ەلباسىمىز نۇرسۇلتان نازارباەۆ «قازاقستاننىڭ بولاشاعى – جاستاردىڭ قولىندا» دەپ ۇنەمى ەل جاستارىنا ءۇمىت ارتادى. ال ءبىزدىڭ قازىرگى جاستارىمىز وسى سەنىمگە لايىق پا؟! البەتتە, كوپكە توپىراق شاشۋعا بولماس. دەگەنمەن بەتتەن قاعۋ كورمەي, بۇلا وسكەن سول جاستارىمىزدىڭ جۇگەنسىز قىلىقتارىن كورگەندە جۇرەگىمىز اۋىرادى. بۇل جايت ءاربىر سانالى ادامدى ويلانتسا كەرەك.
بىردە مەرەكە كۇنى اناممەن ءبىر دامحاناعا كىردىك. ءجۇزى تانىس 11-سىنىپتىڭ ەكى قىزى ەشكىمنەن دە يمەنبەي, تەمەكىنى بۇرقىراتىپ وتىر, الدارىندا سىرا. ءبىزدى كورسە دە, بايقاماعان سىڭاي تانىتتى. بۇدان بۇرىن سول قىزداردىڭ ۇيلەرىنە قونباي, اتا-انالارى ىزدەۋ سالىپ جۇرەتىندەرىن بىلەتىن ەدىم…
جاستار تۋرالى بۇقارالىق اقپارات قۇرالدارىندا ايتىلىپ تا, جازىلىپ تا ءجۇر. بىراق ونى سول جاستار وقي ما, وقىسا ەروتيكالىق باسىلىمداردى وقيدى, ارينە. كورەتىنى – باتىستىڭ ادەپسىزدىككە باۋليتىن, اتىس-شابىسقا تولى, تاربيەلىك ءمانى جوق فيلمدەرى.
ەندىگى ايىقپاس دەرتىمىزدىڭ ءبىرى – ناشاقورلىق. جاستارعا ارنالعان ديسكوتەكا مەن تۇنگى كلۋبتار وسى دەرتىڭ ۇياسى بولىپ وتىر.
جاقىندا بەدەلدى ءبىر باسىلىمعا بەلگىلى ازامات سۇحبات بەرىپتى. «مەنىڭ قىزىم ون التىدا. سول قىزىم بوپەلى بولىپ قالدى. ەشقانداي رەنجىپ, اشۋلانعانىم جوق. ەكى جىلدان بەرى دوستاسىپ جۇرگەن جىگىتى بار ەكەنىن بىلەتىنمىن. قىزىما مەكتەبىڭدى ءبىتىر, 18-گە تولعان سوڭ كورە جاتارمىز دەپ ايتقانمىن. كىشكەنتايدى اناسى ەكەۋى باعىپ وتىر ەندى» دەلىنگەن جاريالانىمدا. بۇعان نە دەۋگە بولادى؟ مۇنداي سوراقىلىقتى قانداي مۇسىلمان حالقى دۇرىس سانايدى؟! ارينە, بالانى دالاعا تاستاماعانى دۇرىس, بىراق قىز تاربيەسىنە مۇنشا سالعىرت قاراۋعا بولا ما؟ «بالاڭدى ءوز تاربيەڭمەن تاربيەلەمە, ءوز ۇلتىڭنىڭ تاربيەسىمەن تاربيەلە» دەگەن حالىق ناقىلىن جاستارىمىز سانالارىنا بەرىك ءسىڭىرىپ, كوڭىلدەرىنە توقىسا دۇرىس بولار ەدى. اتا-بابامىز ۇرپاعىن «تەك» دەپ تەجەپ ۇستاپ, جاماننان جيرەنۋگە, جاقسىدان ۇيرەنۋگە باۋلىدى. بۇعان ءالى كۇنگە دەيىن قۇنارى كەتپەگەن دانالىق سوزدەرى ءھام ىرىم-تىيىمدار-اق ايقىن مىسال. سوندىقتان ۇلتتىق تاربيە الماعان جاستىڭ ۇلتتىق رۋحى بولادى دەپ ايتۋ قيىن. قورىتىندىسىندا, «سۇتپەن بىتكەن مىنەز سۇيەكپەن كەتەدى» دەمەكشى, ۇلتتىق ۋىزىنان ءنار العان, ۇلتتىق تاربيە بەسىگىندە تاربيەلەپ وسكەن, ءتىلى, ءدىلى تازا, ويى ورەلى ۇرپاق تاربيەلەۋ قوعام بولىپ جۇمىلار وزەكتى ءىس, ازاماتتىق پارىز دەپ تۇسىنەمىن.
اقساۋلە بايعازى,
ل.گۋميلەۆ اتىنداعى
ەۋرازيا ۇلتتىق
ۋنيۆەرسيتەتىنىڭ ستۋدەنتى
