ەلوردادا قازاقستان رەسپۋبليكاسى كونستيتۋتسياسىنىڭ 25 جىلدىعىنا ارنالعان «اتا زاڭ: «جەتى جارعىدان» قازاقستان رەسپۋبليكاسى كونستيتۋتسياسىنىڭ 25 جىلدىعىنا دەيىن» تاقىرىبىندا ونلاين جيىن ءوتتى. وعان بەلگىلى قۇقىقتانۋشىلار, عالىمدار, مەملەكەتتىك قىزمەتكەرلەر مەن ۇكىمەتتىك ەمەس ۇيىمداردىڭ جەتەكشىلەرى, قالامىزدىڭ بەلسەندى جاستارى قاتىستى.
جيىندا ەلىمىزدىڭ كونستيتۋتسيالىق كەڭەسىنىڭ مۇشەسى راحمەت مۇقاشەۆ اتا زاڭدى ازىرلەۋ بارىسىنا شولۋ جاساپ, ونىڭ الەمدەگى كوپ ەلدىڭ كونستيتۋتسيالارىن زەردەلەي كەلە, ەلىمىزدىڭ كونستيتۋتسياسىنىڭ نەگىزى رەتىندە فرانتسيا كونستيتۋتسياسى الىنعانىن ايتتى. قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسى ديپلوماتيا ينستيتۋتىنىڭ پروفەسسورى, ەلىمىزدىڭ ءبىرىنشى سىرتقى ىستەر ءمينيسترى تولەۋتاي سۇلەيمەنوۆ اتا زاڭنىڭ قازىرگى قۇندىلىقتارىنا توقتالدى.
«قازىر قازاقستاننىڭ ءوز زاڭدى شەكاراسى بار. شەكاراسىز تاۋەلسىزدىك بولمايدى. ءبىزدىڭ ەلدىڭ تەرريتورياسىندا ورنالاسقان يادرولىق قارۋدىڭ ارسەنالىنان ءوز ەركىمەن باس تارتۋ مەملەكەت ەكونوميكاسىنا شەتەلدىك ينۆەستيتسيالاردى تارتۋعا مۇمكىندىك بەردى. ءوزىنىڭ سىرتقى ساياساتىنىڭ قالىپتاسۋى قازاقستاننىڭ الەمدىك ارەنادا جالپىعا تانىلعان ويىنشىعا اينالۋىنا مۇمكىندىك بەردى» دەپ اتاپ ءوتتى تولەۋتاي سۇلەيمەنوۆ.
نۇر-سۇلتان قالاسى اكىمىنىڭ ورىنباسارى باقتيار ماكەن ءوز سوزىندە نەگىزگى زاڭ قازاقستان حالقىنا تاڭداۋ قۇقىعىن بەرگەندىگىن اتاپ ءوتتى.
«ەلباسى كونستيتۋتسيانىڭ قوعام مەن ەل ومىرىندەگى ەرەكشە ءرولىن ۇنەمى ايتىپ كەلەدى. كەشە مەملەكەت باسشىسى اتاپ وتكەندەي, كونستيتۋتسيا ءبىزدىڭ تاۋەلسىزدىگىمىزدىڭ بەرىك قۇقىقتىق نەگىزىن جاسادى. مەملەكەتتىڭ جوعارى قۇندىلىقتارى ادام, ونىڭ ءومىرى, قۇقىقتارى مەن بوستاندىقتارى دەپ جاريالاندى. بۇل قۇجاتتا ەلدىڭ اۋماقتىق تۇتاستىعى, قوعامدىق كەلىسىم, ساياسي تۇراقتىلىق, زاڭنىڭ ۇستەمدىگى جانە دەموكراتيا پرينتسيپتەرى شوعىرلاندىرىلدى. جاڭا استانانىڭ دامۋى بۇكىل قازاقستاندى تۇبەگەيلى وزگەرتتى, ونى ەكونوميكالىق تۇرعىدان قۋاتتى جانە ساياسي تۇراقتى مەملەكەتكە, جاۋاپتى جانە بەدەلدى حالىقارالىق سەرىكتەسكە اينالدىردى. قازاقستاننىڭ استاناسى ءبىزدىڭ مەملەكەتىمىزدىڭ تاۋەلسىزدىك جىلدارىنداعى الەۋمەتتىك-ەكونوميكالىق جانە ساياسي جەتىستىكتەرىن بەينەلەيدى, ەلدىڭ قۋاتىن جانە ونى ودان ءارى دامىتۋدىڭ جوعارى الەۋەتىن كورسەتەدى» دەپ قورىتىندىلادى ونلاين جيىندا باقتيار ماكەن.
