شىلدەنىڭ شىلىڭگىر ىستىعى كەلگەلى استانادا شومىلۋ ماۋسىمىنىڭ داۋرەنى ءجۇرىپ تۇر. قالالىق ساياباقتاعى جاعاجايعا اسىعاتىنداردىڭ قاتارى مولايا تۇسكەن. سەبەبى, ەلوردالىقتاردى كۇننىڭ اپتابىنان قۇتقارار ەركە ەسىل بيىلعى جازدا ناعىز دەمالىس مەكەنىنە اينالىپتى. سۋعا تۇسۋشىلەرگە ارنالعان وزەن جاعاسىنداعى جاعدايدى كورىپ قايتتىق.
تابالدىرىقتى اتتاماس بۇرىن وزگەرىستىڭ ەڭ العاشقىسى كوزگە تۇسەدى. جاعاجايعا كىرۋ قۇنى ەرەسەكتەرگە – 500 تەڭگە بولسا, 16 جاسقا دەيىنگى بالالارعا – 200 تەڭگە. زەينەتكەرلەرگە, مەكتەپ جاسىنا دەيىنگى بۇلدىرشىندەرگە, مۇمكىندىگى شەكتەۋلى ازاماتتارعا تەگىن بيلەت قاراستىرىلعان. مۇنداي باعاعا نارازىلىق تانىتىپ, جاعاجايدىڭ اقىسىز بولۋىن قالايتىن تۇرعىندار كەزدەسەدى. الايدا, جاعاجايدىڭ جۇمىسى كىرۋ قۇنىن اقتايدى ءارى ءبارى استانا قالاسى اكىمدىگىنىڭ تىكەلەي باقىلاۋىندا جۇزەگە اسۋدا.
تازالىعى تاڭداي قاقتىرادى
ماسەلەن, بيىلدان باستاپ جاعاجايعا تازا سۋ تارتىلعان. ياعني, وزەننەن شومىلىپ شىققان دەمالۋشىلار ىستىق پەن سۋىق سۋ اعاتىن دۋش قابىلداي الادى. التى كابينالى دۋش ەر مەن ايەلدەرگە تەڭ بولىنگەن. اشىق اسپان استىندا اياق-قول جۋعا ارنالعان ورىن دا سالىنعان ەكەن.
بىرنەشە جىلدان بەرى تالقىدان تۇسپەگەن ماسەلەنىڭ تاعى ءبىرى شەشىمىن تاپقان. ىستىقتا ءورشىپ كەتەتىن بيودارەتحانانىڭ جاعىمسىز ءيىسى جۇرتتى مازالامايدى. ەندى جاعاجاي اۋماعىندا تۇراقتى اجەتحانا ورنالاسقان. كيىم اۋىستىراتىن بولمە دە بار.
قالالىق جاعاجاي اكىمشىلىگى مۇنداعى تازالىق پەن قاۋىپسىزدىكتى ءبىرىنشى ورىنعا قويادى:
– شىنى ىدىستاعى سۋسىندى كۇزەتتەن وتكىزە المايسىز. سەبەبى, بوتەلكەنىڭ سىنىقتارى بىرەۋدى جارالاۋى مۇمكىن. يت-مىسىعىن ەرتە شىققانداردى مۇلدە كىرگىزبەيمىز. بۇرىندارى وزەن جاعاسىندا ءبىر رەتتىك ىدىستىڭ قالدىقتارى, تسەللوفان سەكىلدى نەشە ءتۇرلى نارسەلەر شاشىلىپ جاتاتىن. ارنايى قوقىس جاشىكتەرىن قويىپ ەدىك, تۇرعىندار قازىر ءوز زاتتارىنا ۇقىپتى. ادامدار تەمەكى تۇقىلىن قۇمنىڭ ۇستىنە تاستاي سالاتىن. قوعامدىق ورىن بولعان سوڭ, شىلىم تارتاتىندارعا ارنايى ەكى جەردى بەلگىلەپ بەردىك, – دەيدى جاعاجاي باسشىسى ارسەن تۇسىپبەكوۆ.
