جاستار شابىتىن شىڭدايدى
«استانا وپەرا» مەملەكەتتىك وپەرا جانە بالەت تەاترىندا تۇڭعىش قازاقستاندىق «يۋنەسكو كلۋبتارى شىعارماشىلىق اكادەمياسى» قاتىسۋشىلارىنىڭ قورىتىندى گالا-كونتسەرتى ءوتتى.
تۇڭعىش «يۋنەسكو كلۋبتارى شىعارماشىلىق اكادەمياسىنىڭ» ستۋدەنتى اتانۋعا 12-17 جاس ارالىعىنداعى 500-دەن اسا ۇمىتكەرلەر بەينەلەۋ, حورەوگرافيالىق, اسپاپتى جانە ۆوكالدى ونەر نوميناتسيالارى بويىنشا ونەر كورسەتكەن. اقتىق سىنعا وتكەن 100 جەڭىمپاز ءوز جۇمىستارىنىڭ قورىتىندىسىن ەلوردا تۇرعىندارى مەن قالا قوناقتارىنا ۇسىندى. قورىتىندى كەشتەگى تولعاندىراتىن جانە ارباپ الاتىن تۋىندىلار, اسەرلى جانە جارقىن ىرعاقتار, اسەم بيلەر, كوركەم سۋرەتتەر مەن ءمۇسىندەر – وسىنىڭ بارلىعى ەلىمىزدىڭ ۇزدىك تالىمگەرلەرى مەن ەڭبەك ءسىڭىرگەن قايراتكەرلەرىنىڭ 80 ساعاتتان استام قاجىرلى ەڭبەگىنىڭ ءناتيجەسى ەكەندىگىن اتاپ وتكەن ءجون.
– بايقاۋ جونىندە ەستي سالا قاتىسۋعا نيەتتەنىپ, «يۋنەسكو كلۋبتارى شىعارماشىلىق اكادەمياسىنىڭ» ۇيىمداستىرۋشىلارىنا «اعايشا» اتتى حالىق ءانىن ورىنداپ, جۇمىسىمدى ۆيدەو ارقىلى جولداعان ەدىم. ۇسىنعان ءانىم ۇيىمداستىرۋشىلاردىڭ كوڭىلىنەن شىعىپ, فينالدىق بايقاۋعا قاتىسۋعا جولداما الدىم. اقتىق كونتسەرتتە حالىق ءانى «اقەركەنى» ورىندادىم. فينالعا قاتىسقان 100 بالا ءبارىمىز ءبىر ءۇيدىڭ بالاسىنداي بولىپ كەتتىك. بۇل بايقاۋ ماعان ۇلكەن ءبىر مەكتەپ بولدى. «استانا وپەرا» تەاترىنىڭ ساحناسىندا ونەر كورسەتۋگە مۇمكىندىك بەردى» دەيدى فينالدىق باسەكەگە قاتىسقان استانالىق ونەرپاز بايان جۇبانوۆا.
«يۋنەسكو كلۋبتارى شىعارماشىلىق اكادەمياسى» – بۇل قازاقستان رەسپۋبليكاسىنىڭ تۇڭعىش پرەزيدەنتى – ۇلت كوشباسشىسى قورى جانە قازاق ۇلتتىق ونەر ۋنيۆەرسيتەتىمەن بىرلەسىپ اتقارعان بىرەگەي جوبا. جوبانىڭ ماقساتى – جاستاردى تولەرانتتىق رۋحتا تاربيەلەۋ مەن مەملەكەتتىڭ بولاشاق شىعارماشىلىق الەۋەتىن قالىپتاستىرۋ ماقساتىندا قازاقستان رەسپۋبليكاسىنىڭ شىعارماشىل-دارىندى وسكەلەڭ جاستاردى قولداۋ مەن دامىتۋعا باعىتتالعان.
وسى باستاما ەرەكشە الەۋمەتتىك وزگەشەلىككە يە ەكەنىن جانە اقىسىز نەگىزدى ۇيىمداستىرىلعانىن اتاپ وتۋگە بولادى. شىعارماشىل جاستاردىڭ بايقاۋعا قاتىسۋ ءۇشىن بار بولعانى – قازاقستانداعى يۋنەسكو كلۋبتارىنىڭ ءبىرىنىڭ مۇشەسى, ىلگەرى دامۋعا دەگەن دارىنى مەن ىنتاسىنىڭ بولۋى قاجەت.
ۇيىمداستىرۋشىلاردىڭ ايتۋىنشا, جوبا ءداستۇرلى تۇردە وتكىزىلمەك. سونىمەن قاتار, جىل سايىن بۇدان دا كوپ ونەرلى جاستاردى تارتىپ, ولاردىڭ شىعارماشىلىعىن شىڭداۋعا مۇمكىندىك بەرىلمەك.
ءالي بيتورە