۇل مەكتەپ وسىعان دەيىن اپاتتى دەپ تانىلىپ ءارى پايدالانۋعا جارامسىز بولعانى ءۇشىن بۇزىلعان. بىراق جاڭا عيماراتتىڭ قۇرىلىسى توقتاپ قالدى دەۋگە بولادى. ال جوسىقسىز مەردىگەرمەن كەلىسىمشارت بۇزىلدى. ءبىلىم وشاعىنىڭ قۇرىلىسىن بيىل اياقتاۋدى تاپسىردىم» دەدى جەڭىس قاسىمبەك.
ال چەحوەۆ كوشەسىنىڭ تۇرعىندارى باراك تيپىندەگى ۇيلەردە كارىز جۇيەسىنىڭ جۇمىس ىستەمەيتىنىن جەتكىزدى. «چەحوەۆ كوشەسىندەگى 3,1 ۇيلەر اپاتتى دەپ تانىلعان. تۇرعىندار باراك تيپىندەگى ۇيلەردە كارىز جۇيەسىنىڭ جۇمىس ىستەمەيتىنىن العا تارتتى. بۇل ۇيلەردىڭ ءبىر بولىگىن 2024 جىلى بۇزىلاتىن نىساندار تىزىمىنە ەنگىزەمىز. سونداي-اق وزگە دە اپاتتى ۇيلەر بويىنشا ءتىزىمدى جاڭارتامىز» دەپ ءتۇسىندىردى قالا باسشىسى.
جەڭىس قاسىمبەك بايقوڭىر اۋدانىنىڭ تاعى ءبىر تۇيتكىلدى پروبلەماسى – جوعارى كەرنەۋلى ەلەكتر قۋاتى جەلىلەرىنىڭ استىندا ورنالاسقان ۇيلەردى بۇزۋ ەكەندىگىن ايتتى. «بۇل – ءبيشى قايىڭ (كۇلتەگىن), اسان قايعى, سىرداريا, لەرمونتوۆ كوشەلەرىندە ورنالاسقان ۇيلەر. وتكەن جىلى وسى ۇيلەردىڭ ءبىر بولىگى ساتىپ الىنعان بولاتىن. بيىل دا جۇيەلى تۇردە ۋچاسكەلەردى ساتىپ الۋ, ۇيلەردى بۇزۋ جۇمىسىن جالعاستىرامىز. وسىلايشا, تۇرعىندار ۇزاق جىلداردان كەيىن وزگە ورىندارعا كوشىپ, دەنساۋلىعىنا الاڭدامايتىن بولادى. جەكە سەكتوردىڭ ورنىنا الەۋمەتتىك نىساندار, تۇرعىن ءۇي كەشەندەرى, قوعامدىق كەڭىستىكتەر سالىنادى. اسان قايعى كوشەسىنىڭ بويىمەن ينجەنەرلىك جەلىلەرمەن ء(ۋاليحانوۆ كوشەسىمەن قاتار) جول سالۋ جوسپارلانىپ وتىر» دەدى اكىم.
