ەر ادامدارمەن يىق تىرەسە ەلدىڭ قاۋىپسىزدىگىن قورعاپ جۇرگەن ايەل ءتارتىپ ساقشىلارى از ەمەس. سولاردىڭ ىشىندە ەلوردانىڭ كورنەكى ورىندارىنىڭ ماڭايىنان تۋريستىك پوليتسيادا ىستەيتىن ەرەكشە جۇمىس كيىمىندەگى نازىك جانداردى دا كورىپ قالامىز. نۇر-سۇلتان قالاسى پوليتسيا دەپارتامەنتى پاترۋلدىك پوليتسيا پولكى تۋريستەرگە قىزمەت كورسەتۋ ۆزۆودىنىڭ قىزمەت اعا ينسپەكتورى, پوليتسيا اعا لەيتەنانتى قۇلپىناي تاڭىربەرگەن دە – سولاردىڭ قاتارىندا.
قازاقستاندا تۋريستىك پوليتسيا قىزمەتى «قر تۋريزم يندۋسترياسىن دامىتۋ» مەملەكەتتىك باعدارلاماسىن ىسكە اسىرۋ اياسىندا 2019 جىلى قۇرىلدى. سودان بەرى تۇركىستان, شىعىس قازاقستان, الماتى, سولتۇستىك قازاقستان وبلىستارى جانە ەلوردادا تۋريستىك پوليتسيا قىزمەتى اشىلدى. باس قالادا مۇنداي بەكەتتەر ەڭ ماڭىزدى 4 كورنەكى ورىن ماڭايىنا, اتاپ ايتقاندا, «بايتەرەك», «قازاق ەلى» مونۋمەنتتەرى, ەكسپو كورمەسى جانە «عاشىقتار» پاركى جانىنا قويىلعان. ەلوردا ۆزۆودىنداعى 18 پوليتسەيدىڭ جارتىسى – ايەلدەر. ولاردىڭ باسقا پوليتسەيلەردەن ارتىقشىلىعى – بىرنەشە شەتەل تىلدەرىن بىلەتىندىگى. سەبەبى ولاردىڭ باستى مىندەتى – ەلىمىزدە قالاي ءجۇرۋ ەرەجەلەرىن تۋريستەرگە, شەتەلدىك جانە ازاماتتىعى جوق ادامدارعا ءتۇسىندىرۋ, تۋريستىك وبەكت ايماعىندا شەتەلدىكتەرگە قاتىستى قۇقىقبۇزۋشىلىقتار انىقتالعان كەزدە سول تۋرالى اكت تولتىرىپ, جاقىن جەردەگى ىشكى ىستەر باسقارماسىنا جولداۋ, ولارعا كەڭەس بەرىپ, سانىنا ەسەپ جۇرگىزۋ. قۇلپىنايدىڭ ايتۋىنشا, تۋريستەر كورنەكى نىسانداردى كورۋگە جىلدىڭ بارلىق مەزگىلىندە كەلەدى, دەگەنمەن كۇن جىلىعاندا, اسىرەسە مامىر مەن قىركۇيەك ايلارى ارالىعىندا ولاردىڭ قاتارى كوبەيەدى.
– ولار كوبىنە توقتاعان قوناقۇيلەرىنە قالاي جەتۋ كەرەكتىگىن, باسقا كورنەكى ورىندارعا قالاي بارۋعا بولاتىنىن نەمەسە قازاقتىڭ ۇلتتىق تاعامدارىن قاي جەردەن جەۋگە بولاتىنىن سۇرايدى. نەگىزىنەن, تۇركيا, يتاليا ەلدەرىنىڭ جانە ت.ب. ەلدەر ازاماتتارى كەلىپ, اعىلشىن نەمەسە تۇرىك تىلىندە سۇراق قويادى. كۇنىنە كەم دەگەندە 2-3 ادام كەلەدى. تۋريستەر ەلوردانىڭ ادەمىلىگىن, قازاقتاردىڭ قوناقجاي ەكەنىن تامسانا ايتىپ كەتەدى, – دەيدى قۇلپىناي.
قۇقىق قورعاۋ ورگاندارى سالاسىندا 2015 جىلى ەڭبەك جولىن باستاعان قۇلپىناي ءۇشىن ءتىل ءبىلۋ اسا قيىندىق كەلتىرمەدى. سەبەبى العاشقى جوعارى ءبىلىم العان وقۋ ورنىندا تۇرىك-اعىلشىن تىلدەرىن تەرەڭدەتىپ وقىعان ەدى. ونىڭ ۇستىنە ول بارلىق ۆزۆودتاعىلارمەن بىرگە اعىلشىن تىلىنەن 3 ايلىق كۋرستى وقىپ, سەرتيفيكات الدى. اعىلشىن ءتىلىن «ەلەمەنتاري» دەڭگەيىنەن جوعارى بىلگەندەر تۋريستىك پوليتسياعا وتە الادى. ءتىل بىلۋدەن بولەك, ولار جۇمىستان تىس ۋاقىتتا كۇرەس جاۋىنگەرلىك تاسىلدەرىنەن جاتتىعۋعا ماشىقتانادى. ويتكەنى كەيدە قوعامدا ءتۇرلى كەلەڭسىزدىكتەر بولا قالعان جاعدايدا كەز كەلگەن قاۋىپ پەن قاتەرگە دايىن بولۋى كەرەك. بىراق قۇلپىنايدىڭ 7 جىلدىق تاجىريبەسىندە ومىرىنە قاۋىپ تونگەن وقيعالار كەزدەسپەگەن.
– تۇركيادان كەلگەن ەرلى-زايىپتىلار ەكسپو اۋماعىندا بالالارىن سىرعاناققا اكەلگەندە, ايەلى قاتتى قۇلاپ جاراقات العان, سونى جەدەل جاردەم شاقىرتىپ, اۋرۋحاناعا جەتكىزۋدە ءوزىم بىرگە ەرىپ ءجۇردىم. ويتكەنى ولاردىڭ جاعدايىن دارىگەرلەرگە تەز ءتۇسىندىرۋ كەرەك بولدى. بارلىق رەنتگەن, باسقا دا دارىگەرلەر تەكسەرۋى كەزىندە قاستارىنان تابىلدىم. سول ءۇشىن ارتىنان ماعان تۇركيا ەلشىلىگىنەن العىس حات جاريالاندى. بەكەتتە كوبىنە ءبىر ەر, ءبىر ايەل ادامنان تۇرامىز. ورتالىقپەن ۇنەمى راتسيا ارقىلى بايلانىسىپ وتىرامىز. كەۋدەمىزدە بەينەتىركەگىش ءىلىنىپ تۇرادى, سوعان بارلىق ءىس-ارەكەتىمىز جازىلىپ, تىركەلەدى. سوندىقتان ءوزىم ءسۇيىپ تاڭداعان قىزمەتىمنىڭ قيىندىعىنان قىزىعى باسىم, – دەيدى كەيىپكەرىمىز. تۇركىستاننان ەلورداعا كەلىپ, ەلىنىڭ عانا ەمەس, شەتەلدىكتەردىڭ دە قاۋىپسىزدىگى ءۇشىن قىزمەت ەتىپ جۇرگەن قۇلپىناي ماماندىعىمەن ماقتانادى.
