الماتى قالاسىنداعى «بالۋان شولاق» سپورت كەشەنىندە كونفەدەراتسيا كۋبوگىنىڭ اقتىق كەزدەسۋلەرى ءوتىپ, بوكس, قازاق كۇرەسى, ەركىن كۇرەس, دزيۋدو, تاەكۆاندو, گرەك-ريم كۇرەسى سپورتىنىڭ ۇزدىكتەرى انىقتالدى. تۋرنيرگە ەلىمىزدىڭ بارلىق وڭىرىنەن 200-دەن اسا سپورتشى قاتىستى.
الدىمەن سىنعا تۇسكەن بىلعارى قولعاپ شەبەرلەرى ءوزارا مىقتىنى انىقتاپ, فينالعا ماڭعىستاۋ مەن تۇركىستان وبلىستارىنىڭ بوكسشىلارى شىقتى. تارتىستى وتكەن جەكپە-جەكتە 5:4 ەسەبىمەن ماڭعىستاۋلىقتار باسىم ءتۇستى. ال ۇزدىك ۇشتىكتى قاراعاندى وبلىسى مەن استانا قالاسىنىڭ سپورتشىلارى تۇيىندەدى.
قازاق كۇرەسىنەن قاراعاندى وبلىسىنىڭ سپورتشىلارى جەڭىس تۇعىرىنان كورىندى. كومىرلى ايماقتىڭ بالۋاندارى اقتىق باسەكەدە الماتى قالاسىنان باسىم ءتۇستى. ال ءۇشىنشى ورىن بۇل جولى دا ەلوردالىقتاردىڭ ەنشىسىنە بۇيىردى.
ەركىن كۇرەستەن شىعىسقازاقستاندىقتار فينالدا استانا قالاسىنىڭ سپورتشىلارىمەن بەلدەسىپ, 4:2 ەسەبىمەن جەڭىسكە جەتتى.
گرەك-ريم كۇرەسىنەن الماتى وبلىسىنىڭ جىگىتتەرى الماتى قالاسىمەن كۇش سىناستى, وبلىس بالۋاندارى 4:2 ەسەبەبىمەن باسىم ءتۇستى.
تاەكۆوندودان الماتى قالاسى ۇزدىك بولىپ, كۋبوكقا قول جەتكىزدى. فينالدا ولار تۇركىستان وبلىسىنىڭ سپورتشىلارىمەن كەزدەسىپ, 82:42 ەسەبىمەن ءادىل جەڭدى.
ال تاتامي شەبەرلەرى اراسىندا وتكەن تارتىستى باسەكەدە اتىراۋ وبلىسى وزىنە قارسىلاس شاق كەلتىرمەدى. باسەكە كورىگىن قىزدىرعان سوڭعى جەكپە-جەكتە قاراعاندى وبلىسىنىڭ سپورتشىلارىن 4:2 ەسەبىمەن ۇتىپ, وتكەن جىلعى چەمپيونداردان ايلاسىن اسىرا ءبىلدى.
جەڭىمپاز بولعان ۇجىمدارعا 25 ملن تەڭگە كولەمىندە سىياقى بەرىلدى.
ايتا كەتەيىك, جارىستىڭ جالپى جۇلدە قورى 145 ملن تەڭگەنى قۇرايدى. كونفەدەراتسيا كۋبوگى ۇلتتىق وليمپيادا كوميتەتىنىڭ پرەزيدەنتى تيمۋر قۇلىباەۆتىڭ باستاماسىمەن 2016 جىلدان باستاپ تۇراقتى تۇردە وتكىزىلىپ كەلدى.
