جاڭا وقۋ جىلىنىڭ جاڭالىقتارى

جىلدا سارى كۇزبەن قاتار كەلەتىن ءبىلىم كۇنى مەرەكەسى دە جاقىنداپ قالدى. ەل بويىنشا جاڭا 2020-2021 وقۋ جىلىندا ورتا مەكتەپ وقۋشىلارىنىڭ جالپى سانى 3,3 ميلليون بالانى قۇرايدى. ەلورداسى – نۇر-سۇلتان قالاسىندا بيىل 202 مىڭنان اسا وقۋشىعا ءبىلىم بەرىلەدى دەپ بولجانىپ وتىر. وقۋ جىلى ادەتتەگىدەي 1 قىركۇيەكتە باستالادى. بىراق «العاشقى قوڭىراۋ» مەرەكەسى قازىرگى جاعدايعا بايلانىستى ونلاين فورماتتا وتەدى.

«كەزەكشى سىنىپتارعا» 42 مىڭ بالا بارادى

جاڭا وقۋ جىلىندا وقۋشىلار قاشىقتان وقىتىلا باستايدى. بىراق باستاۋىش سىنىپتارعا «كەزەكشى سىنىپتار» ۇيىمداستىرىلادى. بۇل رەتتە بارلىق سانيتارلىق شارالار قاتاڭ ساقتالادى. پەداگوگتەردىڭ 30 پايىزعا جۋىعى شتاتتىق رەجيمدە, ونىڭ ىشىندە كەزەكشى توپتاردا ساباق بەرۋ ءۇشىن جۇمىسقا شىعادى.
نۇر-سۇلتان قالاسى ءبىلىم باسقارماسىنىڭ مالىمەتىنشە, «كەزەكشى سىنىپتاردا» وقۋشىلار سانى 42 مىڭعا جۋىقتايدى. بۇل – قالاداعى بارلىق باستاۋىش سىنىپ وقۋشىلارىنىڭ 50 پايىزى. «كەزەكشى سىنىپتاردىڭ» جالپى سانى – 3002. قالادا بيىل ءبىرىنشى سىنىپقا باراتىن 26 مىڭ بالا تىركەلدى. «كەزەكشى سىنىپتاردا» وقۋعا ولاردىڭ اتا-انالارىنان 24 مىڭعا جۋىق ءوتىنىش كەلىپ ءتۇستى. وقۋ جىلىنان باستاپ بالالاردى مەكتەپكە جىبەرۋ, جىبەرمەۋ ماسەلەسىن اتا-انالارى شەشەدى. وقىتۋدىڭ ءوزى بىرنەشە توپقا بولىنەدى. ءبىر سىنىپتا وقىتىلاتىن وقۋشىلار سانى 15-تەن اسپايدى. ءبىر ساباقتىڭ ۇزاقتىعى 40 مينۋت بولادى. كۇنىنە 3-4 ساباقتان وتكىزىلەدى.

12 مىڭنان اسا مۇعالىم ونلاين كۋرستاردان ءوتتى

نۇر-سۇلتاندا 12 مىڭنان اسا پەداگوگ (مەكتەپ, كوللەدج پەداگوگتارى, بالاباقشا تاربيەشىلەرى) قاشىقتان وقىتۋدى ۇيىمداستىرۋ بويىنشا ونلاين-كۋرستاردان ءوتتى. بالالار, اتا-انالار جانە بالاباقشا قىزمەتكەرلەرى ءۇشىن جۇمىس الگوريتمدەرى جاسالدى. بارلىق نىساندار سانيتارلىق تالاپتارعا ساي دايىندالعان. بۇعان قوسا «ەلوردالىق ەلەكتروندى مەكتەپ» ەلەكتروندى پلاتفورماسى ازىرلەندى. وندا قىسقا مەرزىمدى ساباق جوسپارلارى, بەينەساباقتار, ءبىلىم بەرۋدىڭ تسيفرلىق رەسۋرستارى جانە ت.ب. ورنالاستىرىلعان. ءبىلىم بەرۋدىڭ بارلىق دەڭگەيلەرىندەگى پەداگوگتار ءۇشىن وسى پلاتفورما وڭاي ءارى قولجەتىمدى بولادى.

