حالقىمىزدا ايەل ۇعىمى ءاردايىم ارداقتى. وشاقتىڭ جىلۋى, وتباسىنىڭ ۇيىتقىسى, ۇرپاقتى تاربيەلەۋشى سانالعان. قىزدى قوناق دەپ قۇرمەتتەپ, ءوز ۇيىنە ۇزاتقانعا دەيىن تورگە شىعارعان. بوي جەتكەندە سانىمەن, سالتاناتىمەن تەڭىنە قوسىپ, بارعان جەرىڭدە باعىڭ اشىلسىن دەپ باتاسىن بەرگەن. ءتىپتى قىزدىڭ بالاسى دەپ جيەنىن شەكەسىنەن شەرتپەگەن. ونىڭ قالاعان نارسەسىن بەرىپ, ەركەلەتكەن.
قازاقتىڭ تاريحىندا قانشاما ايەلدەردىڭ اتى التىن ارىپتەرمەن ادىپتەلگەن. ولار قوعامداعى ءوز ورنىن بىلە وتىرىپ, بايىپپەن ەل ىسىنە ارالاسقان. قاجەت جەرىندە ەرلەرمەن تىزە قوسىپ, قولىنا قارۋ العان. بالاسىنا بەسىك جىرىن ايتىپ, الديىمەن بالا جۇرەگىن ماحابباتقا تولتىرعان.
ءبىزدىڭ ءبىر ەرەكشەلىگىمىز اعا بۋىندى, ونىڭ الدىڭعى اتا-بابالاردى «اجەلەر ينستيتۋتى» تاربيەلەگەن. ونىڭ ايقىن كورىنىسى زاڭعار جازۋشى م.اۋەزوۆتىڭ «اباي جولىندا» انىق جازىلعان. اباي قۇنانبايۇلىنىڭ تۇلعالىق دامۋىنا اناسى ۇلجان, اجەسى زەرەنىڭ ۇلكەن ۇلەسى بار.
جاھاندانۋ, جاڭا زامان دەسەك تە ىلگەرىدەن ىرگە اجىراتۋعا بولمايدى دەر ەدىم. ويتكەنى قازىر ەرتەگى ايتا المايتىن اجەلەر, بالاسىن الديلەمەيتىن انالار, ادەپتەن بەزگەن قىزدار كوبەيىپ كەلەدى. اسىرەسە, ەلوردادا. ونىڭ تۇبىندە انا ءتىلدى بىلمەۋ ماسەلەسى جاتىر.
ايەل, انا رەتىندە وسى جايلارعا جۇرەگىم اۋىرادى. سوندىقتان وسى اتتەگەن-ايعا ازدا بولسا امال جاساپ, ءبىرشاما ىستەردى اتقارىپ ءجۇرمىز. نۇر-سۇلتان قالاسى قازاقستان حالقى اسسامبلەياسىنىڭ انالار كەڭەسى ۇمىتىلىپ بارا جاتقان داستۇرلەردى جاڭعىرتىپ, ناسيحاتتاۋدا. «Nomad WOMAN» ايەلدەردىڭ اتقا ءمىنۋ كلۋبى دا, «ANA TIME» جانە «Altyn bala» سەكىلدى الەۋمەتتىك جوبالار وتباسى ينستيتۋتىن دامىتۋعا, وسى سالاداعى كوپتەگەن ماسەلەلەردىڭ ءتۇيىنىن تارقاتۋعا ءوز سەپتىگىن تيگىزىپ كەلەدى.
كوكتەمنىڭ لەبىمەن كەلگەن مەرەكە قارساڭىندا اق جاۋلىقتى انالارىمدى, قاتار-قۇربىلارىمدى, اپكە-سىڭلىلەرىمدى قۇتتىقتاعىم كەلەدى. ەل ومىرىندەگى ورنى ەرەكشە جاندارعا جىگەر, پايىم-پاراسات پەن ايەل باقىتىن تىلەيمىن. ارقاشان دەنساۋلىقتارى مىقتى بولىپ, وسىرگەن ۇل-قىزىنان قۇرمەت پەن قوشەمەت كورە بەرسىن دەمەكپىن.
التىناي تاڭىربەرگەنوۆا, نۇر-سۇلتان
قالاسى قازاقستان حالقى اسسامبلەياسىنىڭ انالار كەڭەسىنىڭ ءتورايىمى
