استانادا قازاقستان پرەزيدەنتىنىڭ كۋبوگى ءۇشىن بوكستان V حالىقارالىق تۋرنير باستالدى. جارىستىڭ سالتاناتتى اشىلۋىندا قر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ توراعاسى ەلسيار قاناعاتوۆ جارىسقا قاتىسۋشىلارعا ساتتىلىك تىلەدى. استانا قالاسى اكىمىنىڭ ورىنباسارى ەرمەك امانشاەۆ پرەزيدەنت كۋبوگى ءۇشىن وتەتىن حالىقارالىق تۋرنير بۇگىنگى تاڭدا بۇكىل الەم كوز تىككەن «ەكسپو-2017» قارساڭىندا ۇيىمداستىرىلىپ وتىرعان ايتۋلى وقيعالاردىڭ ءبىرى ەكەنىن اتاپ ءوتىپ, جارىسقا قاتىسۋشى سپورتشىلارعا تابىس تىلەپ, سونىمەن قاتار, شەتەلدىك قوناقتارعا العىسىن ءبىلدىردى.
«داۋلەت» سپورت كەشەنىندە كەرىلگەن شارشى الاڭدا رەسەي, ۋكراينا, وزبەكستان, موڭعوليا, ءۇندىستان, فيليپپين, قىرعىزستان, وڭتۇستىك كورەيا, تاجىكستان, يران جانە قازاقستان بىلعارى قولعاپ شەبەرلەرى ونەر كورسەتەدى. ولاردىڭ اراسىندا وليمپيادا ويىندارى, الەم چەمپيوناتتارى مەن قۇرلىق بىرىنشىلىكتەرىنىڭ جەڭىمپازدارى مەن جۇلدەگەرلەرى دە از ەمەس.
جەكپە-جەكتەر 10 ەرلەر سالماعى جانە 3 ايەلدەر سالماعى بويىنشا وتەدى.
– قازاقستان پرەزيدەنتىنىڭ كۋبوگى ءۇشىن وتەتىن حالىقارالىق تۋرنير ايبا اياسىنداعى ءداستۇرلى جارىستاردىڭ بىرىنەن سانالادى. وسى تۋرنير ارقىلى وليمپيادا ويىندارىنا ليتسەنزيالار ۇلەستىرىلگەن بولاتىن. سونىمەن قاتار, بۇل جارىستى قازاقستان بوكسشىلارى ءۇشىن ۇلتتىق قۇراماعا ەسىك اشاتىن تۋرنير دەسەك تە بولادى. ماسەلەن, بيىلعى جارىستا ءار سالماقتا بىرنەشە قازاقستاندىق بوكسشى سىنعا تۇسەتىن بولادى. ولاردىڭ اراسىندا ۇلتتىق قۇرامانىڭ مۇشەلەرىمەن قاتار, كەلەشەگىنەن ءۇمىت كۇتتىرەتىن جاستار دا بار. ياعني, ءبىر سالماقتا بىرنەشە دەڭگەيلەس جىگىتتەر ونەر كورسەتەدى. دەمەك, اركىمگە ءوزىنىڭ مىقتىلىعىن دالەلدەۋگە مۇمكىندىك بەرىلىپ وتىر. جالپى, ايتۋلى جارىسقا ەلىمىزدەن 43 بوكسشى قاتىسادى. ولاردىڭ قاتارىندا 19 بوكسشى ۇلتتىق قۇرامانىڭ مۇشەلەرى بولسا, 8 بوكسشى وبلىستاردان تاڭدالدى. سونىمەن قاتار, «استانا ارلاندارى» قاتارىنداعى 8 بوكسشى جەكپە-جەككە تۇسەتىن بولادى, – دەيدى حالىقارالىق ءتۋرنيردىڭ مەنەدجەرى, قازاقستان رەسپۋبليكاسىنىڭ بوكستان مەملەكەتتىك جاتتىقتىرۋشىسى بولات ابدراحمانوۆ.
وسى جارىسقا رەسەي, وزبەكستان, ۋكراينا, موڭعوليا سياقتى بوكسى جاقسى دامىعان ەلدەردىڭ شەبەرلەرى دە قاتىساتىنىن ەسكەرسەك, قازاقستاندىق بوكسشىلار ءۇشىن جۇلدەگە قول سوزۋ وڭايعا تۇسپەسى انىق. دەگەنمەن جەرلەستەرىمىز جەرگە قاراتپايتىنىنا سەنىمدىمىز.
ال, ەندى, كىمگە سەنىم ارتامىز دەگەنگە كەلەر بولساق, ۆاسيلي لەۆيت, ءىلياس سۇلەيمەنوۆ, ازامات يساقۇلوۆ, ازات ماحمەتوۆ, ادىلەت قۇرمەتوۆ, مەيىربولات تويتوۆ, سۇلتان زاۋىربەك, سادريددين احمەدوۆ, ەرىك ءالجانوۆ, نۇرداۋلەت جارمانوۆ, باقداۋلەت يبراگيموۆ, قامشىبەك قوڭقاباەۆ, ولجاس بۇقاەۆ سەكىلدى جىگىتتەرىمىز بەن نازىم قىزايباي, جاينا شەكەربەكوۆا, ريمما ۆولوسەنكو, كارينا يبراگيموۆا, ايجان قوجابەكوۆا, داريعا شاكىموۆا, ۆيولەتتا كنيازەۆا سىندى بۇرىمدى ارۋلارىمىز نامىستى قولدان بەرمەيدى دەپ ويلايمىز.
كەشە جارىستىڭ سالتاناتتى اشىلۋ راسىمىنەن كەيىن جەكپە-جەكتەر باستالىپ كەتتى. 49 كەلى سالماقتا وتكەن ءتۋرنيردىڭ ءبىرىنشى ايقاسىندا استانالىق اسحات ءجۇسىپوۆ وزبەك بوكسشىسىن جەڭدى. سونداي-اق, ۆاسيلي لەۆيت تە قارسىلاسىنان باسىم ءتۇستى.
سونىمەن, قازاقستان پرەزيدەنتىنىڭ كۋبوگى ءۇشىن حالىقارالىق تۋرنير جالاۋىن كوتەردى. ءتۋرنيردىڭ ىرىكتەۋ جەكپە-جەكتەرى سەيسەنبى, سارسەنبى جانە بەيسەنبى كۇندەرى ساعات 13.00-دە, ال جارتىلاي فينال 9 ماۋسىم, جۇما كۇنى ساعات 14.00-دە باستالادى. تۋرنير جەڭىمپازدارى 10 ماۋسىم كۇنى ساعات 15.00-دە باستالاتىن فينالدىق جەكپە-جەكتەردە انىقتالاتىن بولادى.
عالىم
قوجابەكوۆ
