جۋىردا ۇلتتىق مۋزەيدە «قازاقستان رەسپۋبليكاسىنىڭ ۇلتتىق مۋزەيى جانە باق: ءوزارا ىقپالداستىق جولدارى» تاقىرىبىندا دوڭگەلەك ۇستەل ءوتتى. جيىنعا مەكەمە باسشىلارى مەن قىزمەتكەرلەرى, اقپارات قۇرالدارى جەتەكشىلەرى مەن تىلشىلەرى قاتىسىپ, ءوزارا پىكىر الماستى.
الدىمەن مۋزەي قىزمەتكەرلەرى قوناقتارعا مۋزەي زالدارى مەن ونداعى مۇراعاتتارمەن تانىسۋعا مۇمكىندىك تۋعىزعان. كوپشىلىك قازىرگى زامانعى ايتۋلى مۇسىنشىلەردىڭ ءبىرى – تسادوك بەن-ءداۆيدتىڭ «ءتۇن ورتاسىنىڭ ارعى بەتى» اتتى كورمەسىن تاماشالادى. ودان سوڭ قىتاي فارفورىنىڭ كورمەسى كورسەتىلدى.
مەكەمە باسشىسى دارحان مىڭباي ەلىمىزدىڭ تاريحي-مادەني مۇرالارىن ناسيحاتتاپ, ۇلتتىق قۇندىلىقتارىمىزدىڭ, حالىقتىڭ سالت-سانا مەن دۇنيەتانىمىنىڭ, تاريحى مەن وركەنيەتىنىڭ ايناسىنا اينالىپ وتىرعان مۋزەيدىڭ قازىرگى جاي-كۇيىمەن تانىستىرىپ, الداعى ماقسات-مىندەتتەرىنە توقتالدى. سونىمەن قاتار, وسىنداي ۇلكەن جاۋاپكەرشىلىك ارقالاعان مەكەمەنىڭ قىزمەتىن ناسيحاتتاپ, جالپاق جۇرتقا جاريالاپ وتىرۋ ءۇشىن اقپارات قۇرالدارىمەن بايلانىستىڭ قانشالىق ماڭىزدى ەكەنىن باياندادى.
جيىن بارىسىندا قازاقستان جۋرناليستەر وداعى باسقارماسىنىڭ توراعاسى س.ماتاەۆ قر ۇلتتىق مۋزەيىنىڭ حالىقارالىق دەڭگەيدە ءىرى مادەني ورتالىققا اينالىپ وتىرعانىن تىلگە تيەك ەتتى. زاماناۋي تەحنيكا مەن تەحنولوگيانى ءتيىمدى پايدالانىپ, وزىندىك ەرەكشەلىكتەرىمەن تاڭ قالدىراتىن مۋزەيدىڭ ۇلتتىق قۇندىلىقتار ۇياسىنا اينالۋىنا وزگە باق باسشىلارى دا مۇددەلەستىك تانىتتى.
مەكەمە باسشىسى د.مىڭباي مەن باس رەداكتورلار كلۋبىنىڭ پرەزيدەنتى ب.جەكسەنباي ەكى جاقتى ىنتىماقتاستىق تۋرالى مەموراندۋمعا قول قويدى.
وسى جيىن اياسىندا «مادەني مۇرا» جۋرنالىنىڭ جاڭا فورماتى تانىستىرىلىپ, 3-D تۋرىنىڭ تۇساۋى كەسىلدى.
ن.سايلاۋقىزى
