ءبىر امالىن تابۋ كەرەك

جامان حاباردى ەستىگەن دە, جەتكىزگەن دە جامان ەكەن. امال جوق, تاعى دا كوز جۇمعان ەكى جۇكتى ايەلدىڭ قازاسى جايلى ايتقالى وتىرمىز. وتكەن ايدىڭ سوڭعى كۇنى ايى-كۇنى جاقىنداعان ايەل كوز جۇمىپ, ارتىنا قوس جەتىمەگىن قالدىرىپ كەتە باردى. وسى وقيعادان ءتورت كۇن وتكەندە انا باقىتى بۇيىرماعان 38 جاسار ءبىر مۇڭلىق بويىنا بىتكەن شاراناسىمەن بىرگە قايتىس بولدى.

«بىزگە اقتىق دەمى تاۋسىلىپ, ءولىم اۋزىندا ءتۇستى» دەدى استانا قالاسىنىڭ قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا قالالىق اكىمدىكتە وتكەن بريفينگتە. «وكىنىشكە قاراي, ءبىز قۇداي ەمەسپىز, كورسەتىلگەن بارلىق رەانيماتسيالىق كومەككە قاراماستان, ول ايەل كوز جۇمدى. جۇكتىلىك جوسپارلانباعان, تۇرمىستا بولماعاندىقتان, قالاۋسىز بولعان دەگەن اقپارات بار. ايەل بىردە-ءبىر ەمحاناعا تىركەلمەگەن, جۇكتىلىك بويىنشا ەسەپتە بولماعان, مەديتسينالىق ۇيىمعا كەلمەگەن. ول ءبىر تۋىسىنىڭ ۇيىندە تىركەۋدە بولعان, بىراق اتالعان مەكەنجاي بويىنشا تۇرماعان. ۇنەمى ءتۇرلى مەكەنجاي بويىنشا پاتەر جالداپ كەلگەن» دەدى ول.
«اۋرۋحاناعا ءولىم اۋزىندا تۇسكەن ايەل ءۇش كۇن بويى ۇيىندە جاتىپ, ۋىستاپ اۋىرسىنۋدى باساتىن جانە جۇكتىلىكتى توقتاتاتىن ءدارى-دارمەك ىشكەن. سونىڭ ناتيجەسىندە بالا ءولىپ, ايەلدىڭ جاتىرىندا جايىلا باستاعان» دەدى استانا قالاسى قوعامدىق دەنساۋلىق ساقتاۋ باسقارماسىنىڭ شتاتتان تىس اكۋشەر-گينەكولوگى يۆان كوركان.
شاراسىزدان تىعىرىققا تىرەلگەن ايەل­دى كىنالاۋعا بولماس. بايعۇستىڭ ار­تىق قيمىلىن قاسىرەتكە اينالدىرعان مىنا تاسجۇرەك قوعامنىڭ جۇرەگىن قالاي مەيىرلەندىرىپ, ساناسىنا ساۋلە تۇسىرە الامىز؟!
بىلمەيمىن, بىراق ءبىر امالىن تابۋ كەرەك. مۇمكىن, فەرتيلدى جاستاعى ايەلدەردەن جارتى جىل سايىن گينەكولوگ كابينەتىنە بارىپ تەكسەرىلۋدى تالاپ ەتۋ قاجەت شىعار. مۇمكىن مامان-دارىگەرلەر بازار ارالاپ, قۇرىلىس الاڭدارىندا بولىپ, ەشقانداي قۇقىعى جوق, استانانىڭ تورىندە شالقاقتاپ ەمەس, ءبىر بوساعاسىندا ءبىر تىزەرلەپ قانا وتىرعان, ءۇيسىز-جايسىز مىسكىندەردى ءدا­رىگەرلىك باقىلاۋعا الىپ, كەڭەس بەرۋ كەرەك شىعار. ولارعا قالادا تىركەۋدە بولماسا دا, دەنساۋلىق ساقتاۋ مەكەمەلەرىندە تەگىن قارالىپ, تولىق مەديتسينالىق كومەك الۋى­نا جول اشۋ كەرەك بولار. مىنا قوعامدا انا بولۋ باقىتىنان ەشكىمدى ايىرماعانىن, ءسابي سۇيۋگە ەشكىم شەك قويماعانىن قايتا-قايتا قايتالاپ ايتىپ, ءتۇسىندىرۋ كەرەك شىعار. ويتكەنى سول ايەلدەردەن شىققان بالا – ەرتەڭگى قازاقتىڭ بولاشاعى, سولاردىڭ سابيلەرىمەن ءوسىپ-ونەمىز. ەندەشە شەتىنەگەن شاقالاق پەن بالا ۇستىندە كەتكەن ايەلدەردىڭ وبالىن ەندى كىم ارقالاماق؟!
بىلەتىنىم, استانادا قىركۇيەككە دەيىن قالانىڭ پەريناتالدىق ورتالىقتارىندا بەس ايەل قايتىس بولدى. ءبىز ءسوز ەتكەن ەكى ايەلدىڭ قازاسىن قوسقاندا بۇل – جەتىنشى ءولىم.