استانا قالاسى دەنساۋلىق ساقتاۋ باسقارماسىنىڭ مالىمەتىنشە, بىلىكتىلىكتى ارتتىرۋ جانە مەديتسينا قىزمەتكەرلەرىن قايتا دايارلاۋ بويىنشا بيىل جەرگىلىكتى بيۋدجەتتەن 390 ملن تەڭگە بولىنگەن.
ناتيجەسىندە ەلىمىز بەن بىرقاتار الىس-جاقىن شەت ەلدەردىڭ عىلىمي ورتالىقتارىندا 5 مىڭنان اسا مەديتسينا قىزمەتكەر بىلىكتىلىگىن ارتتىرۋ كۋرستارىنا قاتىسقان. سونىڭ ىشىندە تۇڭعىش رەت استانالىق 50 مەدبيكە نازارباەۆ ۋنيۆەرسيتەتىنىڭ مەديتسينا مەكتەبىندە مەدبيكە ءىسى مەنەدجمەنتى باعدارلاماسى بويىنشا ءبىلىمىن جەتىلدىرگەن.
«تسيفرلى قازاقستان» باعدارلاماسى اياسىندا پرەزيدەنت تاپسىرماسىنا سايكەس, كەلەر جىلدىڭ العاشقى كۇنىنەن باستاپ بارلىق ەمحانالار مەن اۋرۋحانالار قاعازسىز جۇيەگە, ياعني تسيفرلىق مەديتسينالىق قۇجاتقا كوشۋى ءتيىس. ءبۇگىنگە دەيىن ەلورداداعى مەديتسينالىق ۇيىمداردىڭ اقپاراتتىق جۇيەسى ارقىلى 1,5 ملن وتىنىشكە قىزمەت كورسەتىلىپ, 1 ميلليوننان اسا ەلەكتروندى دەنساۋلىق پاسپورتى قۇرىلىپتى. 2020 جىلعا قاراي بارلىق تۇرعىننىڭ ەلەكتروندى پاسپورتى جاسالىپ, سونىڭ ارقاسىندا قىزمەت كورسەتۋ ساپاسى ارتىپ, كەزەك كۇتۋ, بيۋروكراتيا ماسەلەسى بىرتىندەپ جويىلماق.
– مەملەكەت باسشىسى بيىلعى جولداۋىندا دەنساۋلىق ساقتاۋ سالاسىنا قاتىستى ايتقان سوزىندە: «ەڭ الدىمەن العاشقى مەديتسينالىق-سانيتارلىق كومەكتىڭ قولجەتىمدىلىگىن كۇشەيتۋ كەرەك» دەگەن بولاتىن. بۇل تۇرعىدا استانا قالاسى قوعامدىق دەنساۋلىق ساقتاۋ باسقارماسىندا ىلكىمدى ىستەر قولعا الىنىپ جاتىر. مىسالى, قالادا قوسىمشا 68 مەديتسينالىق ۋچاسكە اشۋ جوسپارلانۋدا. «دەنساۋلىق» مەملەكەتتىك باعدارلاماسىنا سايكەس, ءبىر دارىگەردىڭ جالپى تاجىريبەدەگى ورتاشا جۇكتەمەسى 1750 ادامدى قۇرايتىن بولادى. وسىعان بايلانىستى قالاداعى ەمحانالاردىڭ ۋچاسكەلەرىن شاعىنداپ قايتا ۇيىمداستىرۋ شارالارى جۇرگىزىلۋدە. بۇل اۋماقتىق قولجەتىمدىلىكتى قامتاماسىز ەتۋگە مۇمكىندىك بەرەدى. سونىمەن قاتار «دوكتور ۇيىڭىزدە» جوباسىن ەنگىزۋ ارقىلى جەدەل مەديتسينالىق جاردەمگە قولجەتىمدىلىك ارتادى. بۇل جوبا بويىنشا كەلەر جىلدىڭ ءبىرىنشى توقسانىنا دەيىن 11, ال 2023 جىلعا دەيىن 40 نىسان اشىلادى دەپ جوسپارلانۋدا, – دەيدى دەنساۋلىق ساقتاۋ باسقارماسىنىڭ ءباسپاسوز حاتشىسى ايگەرىم ارداق.
ونىڭ ايتۋىنشا, 2019 جىلدىڭ 1 قاڭتارىنان باستاپ ۋچاسكەلىك مەديتسينا ماماندارىنىڭ جالاقىسى 20 پايىزعا وسەدى دەپ كۇتىلۋدە.
