قازاقستان رەسپۋبليكاسى قارۋلى كۇشتەرىنىڭ اسكەري-تاريحي مۋزەيىندە قازاقستاننىڭ ەڭبەك سىڭىرگەن قايراتكەرى, جۋرناليست, سۋرەتشى سەيسەنحان ماحانبەتوۆتىڭ «ۇلى دالا داستانى» اتتى تاۋەلسىزدىكتىڭ 30 جىلدىعىنا ارنالعان كورمەسىنىڭ اشىلۋى ءوتتى.
كورمەنىڭ اشىلۋ سالتاناتىنا پارلامەنت دەپۋتاتتارى, قر قارۋلى كۇشتەرىنىڭ قىزمەتكەرلەرى, زيالى قاۋىم وكىلدەرى, اسكەري كۋرسانتتار مەن ستۋدەنتتەر قاتىستى. كورمە ۇلى دالانىڭ قىلقالاممەن جازىلعان داستانى ىسپەتتى. قازاقتىڭ بايتاق دالاسى, جازيرالى تابيعاتى, ادامدارى, تاريحىنىڭ وتكەنى مەن بۇگىنى تۋرالى سىر شەرتەدى.
2021 جىلدىڭ ناۋرىزىندا تۇركىستان قالاسىنان باستاۋ العان سۋرەتشىنىڭ «ۇلى دالا داستانى» اتتى جەكە شىعارماشىلىق كورمەسى بىرنەشە وبلىس ورتالىقتارىنداعى مۋزەيلەردە كورسەتىلىپ, قورىتىندى كورمە رەتىندە نۇر-سۇلتان قالاسىندا ۇيىمداستىرىلىپ وتىر.
ەلباسىنىڭ «ۇلى دالانىڭ جەتى قىرى» ماقالاسى مەن «رۋحاني جاڭعىرۋ» باعدارلاماسىنداعى باعىت-باعدارلارى سۋرەتشى شىعارماشىلىعىندا مولىنان كورىنىس تاپقان. سۋرەتشى س.ماحانبەتوۆ سوڭعى جىلدارى بەينەلەۋ ونەرى سالاسىندا ءوزىنىڭ شىعارماشىلىق ىزدەنىستەرى مەن ەڭ بەلسەندى قىلقالام شەبەرلەرىنىڭ ءبىرى بولىپ وتىر. سۋرەتشىنىڭ كارتينالارىندا رەاليزم ءستيلى باسىم. ول ءوز شىعارماشىلىعىندا قازاق حالقىنىڭ باسىنان وتكەن ءتۇرلى تاريحي وقيعالار, قيلى كەزەڭدەر, ەل ءۇشىن كۇرەسكەن تۇلعالاردىڭ وبرازدارى, ەلىمىزدىڭ جەتكەن جەتىستىكتەرى, سۇلۋ تابيعاتى مولىنان كورىنىس تاپقان.
بايان اسىلبەكوۆا
