ەلباسى نۇرسۇلتان نازارباەۆ تۇركىتىلدەس مەملەكەتتەر ىنتىماقتاستىعى كەڭەسىنىڭ باكۋ قالاسىندا وتكەن 7-ءشى وتىرىسىنا قاتىستى.
نۇرسۇلتان نازارباەۆ سامميتتە پرەزيدەنت شاۆكات ميرزيوەۆتى جانە بۇكىل وزبەك حالقىن تۇركى كەڭەسىنە تولىققاندى مۇشە بولۋىمەن قۇتتىقتادى.
سونىمەن قاتار نۇرسۇلتان نازارباەۆ بۋداپەشتە تۇركى كەڭەسىنىڭ وكىلدىگىن اشۋ – ىنتىماقتاستىقتىڭ ەۋروپا ۆەكتورىن دامىتۋدا ەرەكشە ماڭىزدى ەكەنىن اتاپ ءوتتى.
سونداي-اق ەلباسى قىرعىز رەسپۋبليكاسىنىڭ تۇركى كەڭەسىنە توراعالىق قىزمەتىندەگى جۇمىسىن جوعارى باعالادى.
– ماعان «تۇركى كەڭەسىنىڭ قۇرمەتتى توراعاسى» مارتەبەسىن بەرۋ تۋرالى ۇسىنىسى ءۇشىن پرەزيدەنت رەجەپ ەردوعانعا العىس بىلدىرەمىن. وسى باستامانى قولداعاندارىڭىز ءۇشىن بارشاڭىزعا ريزامىن. بۇل جوعارى مارتەبە ماعان ورتاق ۇيىمىمىزدىڭ جۇمىسىنا ودان ءارى بەلسەندى قاتىسۋعا مۇمكىندىك بەرەدى, – دەدى قازاقستاننىڭ تۇڭعىش پرەزيدەنتى.
نۇرسۇلتان نازارباەۆ تۇركى كەڭەسىنىڭ قۇرىلۋ تاريحىنا توقتالدى.
– مەرەيتويلىق مەجەگە ءبىز جاقسى جەتىستىكتەرمەن جەتتىك. بىرىنشىدەن, جاھاندىق تۇرعىدا دا, ءوز ىشىمىزدە دە ۇيىمعا سۇرانىس بار ەكەنىن ءارى ونىڭ وزەكتىلىگىن دالەلدەي الدىق. ەكىنشىدەن, كەڭەستىڭ قاتارى وزبەكستان مەن ماجارستان ەسەبىنەن تولىقتى. ۇشىنشىدەن, ەلدەرىمىز سالماقتى ينستيتۋتسيونالدىق ارحيتەكتۋرا قالىپتاستىردى. تورتىنشىدەن, كەڭەستىڭ وڭىرلىك جانە حالىقارالىق دەڭگەيدەگى ساياسي جانە ەكونوميكالىق بەدەلى ءوسىپ كەلەدى. بەسىنشىدەن, تۇركى الەمى ينتەگراتسياسىنىڭ تۇجىرىمداماسى قابىلداندى, – دەدى ەلباسى.
قازاقستاننىڭ تۇڭعىش پرەزيدەنتى تۇركى ينتەگراتسياسى پروتسەسىن جالعاستىرۋدىڭ ماڭىزدىلىعىنا توقتالىپ, تۇركى كەڭەسىن ودان ءارى دامىتۋ ءۇشىن ەكى ۇسىنىس ايتتى.
– بىرىنشىدەن, «تۇركى كەلەشەگى – 2040» باعدارلاماسىن ازىرلەۋ. بۇل قۇجاتقا تۇركىتىلدەس قوعامداستىقتىڭ ۇزاق مەرزىمدى ماقساتتارى مەن وعان قول جەتكىزۋ جولدارى ەنگىزىلۋگە ءتيىس, – دەدى نۇرسۇلتان نازارباەۆ.
سونداي-اق قازاقستاننىڭ تۇڭعىش پرەزيدەنتى «تۇركى الەمىنىڭ بەسىگى» – تۇركىستان قالاسىن دامىتۋدىڭ ماڭىزدىلىعىنا نازار اۋداردى.
– ەكىنشىدەن, بولاشاقتا كەڭەسىمىزدىڭ اتاۋىن قايتا قاراۋدى ۇسىنامىن. تۇركىتىلدەس مەملەكەتتەر ىنتىماقتاستىعى كەڭەسىن ۇيىم دەڭگەيىنە دەيىن كوتەرۋگە بولادى دەپ سانايمىن. وسىلايشا ءبىزدىڭ قۇرىلىمدى «تۇركىتەكتەس مەملەكەتتەر ۇيىمى» دەپ اتاۋعا بولادى, – دەدى نۇرسۇلتان نازارباەۆ.
ەلباسى كەڭەسكە قاتىسۋشى ەلدەر باسشىلارىمەن ەكىجاقتى كەزدەسۋلەر وتكىزدى.
