ادەبيەت قورجىنى تاعى دا ءبىر تىڭ تۋىندىمەن تولىقتى. استانا قالاسىندا بەلگىلى قالامگەر, جازۋشى, قازاقستان جازۋشىلار وداعىنىڭ مۇشەسى جانبولات باشاردىڭ «قابىر ۇستىندەگى زۇلمات» اتتى كىتابىنىڭ تانىستىرىلىمى ءوتتى.
شارانى اقىن, مەملەكەتتىك سىيلىقتىڭ يەگەرى نەسىپبەك ايتۇلى تىزگىندەپ, كىتاپ جايلى پايىمدى پىكىر ءبىلدىرىپ, سۇبەلى ءسوزىن ايتتى. سونىمەن قاتار, ەۋرازيا ۇلتتىق ۋنيۆەرسيتەتىنىڭ پروفەسسورى, بەلگىلى عالىم, جازۋشى سەرىك نەگيموۆ, حالىقارالىق «الاش» ادەبي سىيلىعىنىڭ يەگەرى, اقىن ابزال بوكەن, ادەبيەتتانۋشى ايگۇل كەمەلباەۆا, جازۋشى قايىربەك سادۋاقاسوۆ, استانا قالالىق تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆ, جۋرناليست قامبار احمەتوۆ, اقىن ءىلياس مۇقاي سىندى ازاماتتار جاڭا تۋىندى تۋرالى پىكىرلەرىن ورتاعا سالدى.
جازۋشىنىڭ جاڭا تۋىندىسىندا وتىزىنشى جىلدارى حالقىمىزدىڭ قابىرعاسىن قايىستىرعان, شاڭىراعىن شايقالتقان قۋعىن-سۇرگىن, اشارشىلىق جىلدارىنىڭ جان توزگىسىز ازابى, ەلدىڭ باسىنان وتكەن قايعى-قاسىرەتى بەينەلەنگەن. اۆتور زوبالاڭ جىلدارى ەلىن, جەرىن قورعاپ, سول كەزدەگى ساياساتقا قاسقايا قارسى تۇرعان بەلگىلى تۇلعالاردى باستى كەيىپكەر ەتىپ العان. ونىڭ ىشىندە قاراعاندى وبلىسىنىڭ اقتوعاي اۋدانى وڭىرىندە, «ۋىق كوتەرىلىسى» دەپ ايدار تاعىپ, ات قويعان توقىراۋىن كوتەرىلىسى تۋرالى تۇشىمدى جەتكىزگەن. تەڭدىك ءۇشىن, ەلدىك مۇددە ءۇشىن باس كوتەرگەن جابايدىڭ سادۋاقاسى تۋرالى تىڭ دەرەكتەردى وقىرمانعا ورامدى ۇسىنعان.
سونداي-اق, كىتاپقا جازۋشىنىڭ پوۆەسىنەن بولەك, ءبىر توپ اڭگىمەلەرى ەنگەن. «پەرى مەن پەرىشتە, «ايعانا», «اكىم قۇلاعان», «مونشاقباي بالۋان», «كىسى», «وپاسىز دۇنيە», «اڭشىنىڭ اجالى», «ۇرەي», «سوعىستان قالعان سىز» سەكىلدى زامان شىندىعى مەن ادام تاعدىرلارى سۋرەتتەلگەن شىعارماسى وقىرماندى بەيجاي قالدىرماسى انىق.
ازامات ەسەنجول