قاشىقتان وقىتۋدىڭ جايى قالاي؟

ال ورتا مەكتەپتەر قاشىقتان وقىتۋعا قانشالىقتى دايىن؟ «ءاليحان بوكەيحان اتىنداعى №76 مەكتەپ-ليتسەيدە قازىر 3021 وقۋشى بولسا, سونىڭ 453-ءى «كەزەكشى سىنىپتاردا» وقۋعا نيەت ءبىلدىرىپ وتىر. بىراق بۇل سان ءالى دە وزگەرۋى مۇمكىن. مەكتەبىمىز «كەزەكشى سىنىپتارعا» بالالاردى قابىلداۋعا دا, قاشىقتان وقىتۋعا دا دايىن. سانيتارلىق شارالار تولىعىمەن قامتاماسىز ەتىلدى. سانيتايزەرلەر, انتيسەپتيكتەر, ءتۇرلى باكتەريالدى سابىندار, قاجەتتى تەپلوۆيزورلار, توننەل, دەزينفەكتسيالاۋشى توسەنىشتەر ساتىپ الىندى. بەتپەردەلەر, قولعاپتار قاجەت مولشەردە بار. كەزەكشى توپتاعى وقۋشىلار سانى 15-تەن اسپاۋى كەرەك. وسىعان ساي مەكتەبىمىزدەگى سىنىپتار دا لايىق­تالىپ دايىندالدى» دەيدى مەكتەپ ديرەكتورى سافۋرا تولەكوۆا.
ونىڭ ايتۋىنشا, وقۋشىلار 15 مينۋتتىق ارالىقپەن مەكتەپكە كىرەدى. ياعني, تاڭەرتەڭ 08.00-دە ءبىر سىنىپتىڭ 15 وقۋشىسى قابىلدانسا, كەلەسى سىنىپ 15 مينۋتتان كەيىن كىرگىزىلەدى. سول سياقتى ساباقتاردىڭ اراسىنداعى ۇزىلىستەر ءار سىنىپقا ءارتۇرلى ۋاقىتپەن بەلگىلەنەدى. بۇل وقۋشىلاردىڭ ءبىر جەرگە شوعىرلانباۋى ءۇشىن ماڭىزدى, جالپى قاۋىپسىزدىك ماقساتىندا جاسالدى.
كەزەكشى سىنىپتارعا مۇعالىمدەردى ىرىكتەۋدە دە وزىندىك تالاپتارى بار. ەڭ الدىمەن, ۇستازدىڭ كەلىسىمى ماڭىزدى. ودان كەيىن مۇعالىمنىڭ جاسىنا كوڭىل بولىنەدى. ۇلكەن جاستاعى نەمەسە سوزىلمالى اۋرۋلارى بار, دارىگەرلىك ەسەپتە تۇرعان كىسىلەر ساباق بەرۋگە شاقىرىلمايدى. ال وقۋ جىلى قاشىقتان وتكىزىلگەنىنە قاراماستان ۇستازداردىڭ جالاقىسى سول كۇيى ساقتالادى.
– مەكتەبىمىزدەگى بارلىق پەداگوگ­تار جىل سايىنعى مەديتسينالىق تەكسەرىستەن ءوتتى. سونىڭ نەگىزىندە رۇقسات ەتىلگەن ماماندار عانا مەكتەپتە جۇمىس ىستەيدى. بۇعان قوسا, مەكتەپ ىشىندە «كەزەكشى سىنىپتار» بولعان ۋاقىتتا ەرەسەك ادامدار سانىن مەيىلىنشە ازايتامىز. تەك وسى سىنىپتاردىڭ پەداگوگتارى, تازالىق جۇمىسىن جۇرگىزەتىن قىزمەتكەرلەر, بالالاردىڭ قاۋىپسىزدىگىنە ارنايى بۇيرىقپەن بەكىتىلگەن ماماندار عانا قىزمەت ەتەدى, – دەيدى مەكتەپ ديرەكتورى.

