– جانداربەك, ەڭ العاش كىممەن ايتىستىڭىز؟
– ەڭ العاش 6-سىنىپتا جامبىل جاباەۆتىڭ تويىندا باعدات سارسەنباەۆ دەگەن نارىنقولدىڭ بالاسىمەن ايتىستىم. ول 10 سىنىپتا وقيتىن. سول ايتىستان باس جۇلدە الىپ, ءتۇرلى-ءتۇستى تەلەديدار العانىم ەسىمدە. سول تەلەديدار ۇيدە ءالى تۇر.
– وسىعان دەيىن قانشا ايتىسقا قاتىستىڭىز, نەشە كولىك ءمىندىڭىز؟– قانشا ايتىسقا قاتىسقانىم ەسىمدە جوق. ساناسام, وسى ۋاقىتقا دەيىن 14 كولىك ءمىنىپپىن.
– سىزدەر كەيدە ايتىستا ازىلدەسىپ وتىرىپ ءبىراز جەرگە بارىپ قالاسىزدار. ايتىس ساحنانىڭ ارعى جاعىندا جالعاسىپ, ءبىر-بىرلەرىڭىزگە وكپە ايتاسىزدار ما؟
– مەن ءوزىم ءبىر اقىنعا وكپە ايتقان ەمەسپىن. بىراق ماعان وكپەلەگەندەر بولدى. مەنىڭشە, ول دۇرىس ەمەس. ءبىر اۋىز سوزدەن ولگەن حالىقتىڭ ۇرپاعىمىز عوي. ايتىس – ول ءسوزدىڭ مايدانى. ساحناعا شىققان ەكەنسىڭ, اياعىنا دەيىن ايقاسۋ كەرەك. شىن مانىندە, ايتىس سۋىرىپ سالمالىق ونەر بولعاندىقتان, ەموتسياعا بەرىلىپ كەتەتىن كەزدەر بولادى.
ايتىس بىرەۋدىڭ كوڭىلىنە جاعىپ, بىرەۋلەرگە جاعا بەرمەيدى. ايتىسقان اقىن ەشكىمگە رەنجىمەۋ كەرەك دەپ ويلايمىن. بارلىعىنا دايىن بولعان ءجون. سوندىقتان, قارسىلاسىنا اقىنداردىڭ وكپەلەۋگە قاقىسى دا جوق.
– كىممەن ايتىسۋدى ارماندايسىز؟
– ءوزىم ارمانداعان اقىنداردىڭ بارىمەن ايتىستىم دەسەم بولادى. بۇرىنعى اقىنداردىڭ ىشىندە مەلس قوسىمباەۆ, مۇحامەتجان تازابەكوۆ سىندى اعالارىمىزبەن ايتىسۋدى ارماندايمىن. بالا كەزىمىزدە وسى كىسىلەردىڭ ايتىستارىن كورىپ وستىك, ەلىكتەدىك. وسىنداي اقتاڭگەرلەرمەن ايتىسىپ, تارتىسىپ كورگىمىز كەلدى. بىراق ءبىز كەمەلىمىزگە كەلگەندە, بۇل اعالارىمىز ايتىستى قويىپ كەتتى. بىراق ەلدىڭ ىشىندە جۇرگەن ازاماتتار عوي, ايتەۋىر ءبىر ايتىسىپ قالاتىن شىعارمىز. باياعىدا مارقۇم ورازالى دوسبوسىنوۆ اعامىزبەن دە ايتىسقىم كەلەتىن.
– اقىنداردىڭ ىشىندە كىمنەن ىعاسىز؟ قاپى قالام-اۋ دەپ قاۋىپتەنەتىن قارسىلاسىڭىز بار ما؟
– ونداي قورقىنىش جوق. ويتكەنى, ۇلكەن ساحناعا شىققانىما ءتورت-بەس جىل بولدى. سول ۋاقىتتا اقىنداردىڭ بارلىعىمەن كەمىندە ەكى-ءۇش رەتتەن ايتىستىم. ءبارىنىڭ قىر-سىرىن بىلەم دەسەم بولادى.
جالپى, ايتىسقا بەلسەندى تۇردە قاتىسىپ جۇرگەن جيىرما بەسكە جۋىق اقىن بار. سول اقىنداردىڭ بارلىعى مىقتى. بىرەۋدەن-بىرەۋ ىعاتىنداي ەمەس.
– قازىلار قۇرامىنان كىمدەردى كورگىڭىز كەلەدى؟
– ايتىسكەر اقىنداردى كورگىم كەلەدى. ءسوز, ولەڭ تۇسىنەتىن ادامداردى. ولەڭنىڭ استارىن باعامداي الاتىن, ويدىڭ سالماعىن سارالاي الاتىن ازاماتتاردى. تەك ءىستىڭ اق-قاراسىن اجىراتىپ, قارا قىلدى قاق جاراتىن, ءسوز تۇسىنەتىن, ايتىستىڭ تابيعاتىن تۇسىنەتىن جاندار بولسا, دۇرىس بولار ەدى.
– تويعا شىعىپ تۇراسىز با؟
– مەن اسابا ەدىم دەپ, ءوزىم توي ىزدەمەيمىن. كىسىلەردىڭ وتىنىشىمەن, كوڭىلدەرىن قالدىرماي, مىندەتتى تۇردە بارامىن. بىراق, اقىنداردىڭ توقسان پايىزى تويمەن كۇن كورىپ وتىرمىز.
– قۇپيا بولماسا, ءبىر توي ءۇشىن قانشا الاسىز؟
– قالانىڭ ءىشى بار, سىرتى بار دەگەندەي, 1000 دوللاردان باستالادى.
– ايتىسكەر اقىنداردان كىمدەرمەن جاقىن ارالاساسىز؟
– جاس تولقىنداردىڭ ىشىنەن تورەعالي اليحانوۆپەن وتە جاقىن ارالاسامىن. وزىمە دەيىنگىلەردەن رينات زايىتوۆ, بالعىنبەك يماشەۆ, بەكارىس شويبەك, اينۇر تۇرسىنباەۆا, مۇحتار نيازوۆ بار.
– ايتىستارىڭىزدى جيناق قىلىپ شىعارۋ ويىڭىزدا بار ما؟
– بارلىعىن جيناق قىلىپ شىعارماسام دا, ءساتتى دەگەن, كوڭىلىمە جاعاتىن ايتىستاردى شىعارسام دەيمىن. مىسالى, اكەم ەكەۋمىزدىڭ ايتىسىمىز. بىراق, ونىڭ بەينەتاسپاسىن «حابار» اگەنتتىگىنىڭ مۇراعاتىنان الۋ وڭاي بولماي تۇر. بۇيىرتسا, بولاشاقتا شىعارىپ قالارمىز.
– بوس ۋاقىتىڭىزدا نەمەن اينالىساسىز؟
– ءدال جازدىڭ كەزىندە بوس ۋاقىت بولا بەرمەيدى. ءجۇرىس كوپ, تويعا شىعامىز. وتباسىن اسىراۋ كەرەك.
– سۇحباتىڭىزعا راحمەت!
ەركەجان ساتىمبەك
