ەلورداداعى «Keruen city» ساۋدا جانە ويىن-ساۋىق ورتالىعىندا ادامداردان ءزابىر كورگەن ءۇي جانۋارلارىنىڭ جاعدايىن وزەك ەتكەن «مەن سەزەمىن» اتتى ەرەكشە كورمە اشىلدى. قايىرىمدىلىق شارانى وتكىزۋگە قالا اكىمدىگى قولداۋ كورسەتكەن.
كورمەگە رۋسلان حاسانوۆ, تيمۋر جۇماتوۆ, انار مايكوپوۆا, ەلەنا پولياكوۆا, ەلەنا سىچەۆا, يرينا احماديەۆا, ليليا باترەەۆا, ءسانيا قۇدايقۇلوۆا سەكىلدى قالاعا ەسىمدەرى جاقسى تانىس سۋرەتشىلەردىڭ جۇمىستارى قويىلعان. ءار سۋرەتتەن ءبىر وقيعانى كورۋگە بولادى. كوزدەرى جاۋتاڭداعان جانۋارلاردىڭ ىشكى الەمىن سەزگەندەي كۇي كەشەسىز. شارانى ۇيىمداستىرۋشىلار بۇل كورمەنى كورگەن جاننىڭ تيتتەي بولسا دا جانۋارلارعا دەگەن جاناشىرلىعى ويانادى دەگەن سەنىمدە ەكەندىكتەرىن جاسىرمادى.
«ءبىز كورمەنى وسىمەن ەكىنشى جىل وتكىزىپ وتىرمىز. بىلتىر شاراعا 60-قا تارتا ادام قاتىسسا, بيىل ونىڭ سانى 250-گە جەتىپ وتىر. بۇل ءبىزدى قۋانتادى. ءبىز ادامداردىڭ ءوز «دوستارىن» ساتىپ العانىن ەمەس, ولاردى جانۋارلار ۇيىنەن العانىن قالايمىز. كورمەدەگى ءار سۋرەتتە تەرەڭ سىر جاتىر. قۇتقارۋشى ادام عانا ەمەس, جانۋار دا بولا الادى. مىسالى, كۇيەۋى ومىردەن وزعاندا, ايەلدىڭ كۇيزەلىستەن شىعۋىنا كومەكتەسكەن ءيتتىڭ سۋرەتى تۇر وسىندا. قازىر ولار – اجىراماس دوستار» دەدى قايىرىمدىلار كلۋبىنىڭ نەگىزىن قالاعان گۇلميرا ابدىراشەۆا.
كەلۋشىلەر كورمەدەگى تۋىندىلاردى تەگىن تاماشالايدى. ال ەرىكتى تۇردە قايىرىمدىلىق شاراعا قول ۇشىن سوزعىسى كەلەتىندەرگە ارنايى جاشىك قويىلعان. جينالعان قاراجات «كوۆچەگ» جانۋارلار ءۇيى مەن ولارعا ارنالعان ەكپەلەرگە, زارارسىزداندىرۋ شارالارىنا, جانۋارلار ازىعىنا جۇمسالادى.
الەمدە ءۇي جانۋارلارىن قورعاۋعا ارنالعان شارالار ءجيى وتكىزىلەدى. وندا ادامداردى جانۋارلارعا مەيرىمدى قاراۋعا شاقىرادى. ەلوردا اكىمدىگى وسى ماسەلەنى ەسكەرە وتىرىپ, ءۇيسىز-كۇيسىز جۇرگەن جانۋارلاردىڭ سانىن ازايتۋ ماقساتىندا بىرقاتار يگىلىكتى ىستەردى قولعا العان. «استانا جاستارى» ورتالىعىنىڭ ديرەكتورى مۇحامەدجان بولىسبەكتىڭ ايتۋىنشا, قازىرگى كۇندە باس شاھاردا 4 گا جەرگە بايلانىس زووباعى بار جانۋارلارعا ارنالعان ءۇيدى ورنالاستىرۋ جوباسى ازىرلەنۋدە. وسى جوبانىڭ جۇزەگە اسۋىنىڭ ناتيجەسىندە ەلوردالىقتار زووباقتا سەرۋەندەپ ءجۇرىپ, وزىنە ۇناعان جانۋاردى اسىراي الادى.
ايتا كەتەيىك, كورمە 6 ساۋىرگە دەيىن جالعاسادى.
ازامات ەسەنجول
