نۇر-سۇلتان قالاسىندا بيىل تكش باعدارلاماسى بويىنشا 50-دەن اسا كوپپاتەرلى تۇرعىن ءۇي كەشەنى جاڭارتىلىپ, 100-گە جۋىق ليفت جوندەۋ كوردى. بۇل تۋرالى قالا باسشىسى التاي كولگىنوۆ مالىمدەدى.
«ەلورداداعى قاۋىپتى تۇرعىن ءۇي كەشەندەرىنە جوندەۋ جۇمىستارىن جۇرگىزەمىز. قۇلاپ جاتقان پليتالار, جانعىش توسەمدەر, اپاتتى جاعدايداعى جەدەلساتىلارى بار ۇيلەردى جاڭعىرتامىز. مىسالى, «تەرريتوريا كومفورتا – 2» كوپپاتەرلى تۇرعىن ءۇي كەشەنىنىڭ قاسبەتى تولىق اۋىستىرىلدى, كەراموگرانيت پليتالار الىنىپ قالدى, جىلىتقىشتار, قاباتارالىق, ءورت جاعدايىنا ارنالعان ەسىكتەر قويىلدى.
اتالمىش تۇرعىن ءۇي بۇعان دەيىن پايدالانۋعا بەرىلمەگەن, سەبەبى مەكەنجايى بەلگىسىز ەدى. ال ەندى بۇل ماسەلە وڭ شەشىمىن تاپتى. بۇكىل قۇجاتتامانى دايىنداپ, تۇرعىن ءۇيدى پايدالانۋعا بەردىك. ەندى ءۇيدىڭ ءوز رەسمي مەكەنجايى بار. ماماندار پاتەر يەلەرىنە تەحنيكالىق پاسپورت بەرۋ ءۇشىن پاتەر اۋماعىن ولشەۋمەن اينالىسۋدا» دەدى قالا اكىمى.
كەزدەسۋ بارىسىندا تۇرعىندار بالالارىن كوشەگە شىعارۋدان قالىپ, پليتالار قۇلاپ كەتەدى دەگەن ۇرەيدەن ءۇيدىڭ جان-جاعىن, توبەسىن ۇنەمى قارايلاپ جۇرەتىنىن اتاپ ءوتتى.
«پليتالار جەل تۇرسا قۇلايتىن. ولار تەز جانادى, سوندىقتان ءورت شىعۋ قاۋپى دە جوعارى. تۇرعىن ءۇي كەشەنىنىڭ ءوزى بىرنەشە جىل بۇرىن قاۋىپتى دەپ تانىلعان. ەندى ءۇي جاڭارتىلدى, قاۋىپ سەيىلدى. جاقىندا ءوز پاتەرىمىزگە تەحنيكالىق پاسپورت الامىز. كورسەتىلگەن كومەك ءۇشىن پرەزيدەنتكە, مەملەكەتكە العىسىمىزدى بىلدىرەمىز» دەيدى تۇرعىندار.
سونىمەن قاتار قالادا اپاتتى جاعدايداعى ۇيلەردى ءسۇرۋ جۇمىستارى جۇرگىزىلۋدە. وتكەن جىلى 200-گە جۋىق وتباسى جاڭا تۇرعىن ۇيگە كوشىرىلسە, بيىل تاعى 200-دەن اسا وتباسىن كوشىرۋ جوسپارلانعان.
