استانا اكىمدىگىنىڭ باستاماسىمەن مەملەكەتتىك رامىزدەر كۇنىنە وراي ۆەلوشەرۋ ءوتتى. شەرۋشىلەر قابانباي باتىر, قورعالجىن تاس جولى, تۇران داڭعىلى باعىتتارى بويىنشا ءجۇرىپ ءوتىپ, «استانا ارەنا» ستاديونىندا مارەگە جەتتى.
اتالعان شارانى دەنە شىنىقتىرۋ جانە سپورت باسقارماسى مەن سپورتتىق-بۇقارالىق ءىس-شارالاردى وتكىزۋ ديرەكتسياسى ۇيىمداستىردى. ءىس-شاراعا ۆەلوسپورت تۇرىنە قىزىعۋشىلىق تانىتاتىن استانالىقتار مەن دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپاەۆ, ءماسليحات دەپۋتاتى يليا مەششەرياكوۆ قاتىستى. باسقارما باسشىسىنىڭ ايتۋىنشا, ۆەلوشەرۋگە قاتىسۋعا 1300-گە جۋىق ادام نيەت بىلدىرگەن. ولاردىڭ اراسىندا نەبارى 3 جاسار بۇلدىرشىندەر دە بار.
– مەملەكەت باسشىسى نۇرسۇلتان نازارباەۆ بۇقارالىق سپورتتى دامىتۋ تۋرالى ۇنەمى ايتىپ وتىرادى. وسىنىڭ اسەرى بولسا كەرەك, سوڭعى كەزدەرى جاستار جاعى سپورتقا قىزىعۋشىلىق تانىتىپ, ءتۇرلى جارىستاردا توپ جارىپ ءجۇر. ونىڭ ۇستىنە ەلىمىزدە زاماناۋي تالاپتارعا ساي سپورت نىساندارى سالىنىپ, جاستاردىڭ ەركىن جاتتىعۋىنا جول اشىلدى. ال بۇگىن ءبىز سپورتتىڭ وسى تۇرىنەن ارنايى ۆەلوشەرۋ ۇيىمداستىرىپ وتىرمىز. ويتكەنى تازا اۋادا ۆەلوسيپەدپەن سەرۋەندەۋ دەنساۋلىققا وتە پايدالى بولىپ سانالادى. بۇگىنگى ءىس-شاراعا استانالىقتاردىڭ بەلسەندىلىك تانىتىپ, ءوز ەركىمەن كەلىپ جاتقانى مەنى قۋانتىپ وتىر. ەگەر دە بۇقارا حالىق ۆەلوشەرۋگە قىزىعۋشىلىق تانىتسا, مۇنداي شارانى الداعى ۋاقىتتا دا ۇيىمداستىراتىن بولامىز, – دەيدى ب.مارجىقپاەۆ.
ۇيىمداستىرۋشىلار شاراعا قاتىسقان ازاماتتاردىڭ اراسىندا ۇتىس لوتەرەيالارىن ويناتتى. سونداي-اق, جارىستا جەڭىسكە جەتكەن ازاماتتارعا ارنايى باعالى سىيلىقتار تابىس ەتىلدى.
سەرىك
جولداسباي
