ۇلتتىق اكادەميالىق كىتاپحانادا قازاقستاننىڭ حالىق جازۋشىسى, ەڭبەك ەرى, كورنەكتى مەملەكەت جانە قوعام قايراتكەرى ءابىش اعامىزدىڭ نەمەرەسى ابىل كەكىلباەۆپەن كەزدەسۋ بولدى.
بۇرىن اۋىلداعى قاريالار تەكتى ادامنىڭ ۇرپاعىن كورسە «جاقسىنىڭ كوزى عوي» دەپ الدىنان قۇراق ۇشىپ, سىيلاپ جاتۋشى ەدى. مۇندا قازاقى ءداستۇر مەن جاقسىعا دەگەن قۇرمەت جاتىر. بۇگىندە اسىلدىڭ سىنىعى ابىل قر يندۋستريا مەن ينفراقۇرىلىمدىق دامۋ مينيسترلىگىندە جاۋاپتى قىزمەتتە ىستەيدى. ەلىمىزدەگى اۆياتسيا سالاسىنىڭ دامۋىنا ۇلەس قوسىپ جۇرگەن تاجىريبەلى مامان.
كەزدەسۋدە تالاپتى جاس زامانداستارىنا جازۋشى اتاسىنىڭ ءومىرى مەن شىعارماشىلىعى تۋرالى سالماقتى وي ءوربىتتى. قابىرعالى قالامگەردىڭ قىزىقتى وقيعالارى مەن قاناتتى سوزدەرىن ايتىپ بەردى. قازىر ابىل اتاسىنىڭ ارتىنداعى قالعان مۇراعاتىنا باس-كوز بولىپ, ونى جۇرشىلىققا ناسيحاتتاۋدى قولعا العان. بيىل حالىق جازۋشىسىنىڭ تۋعانىنا 80 جىل تولىپ وتىر. الىپ تۇلعانىڭ نەمەرەسى وسى باعىتتا اتقارىپ جاتقان ءوز جوسپارىمەن ءبولىستى.
