ەلباسىنىڭ قازاقستاندى الەۋمەتتىك جاڭعىرتۋ باعىتىنداعى تاپسىرمالارى توڭىرەگىندە سارىارقا اۋدانى اكىمدىگىنىڭ اپپاراتى ۇيىمداستىرعان دوڭگەلەك ۇستەل باسىندا اڭگىمە ءوربىدى. تاقىرىپ توڭىرەگىندە وي ءبولىسۋ ءۇشىن باسقوسۋعا «نۇر وتان» حدپ «سارىارقا» اۋداندىق فيليالىنىڭ كەڭەسشىسى, قر قارجى پوليتسياسى اگەنتتىگى جانىنداعى سىبايلاس جەمقورلىقپەن كۇرەس بويىنشا كەڭەستىڭ مۇشەسى ارمان نۇرعازين ارنايى قاتىستى.
جيىننىڭ باس قوناعىنىڭ ايتۋىنشا, باتىستىڭ دامىعان ەلدەرى قارىزعا بەلشەسىنەن باتىپ, داعدارىس شىرماۋىنا شىرمالىپ جاتقان تۇستا قازاقستان باسشىسىنىڭ حالقىن «جالپىعا ورتاق ەڭبەك قوعامىن» قۇرۋعا شاقىرۋىن ۇلكەن كورەگەندىلىك دەپ قابىلداعان ءجون.
بايلىق تا, بەرەكە دە ەڭبەكپەن كەلەتىنى بەلگىلى.
ەلىمىزدە ەڭبەك ەتكىسى كەلەتىن كىسىگە جۇمىس ورنى مىندەتتى تۇردە تابىلادى. الەمدى داعدارىس وتى شارپىعان تۇستا قازاقستان تمد ەلدەرىنىڭ ىشىندە ءبىرىنشى بولىپ سىنعا تۇسكەنى بەلگىلى. دەسە دە, وتپەلى قيىنشىلىقتاردى تابىستى ەڭسەرە ءبىلدى. الەمدى داعدارىس بيلەپ, جۇمىسسىزدىق ۋشىعىپ تۇرعان تۇستا قازاقستاندا جاڭا جۇمىس ورىندارى اشىلا باستادى.
ماسەلەن, وسى جىلدارى تۇراقتى جۇمىسى بار قازاقستاندىقتاردىڭ 80 پايىزى ءوز قىزمەتتەرىن ساقتاپ قالدى. ويتكەنى, ەلباسىنىڭ باستاماسىمەن دەر كەزىندە قولعا الىنعان «جۇمىسپەن قامتۋ 2020» باعدارلاماسى جۇمىسسىزدىقپەن كۇرەستىڭ ءتيىمدى تەتىگىنە اينالدى.
وسىلاردى ايتا كەلە, ارمان نۇرعازين 20 تاپسىرمانىڭ بارلىعى دا سالاماتتى قوعام قۇرۋعا, ساۋاتتى ۇرپاق تاربيەلەۋگە, وركەنيەتتى ەلدەر ونەگەسىنەن ۇلگى الۋعا, الەۋمەتتىك ەڭبەك قارىم- قاتىناسىن دامىتۋعا باعىتتالعانىنا توقتالدى.
دوڭگەلەك ۇستەل باسىندا ەل ەكونوميكاسىنىڭ وركەندەۋىنە كەدەرگى بولىپ وتىرعان, قوعامداعى ەڭ باستى قاۋىپ-قاتەر سانالاتىن سىبايلاس جەمقورلىقتىڭ الدىن الۋ شارالارى جايىندا دا ءسوز قوزعالدى.
مەملەكەت باسشىسى «2006-2010 جىلدارعا ارنالعان سىبايلاس جەمقورلىقپەن كۇرەس» باعدارلاماسىن بەكىتكەنى بەلگىلى. «جەمقورلىقپەن كۇرەس قارقىن الىپ كەلەدى دەگەنىمىزبەن, زاڭعا باعىنعىسى كەلمەيتىندەر ءالى دە بارشىلىق. مەملەكەتتىك ورگان قىزمەتكەرلەرىنىڭ وزگەنىڭ تاعدىرىنا نەمقۇرايدى قاراۋى, كەي شەنەۋنىكتەردىڭ قاناعاتسىزدىعى, ءبىر جاپىراق انىقتاما قاعازىن الۋ ءۇشىن شەتى مەن شەگى جوق كەزەكتىڭ ءوزى مەملەكەتتىك قىزمەتكەرلەردى پارا الۋعا يتەرمەلەيدى»,– دەدى ارمان اسقارۇلى.
سونىمەن قاتار, حالىقتىڭ سىبايلاس جەمقورلىق تۋرالى تۇسىنىگىنىڭ تومەندىگى وسىنداي جاعدايعا اكەلىپ سوعۋدا. سوندىقتان, مۇنداي اۋىر كەسەلدى تەك مەملەكەتتىك جانە قۇقىق قورعاۋ ورگاندارى قىزمەتكەرلەرى عانا ەمەس, بۇكىل حالىق بولىپ قولعا الساق قانا توقتاتۋعا بولادى دەستى جينالعاندار.
شىنار دوسان