وقۋلىقپەن قامتۋ – 100 پايىز

ءبىر سىنىپتا ءبىر مۇعالىم جۇمىس ىستەۋ قاعيداتى ساقتالادى. ال وقۋ جوسپارىنداعى بارلىق پاندەر مەكتەپتە وقىتىلمايدى. «كەزەكشى سىنىپتاردا» نەگىزگى پاندەردىڭ ساباعى عانا وتەدى. قالعان پاندەر ونلاين فورماتتا قاشىقتان جۇرگىزىلەدى.
ەلوردادا جاڭا وقۋ جىلىنا بالالاردى وقۋلىقتارمەن قامتۋ 100 پايىزدى قۇرايدى. بارلىق وقۋلىقتار ءبىلىم جانە عىلىم مينيس­تر­­­­لى­گى بەكىتكەن تىزىمگە سايكەس كەلەدى. قازىرگى كۇنى بارلىق باسپادان وقۋلىقتار جەتكىزىلدى. 1-5-سىنىپ پەن 10-11-سىنىپ وقۋشىلارىنا كىتاپتار تولىعىمەن بەرىلدى.

«ءبىلىم LAND» پلاتفورماسىندا وقيدى

كەشە جاڭا وقۋ جىلىنىڭ باستالۋىنا وراي ۇيىمداستىرىلعان ءباسپاسوز ءماسليحاتىندا نۇر-سۇلتان قالاسى ءبىلىم باسقارماسىنىڭ باسشىسى شولپان قادىروۆا مەكتەپتەردىڭ الداعى وقۋ جىلىندا قانداي پلاتفورمالارمەن قاشىقتان وقيتىنىن باياندادى.
– بارلىق مەكتەپتەردە «ءبىلىم LAND» پلاتفورماسىن پايدالانۋعا كەلىسىمشارت جاسالدى. ەلوردانىڭ 40 مەكتەبىندە «دارىن ونلاين» پلاتفورمالارى قولدانىلادى. ال باعالاۋ جۇيەسى ءوزىمىزدىڭ ءداستۇرلى «كۇندەلىك» ەلەكتروندى جۋرنالى ارقىلى جۇرگىزىلەدى. 30 تامىزدان باستاپ وقۋشىلار مەن مۇعالىمدەردىڭ بارىنە وسى پلاتفورمالار قولجەتىمدى بولادى. لوگين, پارولدارى بەلگىلەنىپ, تاراتىلدى, – دەيدى باسقارما باسشىسى.

بيىل 13 مەكتەپ پايدالانۋعا بەرىلەدى

بيىل ەلوردادا بىلتىرعىمەن سالىستىرعاندا ەكى ەسە كوپ مەكتەپ پايدالانۋعا بەرىلەدى. ءبىلىم باسقارماسى باسشىسىنىڭ مالىمدەۋىنشە, جىل سوڭىنا دەيىن 13 ورتا ءبىلىم بەرۋ نىسانىن پايدالانۋعا بەرۋ جوسپارلانۋدا. سونىڭ ىشىندە 7 مەكتەپ پەن 6 مەكتەپتىڭ قوسىمشا عيماراتى بار. جاڭا وقۋ جىلىنىڭ باسىندا 3 مەكتەپ پەن 2 قوسىمشا عيمارات پايدالانۋعا بەرىلەدى. قالعان ءبىلىم بەرۋ نىساندارى جىل سوڭىنا دەيىن اياقتالادى دەپ جوسپارلانىپ وتىر.

