ەلوردادا قۇلاعى ەستىمەيتىن, مۇگەدەك جانداردىڭ جاعدايلارىن ەسكەرە وتىرىپ, استانا قالاسىنىڭ جۇمىسپەن قامتۋ ورتالىعى ولارعا حالىققا قىزمەت كورسەتۋ ورتالىقتارىندا ساپالى قىزمەت كورسەتۋ, سونداي-اق, مۇراجايلارمەن, باسقا دا مادەني ورىندارعا ەركىن بارىپ, دەمالۋلارىنا مۇمكىندىكتەر تۋعىزۋ ماقساتىندا «جۇمىسپەن قامتۋ – 2020 جول كارتاسى» باعدارلاماسى اياسىندا سۋردواۋدارماشىلار دايارلاۋ كۋرستارىن ۇيىمداستىردى.
اعىمداعى جىلدىڭ قىركۇيەك ايىندا «مامان» وندىرىستىك-وقۋ ورتالىعى بازاسىندا حالىققا قىزمەت كورسەتۋ ورتالىقتارىنىڭ ون التى جارتىلاي جۇمىسپەن قامتىلعان قىزمەتكەرى «سۋردواۋدارماشى» ماماندىعىنا وقىتىلىپ, ولارعا ەكى ايلىق كۋرستا ساڭىراۋلارمەن سويلەسۋ, ارالاسۋ ءۇشىن ارنايى ءىس-قيمىلدار مەن الىپپە ۇيرەتىلدى.
مۇندا بولاشاق اۋدارماشىلارعا كوپ جىلعى تاجىريبەسى بار «دەفەكتولوگ-سۋردوپەداگوگ» ماماندار ساباق جۇرگىزدى. العاشقى توپتىڭ ساباعى 20 قازاندا اياقتالادى. ودان كەيىن كۋرستى تامامداعان ون التى قىزمەتكەر مەملەكەتتىك ۇلگىدەگى كۋالىك الىپ, وزدەرىنىڭ بۇرىنعى جۇمىس ورىندارىنا قايتىپ ورالادى.
قالادا مۇنداي ىم-يشارامەن «سويلەسەتىن» اۋدارماشىلاردى وقىتاتىن كۋرس بۇرىن-سوڭدى بولعان جوق. بۇل ەلباسىنىڭ تاپسىرماسىنا وراي مۇمكىندىگى شەكتەۋلى ازاماتتاردىڭ وزدەرىن قوعامنىڭ تەڭ مۇشەسى رەتىندە سەزىنۋى ءۇشىن ۇكىمەتتىڭ جاعداي جاساۋ قامقورلىعىنان تۋىپ وتىر.
كەلەسى توپتا 11 قاراشادا مادەنيەت سالاسىنداعى ون ەكى قىزمەتكەر سۋردواۋدارماشى ماماندىعىن الادى. ولار دا قالانىڭ تەاترلارىندا, مۇراجايلارىندا, كورمەلەرىندە اتالعان ساناتتاعى ازاماتتارعا قىزمەت ەتىپ, كاسىبي مالىمەتتەر بەرەدى.
ساعي ورال
