استاناداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى وسىدان 27 جىل بۇرىن كلاسسيك قالامگەر عابيت مۇسىرەپوۆتىڭ «اقان سەرى – اقتوقتى» دراماسىمەن اشىلعانى بەلگىلى. سپەكتاكلدى اتالمىش تەاتردىڭ نەگىزىن قالاۋشى قازاقستاننىڭ ەڭبەك سىڭىرگەن ونەر قايراتكەرى جاقىپ وماروۆ ساحنالاعان.
رەجيسسەردىڭ شىعارماشىلىق عۇمىرى وتكەن عاسىردىڭ الپىسىنشى جىلدارى باستالدى. الماتى, قاراعاندى, شىمكەنت, تاراز تەاترلارىندا قىزمەت ىستەپ, اقمولادا قازاق تەاترى اشىلعاندا سونىڭ تىزگىنىن ۇستادى. ع.مۇسىرەپوۆپەن ارالاسا ءجۇرىپ, جوعارىدا اتالعان تۋىندىسىن باسقا تەاترلاردا دا قويىپ, جازۋشىنىڭ باتاسىن العان. سونداي ءبىر پرەمەرا شىمكەنت قالاسىندا وتكەن.
«1982 جىلى جاقىپ وماروۆتىڭ رەجيسسەرلىگىمەن «اقان سەرى – اقتوقتى» قايتا ساحنالانعاندا, پرەمەراعا ايگىلى جازۋشى عابيت مۇسىرەپوۆ قاتىسادى. اكتەردىڭ ويىنىنا ريزا بولعان جازۋشى ساحنادا ماڭدايىنان ءسۇيىپ «شاكەننەن (ايمانوۆ) كەيىن اقاندى كورە الماي ءجۇر ەدىم. اقانىم ءتىرى ەكەن عوي!» دەپ قايىرا قۇشاقتاپ, كوزىنە جاس الادى» دەپ جازادى ج.شانين اتىنداعى اكادەميالىق قازاق دراما تەاترىنىڭ ارداگەر ءارتىسى ساپار وتەمىسۇلى تۋرالى سىر تولعاۋىندا اتالمىش تەاتردىڭ ادەبيەت ءبولىمىنىڭ مەڭگەرۋشىسى سايا قاسىمبەك.
وماروۆ مۇسىرەپوۆتىڭ ءبىر عانا دراماسىن ەمەس, «قوزى كورپەش-بايان سۇلۋ» تۋىندىسىن دا قويدى. قوس تۇلعانىڭ شىعارماشىلىق بايلانىستا بولعانىنىڭ دالەلىندەي مىنا سۋرەت قالدى.
