اقمولا وبلىسىنىڭ قورعالجىن اۋدانىنداعى «كەڭبيدايىق» ورتا مەكتەبىندە ۇستەل تەننيسىنەن قازاقستاننىڭ ءبىلىم بەرۋ ءىسىنىڭ ۇزدىگى, ۇلاعاتتى ۇستاز قابدەن شامشىكەنوۆ ەسىمىن ەسكە تۇسىرۋگە ارنالعان ءداستۇرلى اشىق تۋرنير ءوتتى.
جىل سايىن وتەتىن جارىسقا اۋدانداعى مەكتەپ ۇجىمدارى مەن نۇر-سۇلتان قالاسىنان اۋەسقوي تەننيسشىلەر قاتىستى. قابدەن شامشىكەنوۆ بۇكىل سانالى عۇمىرىن كەڭبيدايىق اۋىلىنداعى ورتا مەكتەپتە وتكىزگەن. ەڭبەك جولىن قاتارداعى مۇعالىم بولىپ باستاپ, جيىرما جىلعا جۋىق مەكتەپ ديرەكتورى قىزمەتىن اتقارعان. ۇلاعاتتى ۇستاز وتكەن عاسىردىڭ جەتپىسىنشى جىلدارى كەزەكتى ءبىر ەڭبەك دەمالىسىن قىرىم كۋرورتىندا وتكىزگەندە ۇستەل تەننيسىن كورىپ, ءوزى ۇيرەنىپ, كەتەرىندە تاپسىرىس بەرىپ, بىرنەشە ۇستەل تەننيسىن جابدىقتارىمەن بىرگە اۋىل مەكتەبىنە العىزادى. سودان بەرى وسى اۋىلدا, اۋدان بويىنشا دا ۇستەل تەننيسى كوپشىلىكتىڭ قىزىعىپ شۇعىلداناتىن سپورت تۇرىنە اينالىپ كەتە بەرەدى.
ال بيىلعى جارىستا «كەڭبيدايىق» ورتا مەكتەبى 1-ورىنعا يە بولسا, «جانتەكە» ورتا مەكتەبى – ەكىنشى, قورعالجىن مەكتەپ-گيمنازياسى ءۇشىنشى ورىننان كورىندى. جارىس جەڭىمپازدارى مەن جۇلدەگەرلەرىنە ديپلومدار, مەدالدار جانە باعالى سىيلىقتار تاپسىرىلدى.
