ەلوردادا جۇمىس ىستەيتىن جاستارعا ساتىپ الۋ قۇقىعىنسىز 5 جىلعا جالعا بەرىلەتىن تۇرعىن ءۇي الۋعا قۇجات قابىلداۋ اياقتالدى. 1-6 جەلتوقسان كۇندەرى 5463 ۇمىتكەردەن ءوتىنىش ءتۇستى.
7 جەلتوقساننان 12 جەلتوقسانعا دەيىن تالاپكەرلەر قۇجاتتار توپتاماسىنا تۇزەتۋلەر ەنگىزە الادى. ءوتىنىش بەرۋشىلەرگە qatysu.zhilfond.kz پورتالىنا تىركەلۋ كەزىندە كورسەتكەن تەلەفون نومىرىنە ءوز مارتەبەسى تۋرالى SMS حابارلاما جىبەرىلەدى. ەگەر ۇمىتكەر «قاتىسۋعا قۇقىلى» دەگەن حابارلاما السا, وندا ول تىزىمدەگى قۇجاتتاردى تولىق تىركەگەنىن جانە باعدارلاما شارتتارىنا سايكەس كەلەتىندىگىن بىلدىرەدى. بۇل جاعدايدا ءىستىڭ ناتيجەسىن كۇتۋ كەرەك.
ەگەر حابارلامادا «تۇزەتۋ قاجەت» دەپ جازىلسا, وندا ءوتىنىش بەرۋشى قۇجاتتاردى تىركەگەن كەزدە قاتەلىككە جول بەرگەن, ولار قۇجاتتارىن تولىقتىرىپ قايتا تىركەۋىنە بولادى. قانداي قۇجاتتاردىڭ قاجەت ەكەنى جەكە كابينەتتە كورسەتىلگەن.
ەگەر «تەرىسكە شىعارىلدى» دەگەن SMS كەلىپ تۇسسە, دەمەك ءوتىنىش بەرۋشى باعدارلاما شارتتارىنا ساي كەلمەيدى. مىسالى, مەنشىك قۇقىعىنداعى مۇلكى بار, تابىسى جەتكىلىكسىز جانە ت. ب. جالپى ۇمىتكەردىڭ ەلەكتروندى پوشتاسىنا ناقتى سەبەبى جىبەرىلەدى.
باعدارلاما تالاپتارىنا سايكەس, سوڭعى ەكى جىلدا مەنشىك قۇقىعىندا تۇرعىن ءۇيى جوق 29 جاسقا دەيىنگى قازاقستان ازاماتتارى جالعا بەرىلەتىن تۇرعىن ءۇي الۋعا ءوتىنىش بەرە الادى. سونىمەن قاتار ەرلى-زايىپتىلاردىڭ اتىندا جانە بالالارىنىڭ مۇلكى بولماۋى ماڭىزدى. مىندەتتى تۇردە سوڭعى ەكى جىل ىشىندە تۇراقتى تىركەۋدە تۇرۋى كەرەك. سونداي-اق ءوتىنىش بەرۋشىلەردىڭ رەسمي كىرىسى 40 اەك نەمەسە سوڭعى التى ايدا 111120 تەڭگە مولشەرىندە بولۋى شارت.
باعدارلاما بويىنشا بارلىعى 350 ءبىر بولمەلى جالدامالى پاتەر بەرۋ جوسپارلانىپ وتىر. ول ۇيلەر ر.قوشقارباەۆ داڭعىلى مەن قورداي داڭعىلىنىڭ قيىلىسىندا, سونداي-اق ابىلاي حان مەن ب.مومىشۇلى داڭعىلىندا ورنالاسقان. تۇرعىن ءۇيدىڭ اۋدانى 31-دەن 47 شارشى مەترگە دەيىن. اي سايىنعى جالداۋ اقىسى 5000-نان 15000 تەڭگەگە دەيىن بولادى. جالعا الۋ مەرزىمى – 5 جىل.
ساتىپ الۋ قۇقىعىنسىز جالعا بەرىلەتىن تۇرعىن ءۇيدى الۋشىلاردىڭ ءتىزىمى zhilfond.kz سايتىندا جاريالانادى.
باعدارلاماعا قاتىستى تۋىنداعان سۇراقتار بويىنشا 109 بايلانىس ورتالىعىنا حابارلاسۋعا بولادى.
