ەلدى ەلەڭ ەتكىزگەن
اقش اسكەرى سيريادان شىعادى
اقش-تا ەل اسكەرىن سيريا جەرىنەن شىعارۋ تۋرالى شەشىم قابىلداندى.
CNN باسىلىمى بۇل قاۋلىعا پەنتاگون باسشىسى دجەيمس مەتتيس قول قويعانىن حابارلادى. وتكەن اپتادا بۇل ماسەلەنى اقش پرەزيدەنتى دونالد ترامپ ءمالىم ەتكەن. ول بۇل ارەكەتىن سيرياداعى ەكسترەميستىك توپتاردىڭ جەڭىلۋىمەن بايلانىستىردى. الايدا مەتتيس ەل پرەزيدەنتىنىڭ بۇل شەشىمىمەن كەلىسپەيتىنىن ايتىپ, وتستاۆكاعا كەتتى. قازىرگى ۋاقىتتا سيريادا شامامەن 2600 امەريكالىق اسكەري بار.
سۇراپىل سۋ تاسقىنى
يندونەزيانىڭ باتىس ايماعىنداعى زوند بۇعازىندا سۋ تاسقىنى بولىپ, 334 ادام قازا بولدى. Jakarta Post باسىلىمىنىڭ مالىمەتىنە سايكەس, 3000-نان اسا ادام زارداپ شەككەن.
بۇدان بولەك جۇزدەگەن ءۇي مەن عيمارات قيراپ, جارامسىز بولىپ قالعان. ال 61 ادامنىڭ ءىز-ءتۇزسىز جوعالىپ كەتكەنى بەلگىلى بولدى. تسۋنامي بولاردىڭ الدىندا 5 بالدىق جەر سىلكىنىسى تىركەلگەن. بۇعان قوسا وڭىردەگى اناك كراكاتاۋ جانارتاۋى اتقىلاعان. ءبىر وكىنىشتىسى, يندونەزيادا تابيعي اپاتتىڭ ءجيى بولاتىندىعىنا قاراماستان ارنايى ەسكەرتۋ قۇرىلعىلارى ورناتىلماعان. جاقىندا سۋ تاسقىنى تاعى دا بولۋى مۇمكىن دەگەن بولجام دا بار.
وسى قايعىلى وقيعاعا بايلانىستى قازاقستان پرەزيدەنتى نۇرسۇلتان نازارباەۆ يندونەزيا باسشىسى دجوكو ۆيدودوعا كوڭىل ايتۋ جەدەلحاتىن جولدادى.
پلاستيك قالدىعىنان جانارماي وندىرەدى
فرانتسيالىق ونەرتاپقىش كريستوفەر كوست پلاستيك قالدىقتاردى جانارمايعا اينالدىراتىن اپپارات ويلاپ شىعاردى.
بۇل اپپارات قورشاعان ورتانىڭ لاستانۋىنىڭ الدىن الماق. ول پلاستيك قالدىقتارىن 450 گرادۋستىق پەشتە قىزدىرعاننان كەيىن ودان شىققان سۇيىقتىقتىڭ 65 پايىزى ديزەلدى, 18 پايىزى بەنزيندى, 10 پايىزى گازدى, ال 7 پايىزى كومىرتەكتى قۇرايدى. ونەرتاپقىشتىڭ ايتۋىنشا, ءبىر كيلوگرامم پلاستيكتەن ءبىر ليتر سۇيىقتىق بولىنەدى ەكەن. الداعى جىلى فرانتسۋز مامانى ساعاتىنا 40 ليتر جانارماي ءوندىرەتىن ماشينا قۇراستىرۋدى جوسپارلاپ وتىر.
الەمدە جىلىنا 260 ملن توننا پلاستيك قالدىقتارى شىعارىلادى. ونىڭ 8 ميلليونى مۇحيتتارعا ءتۇسىپ, سۋاستى تىرشىلىگىنە زيان تيگىزىپ وتىر ەكەن.