كۇن رايى سالقىن تارتقاننان دەنە قىزۋى كوتەرىلىپ, تۇماۋعا شالدىعاتىنداردىڭ قاتارى جيىلەپ كەتەتىنى بار. ال استانا قىسى قاھارىن ەرتە بايقاتادى. اۋىرىپ, ەمدەلگەننەن, اۋىرماۋدىڭ جولىن ىزدەگەن الدەقايدا تيىمدىرەك. وسى ورايدا مەملەكەتتىك سانيتارلىق-ەپيدەميولوگيالىق قاداعالاۋ كوميتەتى استانا قالاسى بويىنشا دەپارتامەنتىنىڭ ديرەكتورى سارحات بەيسەنوۆا ناقتى شارالاردىڭ باستالعاندىعىن اڭگىمەلەدى.
– سارحات ساعىنتايقىزى, تۇماۋ كوپ تارايتىن اۋرۋلاردىڭ ءبىرى. ونىڭ كوپ تارايتىن مەزگىلى قاي ايدا بايقالادى؟
– تىنىس جولدارىنىڭ جۇقپالى اۋرۋلارى قازان جانە قاراشا ايلارىندا قوزا تۇسەدى. جەلتوقساننىڭ سوڭىنا قاراي تۇماۋ ۆيرۋسىنىڭ تارالۋى باستالادى. سوندىقتان قىركۇيەك, قازان جانە قاراشا ايلارىندا ەكپە سالدىرۋ كەرەك. وسى ءۇش ايدىڭ ىشىندە كەز كەلگەن ۋاقىتتا ەكپە سالدىرۋعا بولادى. بىراق, يممۋنيتەتتىڭ قالىپتاسۋىنا ەكى اپتا قاجەت ەكەنىن دە ەستەن شىعارماعان ءجون.
– كوپشىلىگىمىز مۇندايعا سالعىرت قاراپ جاتامىز. بالكىم, ەلورداداعى مەكەمەلەر ەگۋدى ۇجىمدى تۇردە ۇيىمداستىرعان تيىمدىرەك بولار…
– البەتتە, ۆاكتسيناتسيا – تۇماۋعا قارسى ەڭ ءتيىمدى شارا. ەگىلگەن ۇجىمدا اۋرۋ ون ەسەگە تومەندەيدى. ەگەر ەگىلسەڭىز دە اۋىرىپ قالساڭىز, كلينيكالىق كەزەڭى جەڭىل وتەدى, اۋرۋدان تەز جازىلاسىز جانە اسقىنۋدىڭ الدىن الادى.
– بۇل بۇقارالىق شارا بولعاندىقتان تەگىن قىزمەت كورسەتىلە مە؟
– جوق, ەلىمىزدىڭ ۇلتتىق كۇنتىزبەسىنە كىرمەگەندىكتەن, حالىقتى ەگۋ جۇمىستارى اقىلى تۇردە وتەدى. قالادا 15 ەگۋ پۋنكتى ۇيىمداستىرىلعان – 8 قالالىق ەمحانا جانە 7 مەديتسينالىق ورتالىق.
– ماسەلەن, قاي نۇكتەلەردە؟
ماسەلەن, «ينتەرتيچ» (كەنەسارى كوشەسى №1, تەل: 51-53-00), «مەدلاين» (جانگەلدين كوشەسى №4, تەل: 44-34-54), «مەديكەر» (قابانباي باتىر داڭعىلى №17, تەل: 55-80-41), «Open Clinik» (وتىرار كوشەسى №8/2, تەل: 21-95-72), «فارماكوم» كفك جشس (مايلين كوشەسى №7/1, تەل: 35-07-16), «ينتەرتيچ استانا مەديتسينالىق اسسيستانس» (ماسكەۋ كوشەسى №38 ا, تەل: 53-96-18), «مەديكال اسسيستانس گرۋپپ» جشس (سىعاناق كوشەسى №21/1, تەل: 50-41-35) مەديتسينالىق پۋنكتەرى 17 قىركۇيەكتەن باستاپ ازاماتتاردى قابىلداي بەرەدى. اۋرۋعا قارسى يممۋنيتەتتىڭ قالىپتاسۋىنا ءبىر رەت ەگىلۋ جەتكىلىكتى.
