سىبايلاس جەمقورلىقپەن بەلسەندى كۇرەس جالعاساتىن بولدى. پرەزيدەنت جولداۋىندا مەملەكەتتىك قىزمەتتەر اياسىندا قىزمەتشىلەردىڭ تۇرعىندارمەن تىكەلەي قارىم-قاتىناسىن ازايتۋ قاجەتتىگى ايتىلدى.
اسىرەسە, جەر قاتىناستارى مەن قۇرىلىس سالاسىنداعى بيۋروكراتتىق راسىمدەر – ەلدى مازالايتىن ماسەلە. بۇل سالادا ەشقانداي اشىقتىق جوق ەكەنىن پرەزيدەنت تە مويىنداپ وتىر. سوندىقتان ءتيىستى ورگاندارعا جەر قورى مەن جىلجىمايتىن مۇلىك نىساندارى تۋرالى مالىمەتتەردىڭ بىرىڭعاي اقپاراتتىق بازاسىن جاساۋدى تاپسىردى.
جالپى, 2019 جىلى كورسەتىلەتىن مەملەكەتتىك قىزمەتتەردىڭ 80 پايىزى, ال 2020 جىلى كەمىندە 90 پايىزى ەلەكتروندى فورماتقا كوشىرىلۋگە ءتيىس. ول ءۇشىن مەملەكەتتىك كورسەتىلەتىن قىزمەتتەر تۋرالى زاڭ جەدەل جاڭارتىلماق. سونىمەن قاتار, قاراماعىنداعى قىزمەتكەرلەر سىبايلاس جەمقورلىققا قاتىستى قۇقىقبۇزۋشىلىق جاساعان جاعدايدا ءبىرىنشى باسشىلاردىڭ جەكە تارتىپتىك جاۋاپكەرشىلىگىن كۇشەيتۋ ماسەلەسىن پىسىقتاۋ قولعا الىناتىن بولدى. باسشىلاردىڭ جەكە جاۋاپكەرشىلىگى دەمەكشى, بۇل ماسەلە قالا اكىمدىگىندە وتكەن جەرگىلىكتى اتقارۋشى ورگانداردىڭ كەڭەسىندە دە كوتەرىلدى. قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى استانا قالاسى بويىنشا دەپارتامەنت باسشىسى جازيرا جىلقىشيەۆا جيىندا جەمقورلىققا قارسى اتقارىلىپ جاتقان جۇمىستارعا توقتالدى. ونىڭ ايتۋىنشا, مەملەكەتتىك قىزمەتشىلەردىڭ كاسىبي دەڭگەيىن ارتتىرۋ ءۇشىن سىياقى جانە فاكتورلىق-بالدىق شكالاعا نەگىزدەلگەن جاڭا جالاقى جۇيەسىن ەنگىزۋ ماڭىزدى قادام بولىپ وتىر. ەندى جالاقىنىڭ كولەمى جۇمىستىڭ سيپاتى مەن كۇردەلىلىگىنە, ال بونۋستاردى ءبولۋ تۇپكىلىكتى ناتيجەلەرگە جەتۋىنە بايلانىستى بولادى. قازىردىڭ وزىندە جاڭا جالاقى جۇيەسىنىڭ وڭ اسەرى بايقالعان.
اتاپ وتكەن ءجون, بۇگىندە №10 ەمحانا, بالالار ءۇيى جانە №54 مەكتەپ-ليتسەيىنە وڭتايلاندىرۋ جۇمىستارى جۇرگىزىلدى. ناتيجەسىندە قىزمەت ساپاسى مەن مامانداردىڭ جالاقىسىن ارتتىرۋعا باعىتتالعان ميلليونداعان تەڭگە ۇنەمدەلگەن.
ال سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ استانا قالاسى بويىنشا دەپارتامەنت باسشىسى دۋلات ازبەرگەنوۆ شەنەۋنىكتەردىڭ جاۋاپكەرشىلىگى تۋرالى ايتتى. باسشىلاردىڭ لاۋازىمدىق مىندەتتەرىن بىلمەۋى جانە جوعارى جەكە جاۋاپكەرشىلىكتىڭ بولماۋى ۇجىمدا سىبايلاس جەمقورلىق قۇقىق بۇزۋشىلىقتارعا اكەلەدى, – دەيدى ول. مىسالى, قىزمەت بابىن اسىرا پايدالانىپ, 9 جىلعا باس بوستاندىعىنان ايىرىلعان سارىارقا اۋدانى اكىمىنىڭ بۇرىنعى ورىنباسارى ريزا اكچۋريننىڭ كەزىندە اۋداننىڭ ءۇش اكىمى اۋىسقان. «الايدا ولاردىڭ بىردە-بىرەۋى اكچۋرينگە قاتىستى ءتيىستى شارالار قابىلداعان جوق» دەيدى ول.
ءىس-شاراعا قاتىسقان قوعام وكىلدەرى ۇسىنىستار ايتىپ, مەملەكەتتىك ورگانداردىڭ جۇمىسىنا بىرقاتار ەسكەرتۋلەر جاسادى. استانا اكىمىنىڭ ورىنباسارى اسقار امرين ازاماتتىق قوعاممەن ءوزارا ارەكەتتەسۋدى ارتتىرۋ جانە كاسىبي قىزمەتتىڭ اشىقتىعىن قامتاماسىز ەتۋدى جەرگىلىكتى اتقارۋشى ورگانداردىڭ جۇمىسىن كۇشەيتۋ بويىنشا حاتتامالىق راسىمدە ناقتى تاپسىرمالار بەردى.
