قازاق ءتول سپورتتان قاشاندا كەندە بولعان ەمەس. سولاردىڭ ءبىرى – ادامنىڭ اقىلىن دامىتىپ, وي-ءورىسىن كەڭەيتۋگە سەبەپشى بولاتىن توعىزقۇمالاق.
ەجەلگى داۋىرلەردەن وزىنە ساي ەرەجەسى قالىپتاسقان ءتول ويىنىمىزدى قازىرگى دويبى, شاحمات سىقىلدى سپورت تۇرلەرىمەن تەڭ دارەجەدە كورسەك تە بولادى.
قازىرگى ۋاقىتتا ۇلتتىق سپورتتىڭ شاشباۋىن كوتەرىپ, قاي سالادا بولماسىن, قازاقتىڭ دا ءتورت قۇبىلاسى تۇگەل ەكەنىن تانىتىپ جۇرگەن ازاماتتارىمىز بار. سولاردىڭ ءبىرى رەتىندە «توعىزقۇمالاق ەسەپتەرى مەن ەتيۋدتەرى», «توعىزقۇمالاقتىڭ تەلەديدارلىق ساباقتارى» سىندى جاڭا كىتاپتاردىڭ اۆتورى ماقسات شوتاەۆتى اتاۋعا بولادى.
ول سياسى ءالى كەۋىپ ۇلگەرمەگەن كىتاپتارىندا توعىزقۇمالاقتىڭ تەلەديدارلىق ساباقتارى مەن شىعارماشىلىعى تۋرالى كەڭىنەن توقتالعان. سونداي-اق, ەسەپ پەن ەتيۋد جانرىنىڭ وزىندىك ەرەكشەلىكتەرىن ناقتى مىسالدارمەن كورسەتىپ, وسى سپورتتىڭ نەگىزگى تەورياسىن قالاعان ءا.اقشوراەۆ ەڭبەكتەرىنىڭ قۇندى تۇستارىنا توقتالادى. قوس كىتاپ ۇلتتىق ويىنعا قىزىعاتىن ءارى شۇعىلداناتىن جانە شەبەرلىگىن ارتتىرعىسى كەلەتىن وقىرماندارعا ارنالعان.
