استاناداعى «جاستار» تەاترىندا تاۋەلسىزدىكتىڭ شيرەك عاسىر تويىنا ارنالعان قالالىق تىلدەردى دامىتۋ باسقارماسىنىڭ ۇيىمداستىرۋىمەن «تاريح تولقىنىندا» اتتى ادەبي-سازدى كەش ءوتتى.
يگىلىكتى شارانىڭ ماقساتى تاۋەلسىزدىك قۇندىلىقتارىن ۇلىقتاپ, وسكەلەڭ ۇرپاقتى وتانسۇيگىشتىككە, ەلجاندىلىققا باۋلىپ, انا ءتىلىمىزدىڭ مارتەبەسىن كوتەرىپ, مەرەيىن اسىرۋدى كوزدەگەن.
كەش بارىسىندا ەلىمىز ەگەمەندىك العان كەزدەگى وقيعالار مەن ەلباسى جايىندا تۇسىرىلگەن بەينەباياندار كورسەتىلىپ, بەلگىلى قالامگەرلەر سول ۋاقىتتاعى تاريحي كەزەڭدەر جايىندا سالماقتى ءسوز ساباقتادى. ءاسىرەسە, جازۋشى الدان سمايىل اسقاق استانا تۋرالى پاراساتتى وي قورىتسا, ءتىل كوميتەتىنىڭ العاشقى ءتوراعاسى بولعان سۇلتان ورازالى ازاتتىق العان شاقتاعى انا ءتىلىمىزدىڭ ابىرويى ءۇشىن اتقارىلعان جۇمىستار جايىندا ساليقالى اڭگىمە ءوربىتتى. بەلگىلى عالىم, اكادەميك عاريفوللا ەسىم دە دەربەستىك العان جىلدارداعى ەلەۋلى وقيعالارعا توقتالىپ, جينالعان قاۋىمعا تاۋەلسىزدىك دەگەن ەڭ اسىل دۇنيەنى كوزدىڭ قاراشىعىنداي ساقتاپ, ونى قاستەر تۇتىپ, ارداقتاپ جۇرىڭىزدەر دەگەن ىزگى لەبىزىن ءبىلدىردى.
ادەبي كەشتىڭ كورىگىن ەلوردالىق قاللەكي تەاترىنىڭ ارتىستەرى قىزدىردى. ولار ساحنادا قازاق اقىندارىنىڭ ازاتتىققا ارناعان ايبىندى جىرلارىن وقىپ, رۋحىمىزدى كوتەردى. انا ءتىلىمىزدىڭ قادىر-قاسيەتىن ءتۇسىنۋگە, باعالاۋعا بۇگىنگى جاستارعا وي سالاتىن قىرعىز دراماتۋرگى مار بايدجيەۆتىڭ «ءتىل تابىسقاندار» قويىلىمىنان ءۇزىندى قويدى. دارىندى اكتەر قۋاندىق قىستىقباەۆ مەملەكەت باسشىسىنىڭ «تاۋەلسىزدىك تولعاۋىنان» ءۇزىندى وقىدى. ونداعى: «ءبىز تاۋەلسىزدىكتى اقىلمەن, اتا-بابا جولىمەن الدىق. تاۋەلسىزدىكتىڭ قايتا ورالعانى – ءبىزدىڭ اتا-بابالارىمىزدىڭ سان عاسىرلىق ازاتتىق كۇرەسىنىڭ زاڭدى وتەۋى. جاراتقان يەنىڭ جاساعان ادىلدىگى. اتا-بابالارىمىزدىڭ وسىنشاما بايتاق جەردى اق نايزانىڭ ۇشىمەن, اق بىلەكتىڭ كۇشىمەن قورعاپ قالعانىنىڭ ارقاسى. بۇگىنگى ءبىزدىڭ تاۋەلسىزدىگىمىزدىڭ قاينار كوزى – قازاق حالقىنىڭ سان عاسىرلار بويعى كۇرەسىندە, ازاتتىققا ۇمتىلعان قايسارلىعىندا جاتىر» دەگەن ويلى ءسوزدەردەن ازاتتىقتىڭ قۇنى مەن ءباسىن ىشتەي ۇعىناسىز.
كوركەم جىرمەن ورىلگەن سازدى كەشتە وتانسۇيگىشتىك رۋحتاعى اندەردىڭ بايراعى جەلبىرەدى. ەندى عانا كوپشىلىككە تانىلىپ كەلە جاتقان جاس ءانشى جاسمينا تۇراشەۆا «وتانىم ءۇشىن» دەگەن ءان شىرقاسا, تالانتتى ونەرپاز التىناي جوراباەۆا «قازاقستانىم, العا!» دەپ اتالعان پاتريوتتىق انىمەن كورەرمەندەردىڭ ىستىق ىقىلاسىنا بولەندى. كەش شىمىلدىعىن جانات شىبىقباي ارقالى اقىن قادىر مىرزا ءالىنىڭ سوزىنە جازىلعان ەسكەندىر حاسانعاليەۆتىڭ «اتامەكەن» انىمەن قورىتىندىلادى.
تۇيىندەپ ايتقاندا, تاۋەلسىزدىكتىڭ مەرەيلى بەلەسىنە ارنالعان تاماشا كەشتەن تاعىلىمعا تولى تانىمدىق دۇنيەلەردىڭ كوپ بولعانى كوڭىلىمىزدى كوتەردى.
ازامات ەسەنجول
