بۇل ويىندا ەرەجە ەكەۋ-اق. ءبىرى – مارەگە جەتكەنىڭدە ۇستىڭدە بوياۋ جۇعىلماعان جەر قالماۋ كەرەك, ال ەكىنشىسى – شارا بويى كوتەرىڭكى كوڭىل-كۇيدى ەش جوعالتپاۋعا ءتيىسسىڭ. اڭگىمەمىزدىڭ وزەگى «جارقىن كروسس» اتتى ءداستۇرلى قايىرىمدىلىق مارافونى ەكەنىن ءا دەگەننەن تۇسىنگەن شىعارسىزدار؟!
اتالمىش ۋاقيعا سەنبى كۇنى استانالىق ساياباقتا ءوتتى. ەلوردا اكىمدىگىنە قاراستى ىشكى ساياسات, سپورت جانە مادەنيەت باسقارمالارىنىڭ مۇرىندىق بولۋىمەن ۇيىمداستىرىلعان مارافونعا ءبىر جارىم مىڭعا جۋىق ادام قاتىستى.
– وسىنداي يگى شاراعا اتسالىسىپ جاتقانىما قاتتى قۋانىشتىمىن. اسىرەسە, ءبىزدەر, ياعني, جاستار ءۇشىن قايىرىمدىلىققا جول اشاتىن نارسەلەرمەن اينالىسۋ – زور مارتەبە. مارافون جارناسىنا تولەنگەن قارجىنىڭ ءبارى استانادا اعاش وتىرعىزۋعا جۇمسالاتىنىن ەستىدىم. تۋعان قالامىزدىڭ كوركەيۋىنە تىرناقتاي ۇلەس قوسۋدىڭ ءوزى ۇلكەن عانيبەت قوي, – دەپ اعىنان جارىلدى ەرىكتىلەردىڭ ءبىرى, پوليتەحنيكالىق كوللەدجدىڭ ستۋدەنتى ءالي ساپاربەكوۆ.
ال ەلورداداعى «پوسادي دەرەۆو» قوعامدىق بىرلەستىگى ديرەكتورىنىڭ ورىنباسارى زەمفيرا نيزامۋتدينوۆا بيىلعى «جارقىن كروستىڭ» سۋ ۇنەمدەۋگە دە باعىتتالعانىن ايتتى. بۇقاراعا سۋ تۋرالى ءتيىمدى اقپارات بەرۋ ماقساتىندا بروشيۋرالار تاراتىلدى.
شاراعا جينالعان جۇرتشىلىقتىڭ جۇزىنەن شات-شادىمان ەموتسيانى اڭعارۋ قيىن ەمەس-ءتى. «سورەگە كەلىڭدەر!» دەگەن حاباردى تاعاتسىزدانا توسقان ولار كەۋدەلەرىندەگى رەتتىك سانعا ساي قاز-قاتار تۇرا قالىستى. بەلگى بەرىلە سالىسىمەن العا ۇمتىلىپ, «كەمپىرقوساق الەمىنە» قاراي اسىعا جۇگىردى. ويىن شارتى بويىنشا, قاتىسۋشىلار بەس شاقىرىم جولدى ەڭسەرۋى قاجەت. جولاي بەس بەكەت ورنالاسقان. وندا ەرىكتىلەر بەس ءتۇرلى بوياۋدى ازىرلەپ تۇرىپ, ءوتىپ بارا جاتقانداردىڭ ۇستىنەن قىزىلدى-جاسىلدى «جاڭبىر» جاۋعىزادى. كوز الدىڭ – قىپ-قىزىل, ساپ-سارى, كوكپەڭبەك… قۇددى ءبىر ءمۋلتفيلمنىڭ ورتاسىنا ءتۇسىپ كەتكەندەيسىڭ. ءتۇرلى ءتۇستى «ءتۇتىننىڭ» ىشىمەن مارەگە تابان تىرەگەندە, ميسسيا تولىقتاي ورىندالادى.
ايتپاقشى, بوياۋ دەگەننەن قورىقپاڭىزدار. ول – تابيعي قوسپالاردان دايىندالعان ۇنتاق. تەرىگە ەش زيانى جوق. ابايسىزدا مۇرىن مەن اۋىزعا كىرىپ كەتسە دە, تۇك ىڭعايسىزدىق تۋدىرمايدى.
شارا تاماشا فلەشموبپەن ءتامامدالدى. مارافونشىلار وزدەرىنە ۇلەستىرىلگەن بوياۋ ۇنتاقتى ۋىستاپ, بىردەي ۋاقىتتا كوككە شاشقاندا, الگى اۋماقتىڭ ۇستىندە ءتۇرلى ءتۇستى بۇلت پايدا بولدى. اكتسيانىڭ ەڭ ايرىقشا ءارى ەستە قالارلىق بولىگى دە وسى بولعانى داۋسىز.
بوتاگوز ماراتقىزى
