بيىل ەلوردا مەكتەپتەرىنەن 10 مىڭعا جۋىق وقۋشى تۇلەپ ۇشتى. 280 وقۋشى – «التىن بەلگى» يەگەرى, 607-ءسى ۇزدىك وقۋشى اتاندى. استانادا العاش رەت مەكتەپ تۇلەكتەرىنىڭ قۇرمەتىنە ارنالعان كونتسەرت ءوتتى. تۇلەكتەر مەرەكەسىنە استانا قالاسىنىڭ اكىمى جەڭىس قاسىمبەك قاتىسىپ, ۇلكەن ومىرگە قادام باسقان جاستارعا ساتتىلىك تىلەدى.
شات-شادىمان ءىس-شارانىڭ بارىسىندا تۇلەكتەردىڭ كوڭىلى كوتەرىلىپ, ارمان-ماقساتتارىمەن ءبولىستى. ەلوردا اكىمى جاستار الدىندا ءسوز سويلەدى.
«قۇرمەتتى تۇلەكتەر, سىزدەر ۇلكەن ومىرگە قادام باسقالى تۇرسىزدار. الدارىڭىزدا جاڭا مۇمكىندىكتەر اشىلىپ, جارقىن بولاشاعىمىزدىڭ كوكجيەگى كورىندى. ارالارىڭىزدا بولاشاق ۇستازدار, دارىگەرلەر, IT-ماماندارى, ينجەنەرلەر, مەملەكەتتىك قىزمەتشىلەر جانە ت.ب. بار. ءبىلىم جولىندا عانا ەمەس, قوعامدىق ومىردە دە جاقسى قىرلارىڭىزبەن كورىندىڭىزدەر. ءبىرازىڭىز ەرىكتىلەر قاتارىندا بولدىڭىزدار. بۇل يگى ءىستى ءارى قاراي دا جالعاستىرا بەرەتىندەرىڭىزگە سەنىمدىمىن!
مەملەكەت باسشىسى قاسىم-جومارت توقاەۆ جۋىردا وتكەن قۇرىلتايدا وسكەلەڭ ۇرپاق وتكەننىڭ تاجىريبەسى مەن بولاشاقتىڭ كوكجيەگىن ۇشتاستىرا وتىرىپ, ۇلتتىق رۋحتى جاڭعىرتىپ جاتقانىن ەرەكشە اتاپ ءوتتى.
مەملەكەتتىڭ مىندەتى – وسى وڭ سەرپىندى ساقتاپ قالۋ جانە ونى ەسەلەپ ارتتىرۋ.
سىزدەر – ءبىزدىڭ ءۇمىتىمىز, بولاشاعىمىزسىزدار. ءوز بولاشاقتارىڭىز – ءوز قولدارىڭىزدا. تىنىمسىز ەڭبەك پەن ءبىلىمنىڭ ارقاسىندا بيىك بەلەستەردى باعىندىرىپ, ارماندارىڭىز بەن ماقساتتارىڭىزعا جەتەسىزدەر!
قاتەلىك پەن ساتسىزدىكتەن جاسقانباڭىزدار. ۇلى عالىمداردىڭ ءبىرى توماس ەديسون بىلاي دەگەن: «مەن ساتسىزدىككە ۇشىراعان ەمەسپىن, تەك دۇرىس ەمەس 10 000 ءتاسىلدى قولدانىپپىن». ۇلكەن ومىرگە باسقان ءساتتى قادامدارىڭىز قۇتتى بولسىن! بۇگىنگە دەيىن جيعان بىلىمدەرىڭىز – ۇستازدارىڭىز بەن اتا-انالارىڭىزدىڭ قاجىرلى ەڭبەگىنىڭ ناتيجەسى.
بيىك شىڭداردى باعىندىرا بەرىڭىزدەر! ءبىز سىزدەردى كەز كەلگەن ۋاقىتتا قولداپ, جاندارىڭىزدان تابىلامىز: ءبىلىم الىپ, كارەرا قۇرۋ ءۇشىن جانە قالادا قولايلى ءومىر ءسۇرۋ ءۇشىن ءتيىستى جاعدايدىڭ ءبارىن جاسايمىز» دەدى ەلوردا اكىمى تۇلەكتەرگە ارناعان سوزىندە.
