شەجىرەنى شەكتەمەيىك
دۇنيە جۇزىندە ەش حالىقتا كەزدەسپەيتىن, ءبىزدىڭ ۇلتقا عانا ءتان شەجىرە تاراتۋ – اتا ءداستۇرىمىزدىڭ ەڭ وزىعى. بۇل جايدان-جاي شىعارىلعان, ياعني, رۋعا ءبولىنۋشىلىك ەمەس. ونىڭ كوپتەگەن پايدالى جاقتارى بار ەكەنىن قازاقتار ەرتە زاماندا-اق بىلگەن.
اتاپ ايتقاندا, جەتى اتاعا دەيىن ۇرپاعىنىڭ قان تازالىعى مەن ساۋلىعىن ساقتاۋ قامىمەن بابالارىمىز رۋلاس جاستاردى ءبىر-بىرىمەن ۇيلەندىرمەگەن.
ۇرپاقتان-ۇرپاققا جالعاسىپ, ءبىزدىڭ زامانىمىزعا دەيىن كەلگەن بۇل جەتى اتا – ءبىر شىنجىر ءۇردىسى ۇرپاق دەنساۋلىعى مىقتى بولىپ, جان مەن قان تازالىعى ساقتالۋىنا بىردەن-ءبىر سەبەپ ەكەندىگىن عىلىمنىڭ دامىعان كەزىندە دارىگەر-عالىمدار دالەلدەپ وتىر. سول الماعايىپ زاماندا اتا-بابامىز جەتى اتا ىشىندە ۇيلەنبەۋ قاعيداتىن قاتاڭ ساقتاي وتىرىپ, ەل بىرلىگى, جەر تۇتاستىعى ءۇشىن الىس رۋلارمەن قۇداندالى بولعان. ونىڭ باستى سەبەبى, جاۋعا قارسى تۇرۋعا قۇداندالى, ناعاشى-جيەن بولىپ كەلگەن ەلدەر ءبىر-بىرىنە كومەككە بارعان.
ءبىزدىڭ وسى جاقىندىعى جەتى اتادان اسپايتىن جاستاردى ءبىر-بىرىنە قوسپاۋ داستۇرىنە قازىرگى كەزدە ءدۇنيەجۇزى قىزىعۋشىلىق تانىتىپ وتىر. سەبەبى, بۇل بولاشاق ۇرپاعىمىزدىڭ شەت ەلدەردەگىدەي «داۋنا», «اق قان» اۋرۋلارىمەن تۋىن بولدىرتپايدى. بۇگىندە ەۋروپانىڭ مەديتسيناسى دامىعان ەلدەرىنىڭ وزدەرى ءبىزدىڭ وسى سالتىمىزدان ۇلگى الا باستادى. گەرمانيا دا مۇنى دالەلدەپ, ءوز ەلىندە ءتورت اتا ىشىندە ۇيلەنبەۋگە زاڭ شىعارىپ قويدى.
مەنىڭشە, ۇرپاعىمىزدىڭ تاعدىرى ءۇشىن الاڭداي وتىرىپ, وسى قاسيەتتى سالتىمىزدى قادىرلەپ, ونى ومىرىمىزگە ۇستانىپ, زاڭداستىرۋىمىز كەرەك. «قولدا باردا التىننىڭ قادىرى جوق»دەمەكشى, قازىر كوپشىلىك جۇرت شەجىرەگە ءمان بەرمەيدى. سونىڭ سالدارىنان كەيىنگى كەزدە ەمدەلۋى قيىن, ءتۋابىتتى اۋرۋلار قاتارى كوبەيىپ كەلەدى. مۇنداي اۋرۋلار, اسىرەسە, تاستاندى بالالاردىڭ اراسىندا كوپ كەزدەسەدى. سونىمەن قاتار, اكەسىز تۋعان جانە اتا-اناسى ايىرىلىسقان سوڭ, اناسىنىڭ قولىندا قالىپ, ناعاشىلارىندا وسكەن, سولاردىڭ تەگىنە جازىلىپ وسكەن بالالاردىڭ اراسىندا دا از ەمەس. ءوز اتا جۇرتىن بىلمەيتىن مۇنداي بالالاردىڭ وسكەندە ءوزىنىڭ اتالاس تۋىسىمەن باس قوسۋى ابدەن مۇمكىن. مىنە, وسىنداي كەلەڭسىزدىكتەردى جويۋ ءۇشىن جوعارىدا ايتىلعان جايتتەردى بولدىرماۋعا تىرىسۋىمىز كەرەك.
بازارباي باعىسوۆ