قاۋىپسىزدىك قاتاڭ قاداعالاۋدا
ساعات 10.00-20.30 ارالىعىندا قىزمەت كورسەتەتىن قالالىق جاعاجايدا ادەمى اۋەندەر ويناپ تۇرادى. ارا-تۇرا جۇزۋشىلەرگە حابارلاندىرۋ ايتىلادى. «سۋعا تۇسكەندە اباي بولىڭىزدار, مەجەدەن ارى اسۋعا تىيىم سالىنادى» دەپ داۋىستادى اكىمشىلىك. قاۋىپسىزدىك قىزمەتىن سۇرادىق وسى كەزدە. 5 قۇتقارۋشى, 1 قايىق بار ەكەن جاعاجايدا. قايىقتىڭ سانىن ازسىنىپ ەدىك, ارسەن: «كەرىسىنشە, قايىقتى وتالدىرىپ جۇرگىزەمىن دەگەنشە ۋاقىتتى جوعالتامىز. قۇتقارۋشىلار 50 مەتر قاشىقتىقتى 42 سەكۋندتا وتكەرەدى. ال, قالقىما بەلگىنىڭ جاعادان ۇزاقتىعى – 4 مەتردەي. ياعني, باتىپ بارا جاتقان ادامعا 10-12 سەكۋندتا ءجۇزىپ بارادى. قۇداي بەتىن اۋلاق قىلسىن, ماۋسىم باستالعالى سۋعا باتقاندار بولعان جوق» دەيدى. قايعىلى وقيعالاردىڭ سيرەۋىنىڭ بىردەن-ءبىر سەبەبى – جاعاجايدا الكوگول, سىرا ىشۋگە تىيىم سالىنعان. ماس ادامدارعا دا كىرۋگە بولمايدى. سونداي-اق, كوپىردەن سەكىرۋگە دە رۇقسات جوق.
تاعى ءبىر ەسكەرەتىن جايت, 16 جاسقا تولماعان جەتكىنشەكتەر قالالىق جاعاجايعا وزدەرىنە جاۋاپتى ۇلكەندەرمەن عانا كىرە الادى ەكەن.
دەمالۋشىلارعا ۇسىنىلاتىن قىزمەت تۇرىنە كەلەر بولساق, جاعادا 38 كۇنشاتىرى قويىلعان. سۇرتىنەتىن تازا ورامالدار, جۇزۋگە ارنالعان دوڭگەلەكتەر, جاتۋعا ىڭعايلى ورىندىقتار, ءدامحانا دا بار. بيىلعى جاڭالىقتىڭ تاعى بىرەۋى – بالالار الاڭقايى. بۇل جەردە كىشكەنتايلارعا شاقتالعان باسسەين, بالىق اۋلايتىن ويىنشىقتار سەكىلدى قىزىقتار كوپ.
سۋعا ءتۇسىپ سالقىندايسىز, كولەڭكەدە جاتىپ دەمالاسىز, ءتىپتى بوي جازىپ فۋتبول, ۆولەيبول وينايتىن سپورتتىق الاڭ دا نازاردان تىس قالماعانى قۋانتارلىق.
ەسىلدىڭ بويى رومانتيكا
استانالىقتاردىڭ بەلسەندى دەمالىسىنا لايىقتالعان ەسىل اۋدانىنداعى جاعاجايداعى قىزمەتتىڭ ءبارىن استانا قالاسى كوممۋنالدىق شارۋاشىلىق باسقارماسى رەتتەيدى.
ەسىل وزەنىنىڭ ساپاسىنا توقتالار بولساق, بيىلدىققا وزەننىڭ ءتۇبىن ەكى رەت تازالاعان. سۇڭگۋىرلەر اۋەلى سۋدىڭ استىندا جينالعان بوگدە زاتتاردى الىپ شىققان. بۇدان كەيىن ارنايى قۇرىلعىمەن ساز-بالشىعى سورىلدى. «ماماندار سۋدىڭ ساپاسىن تەكسەرۋ ماقساتىندا جۇيەلى تۇردە سىنامالاردى الىپ كەتەدى. ناتيجەسى – شومىلۋعا جارامدى. بۇگىندە ەسىلدىڭ بويىنان ونداتر, كامشات سەكىلدى تەرىسى باعالى جانۋارلاردى كەزدەستىرۋگە بولادى. تابيعات زاڭىنا سايكەس, ولار تەك تازا جەرلەردى مەكەندەيتىنى بەلگىلى» دەيدى ارسەن ءامىرجانۇلى.
ەسىلدىڭ جاعاجايى – رومانتيكالىق مەكەن. جىل سايىن مۇندا سۇيىكتىسىنە توسىنسىي جاساپ, سەزىمىن بىلدىرەتىن جىگىتتەر ءجيى كەلەدى, اق كويلەك پەن سموكينگ كيگەن جاس جۇبايلار دا وزەن جاعاسىندا سەرۋەندەپ قايتۋدى داستۇرگە اينالدىرعان.
ءمادينا جاقىپ