ينكليۋزيۆتى بىلىممەن قامتۋ ارتادى

باس قالادا ينكليۋزيۆتى بىلىمگە دە ەرەكشە كوڭىل بولىنگەن. ەگەر بىلتىر ينكليۋزيۆتى بىلىممەن قامتۋ 80 پايىز بولسا, بيىل بۇل كورسەتكىشتى 100 پايىزعا جەتكىزۋ جوسپارلانىپ وتىر. تۇڭعىش پرەزيدەنت – ەلباسى قورىنىڭ باس­تاماسىمەن ەكى جاڭا مەكتەپتىڭ نەگىزىندە 1 قىركۇيەككە دەيىن 30 ورىندىق 2 ينكليۋزيۆتى قولداۋ بولمەلەرى اشىلادى. شىلدەدەن باستاپ «اسىل ميراس» كابينەتى جۇمىس ىستەي باستادى. وندا حالى­قارالىق سەرتيفيكاتقا يە جانە زامانۋي ادىستەمەلەردى مەڭگەرگەن ماماندار جۇمىس ىستەيدى. قىركۇيەك­ ايىندا زياتكەرلىك قابىلەتى تومەن 100 بالاعا ارنالعان №3 ارنايى مەكتەپ, كۇزدە كورۋ قابى­لەتى ناشار بالالارعا ارنالعان بالاباقشا پايدالانۋعا بەرىلەدى.
جاڭا وقۋ جىلىندا ەلوردا مەكتەپتەرىندە قوسىمشا ءبىلىم بەرۋدىڭ 8 فيليالى جانە تاعى 2 قوعامدىق ورتالىق اشىلادى. جاڭا مەكتەپتەردىڭ ءبىرىنشى قاباتىندا بالالارعا ارنالعان شاعىن ورتالىقتار, وڭالتۋ ورتالىقتارى, بالاباقشالار, مەديتسينالىق كابينەتتەر سياقتى الەۋمەتتىك نىساندار جۇمىس ىستەي باستايدى.

ۇستازداردىڭ الەۋمەتتىك جاعدايى جاقسارادى

ۇستازداردىڭ الەۋمەتتىك جاعدايى دا نازاردان تىس قالماعان. بىلتىر قالا اكىمدىگى تاراپىنان مۇعالىمدەر تۇرعىن ءۇي ساتىپ الۋ ءۇشىن الەۋمەتتىك جاردەماقى تۇرىندە 1 ميلليون تەڭگە سوماسىنا وتەۋسىز نەگىزدە 275 تۇرعىن ءۇي سەرتيفيكاتى ءبولىندى. وسى جىلى دا مۇعالىمدەردىڭ تۇرعىن ءۇي جاعدا-يىن­ جاقسارتۋعا كومەك بەرىلەدى.
اتاپ ايتقاندا, بيىل «قازاقستاندىق يپوتەكالىق ۇيىممەن» 1 مىڭ الەۋمەتتىك پاتەر بەرۋ تۋرالى كەلىسىمگە قول قويىلدى. بۇل باسپاناعا مۇعالىمدەردەن باسقا مەديتسينا قىزمەتكەرلەرى, پوليتسەيلەر, الەۋمەتتىك قىزمەتكەرلەر, مادەنيەت جانە سپورت قىزمەتكەرلەرى دە ۇمىتكەر بولا الادى. بىلتىر جۇمىسىن ەندى باستاعان مۇعالىمدەردى قولداۋ ماقساتىندا 350 ورىندىق جاس پەداگوگتار ءۇيى سالىندى.
قالا اكىمدىگى مۇعالىمدەردىڭ كاسىبي دامۋىنا ۇنەمى كوڭىل بولەدى. اتاپ ايتقاندا, «Ozat» جوباسىن ىسكە اسىرۋ اياسىندا مەكتەپتەر مەن كوللەدجدەردىڭ 400 مۇعالىمى ءرىЅا تاپسىرمالارىنا ءبىلىم الۋشىلاردى دايارلاۋ بويىنشا بىلىكتىلىكتى ارتتىرۋ كۋرستارىندا وقۋدان ءوتتى. كەمبريدج ۋنيۆەرسيتەتىمەن بىرلەسىپ SHARE جوباسى ىسكە قوسىلدى. سونىڭ ىشىندە مۇعالىمدەر بىرلەسىپ زەرتتەۋلەر جۇرگىزەدى, اقپارات الماسادى, بىلىكتىلىگىن كوتەرۋ بويىن­شا باسقا دا جۇمىستار قاراس­تىرىلعان.